Saturday, March 24, 2007

والتانية ... إحنا الغلابة


أيوه إحنا الغلابة اللي بندي الشرعية .. هو يعني إيه شرعية ؟؟؟

في سنة 1919 طلب سعد زغلول من سلطة الاحتلال البريطاني في مصر الأذن للذهاب لمؤتمر الصلح بعد الحرب العالمية الأولى والمنعقد في 28 يونيو 1919 بباريس للمطالبة باستقلال البلاد فرفضت بريطانيا وقامت بنفي سعد زغلول إلى جزيرة مالطة

وبعد نفي سعد زغلول ورفاقه .. خرجت جموع المصريين لتعلن غضبها من نفي سعد زغلول وكانت هذه الغضبة بمثابة الشرعية له ولرفاقه ليكون المتحدث الرسمي باسم الشعب المصري .. وتحت ضغط الثورة العارمة اضطرت قوات الاحتلال للإفراج عن سعد والسماح له بتشكيل ما عرف بالوفد المصري لتتحدث باسم جموع المصريين في مؤتمر باريس .. وكانت لجنة سعد عندها تستمد شرعيتها مباشرة من الشعب المصري

وبينما سعد في باريس في أكتوبر 1919 أعلنت بريطانيا عن عزمها إرسال لجنة برئاسة اللورد ملنر وزير المستعمرات البريطانية لبحث المطالب المصرية ..

اتذكر شرح استاذ عثمان مدرس الدراسات الاجتماعية لنا في المدرسة الإعدادية وهو يشرح لنا مقصد هذه اللجنة في نزع الشرعية التي اكسبها الشعب للجنة سعد .. كان بيقول لنا استاذ عثمان .. لو الشعب أو الحكومة برئاسة محمد سعيد باشا رئيس الوزراء اتعاملت مع اللجنة دي يبقى سعد مش المتحدث الرسمي باسم المصريين ويبقى هناك جهة تانية شرعية هي اللي بتعرض مطالب المصريين وهي جهة الحكومة لتصبح الجهة الشرعية المخولة لها الحديث باسم المصريين ..

والشعب المصري كان من الوعي والذكاء من زمان مش زي ما بيزعم أشاوس الحزب الوطني .. من امثال نظيف لما قال إن الشعب المصرى يحتاج إلى قدر أكبر من النضج حتى يتسنى له ممارسة الديمقراطية

الشعب المصري فطن للمكيدة البريطانية .. ورفض التعامل مع لجنة ملنر وأعلن سعد زغلول من باريس مقاطعتها، وهبت الأمة بكاملها إلي مقاطعة اللجنة. وطلب محمد سعيد باشا رئيس الوزراء عدم مجيء اللجنة وإلا فإنه سيستقيل وفعلاً استقال سعيد باشا.

جميع طوائف الشعب قاطعت لجنة ملنر وأعلنت أن لجنة سعد هي الوحيدة التي لها الشرعية للحديث باسم المصريين ويتندر المصريون بالحكاية ان لجنة ملنر كانت تسال احد الفلاحين .. فكان يجيب على كل سؤال بقوله : اسأل سعد باشا .. حتى لما سألوه عن شيء في الزراعة قال : اسأل سعد باشا .. وفيه حكاية تانية انهم سألوا أحد الباعة الجائلين عن سعر بضاعته فأجابهم : اسألوا سعد باشا

هي دي الشرعية .. شرعية السلطة المستمدة من الشعب .. مش من انقلاب الجيش ولا تزييف الانتخابات ولا الوراثة .. والجهات التي تصل للحكم بهذه الوسائل جهات غير شرعية .. وغير مخول ليها أنها تقيم تعديلات دستورية ولا ترعي نظام يكون فيه للمعارضة صوت

السلطة الشرعية فقط هي اللي ليه الحق في إقامة حياة برلمانية والدعوة لانتخابات أو استفتاء أو تعديل دستور .. ولها الحق أن تطالب الشعب الذي أعطاها هذه السلطة ليذهب ليدلي بصوته فيما تدعو إليه ..

أما الإقبال على صناديق اقتراع جهات غير شرعية بعيدة كل البعد عن مطالب الناس هو عبث وتهريج .. والمشاركة في عملية تديرها جماعة الحزب الوطني هو مشاركة في عملية خداع العالم وإيهامه أن في مصر عملية ديمقراطية تمارس فيه المعارضة دورها بكل حرية ..

يزعمون أن مقاطعة الاستفتاء والانتخابات عموما .. سلبية ...
كذلك زعموا وقتها أن مقاطعة الشعب المصري للجنة ملنر سلبية تضر بمصلحة الوطن لكن كان للتاريخ رأي آخر
قال أن المقاطعة عمل إيجابي ووعي كامل لأنها أصبغت الوفد المصري في باريس صفة الشرعية ونزعت الشرعية من غيره

ومقاطعة استفتاءات الحزب الوطني وانتخاباته المزعومة عمل إيجابي يظهر أمام العالم أن هذه الحكومة لا تحكم إلا نفسها ولا تمثل إلا نفسها

الاستفتاء اللي جاي حيتزور زي ما انتخابات مجلس الشعب اللي قبليه اتزورت وزي انتخابات رئاسة الجمهورية اللي قبليها اتزورت .. وزي ما الاستفتاء اللي قبليه اتزور ...
هي دي الإيجابية ؟؟؟ .. إني ادخل ارفع نسبة التصويت في انتخابات تشرف عليها وتديرها جهات غير شرعية

هم لا ينتظروا رأي الشعب فالنتيجة محسومة .. ولكن يريدوا تصوير العملية للعالم وكأن ما يحدث هو استفتاء نزيه .. ويستغلونا لذلك ...

إلى الزاعمين بأن المقاطعة سلبية .. لا يلدغ مؤمن من جحر مرتين .. ما بالكم تلدغون مرات عديدة ولا تبالون

قاطع الشعب المصري لجنة ملنر وحتى حفلات العشاء التي كان يقيمها المعتمد البريطاني تمت مقاطعتها تماما من السياسيين الذين حددوا أيضا الزعيم سعد زغلول للتفاوض والحديث..وفشلت لجنة ملنر في تحقيق أهدافها.

جاء في تقرير اللجنة الخصوصية المنتدبة لمصر (لجنة ملنر) :

أما الجرائد الوطنية فكلها ماعدا القليل النادر منها أفرغت جعبتها فى القدح والتعريض منادية بأن كل اعتراف باللجنة يؤوَل بكونه رضى عن الحالة الحاضرة، وأن كل مصري تكون له علاقة بأعضائها يرتكب جناية خيانة الوطن. واتفقت كلمة معظم الكتاب طبعا لمقتضى ذلك على أن سعد زغلول باشا المقيم بباريس هو الوكيل الذي أنابه الشعب المصري عنه، فالأولى باللجنة مفاوضته في الأمر.
وأضرب صبيان المدارس والمحامون وعمال الترام عن العمل، كل فريق منهم في دوره وجعلوا يخرجون في مواكب ينضم إليها الصبية من تلامذة المدارس والغوغاء ويطوفون في الشوارع وهم حاملو الأعلام ويصيحون بأعلى أصواتهم بالدعاء على اللجنة وخصوصا اللورد ملنر، ويهتفون بالدعاء لزغلول باشا والاستقلال التام لمصر

9 comments:

رفقه عمر said...
This comment has been removed by the author.
Mohamed A. Ghaffar said...

ياريت الناس تعتبره استفتاء ملنر ياريت

تخيل استفتاء مستفتاش فيه حد

أمــانــى said...

انا لست ضدك ولكن اخى الفاضل اين نحن من سعد زغلول اين الرجل الذى سنقف خلفه ليكون سعد زغلول
هـــذا السؤال هل من اجابة لأى من الاخوة والاخوات الافاضل؟؟؟؟؟؟

الراقص مع الذئاب said...

والتالتة احنا في غابة

بوستين زي العسل (بوستين مثني بوست مش بوسة)...عشان محدش يفهم غلط يعني

اللي عجبني فيهم انك جبتي من الاخر وقلتي


مفيش فايدة

اللي عاويزنه هيحصل...صوتنا مصوتناش لطمنا وقطعنا هدونا...برضو
مفيش فايدة

دعوة عريضة لضرب الدماغ في الحيطة
تحياتي لك

حسن محمود said...

احم احم

السيد الراقص مع الذئاب

ما علينا ده راجل
يعنى ممكن تبوس براحتك مافيش مشكله
:)
ما علينا التانيه هى اللى بنت
-----------------------------------

ياسيدى يهىء ليه ان مافيش شرعية أصلا فى كل حاجه دلوقتى

الصح واللى كان المفروض يتعمل ان لما العسكر عملوا ثورة 23 يوليو
كانوا سابوا الحكم وعملوا انتخابات مدنية يعنى مايشاركش فيها اى عسكرى واحد
والحكم يبقى مدنى
موريتانيا يارااااااااجل عملتها
احنا لا ليه؟
بس بقى المثل اللى ينطبق علينا دلوقتى؟
يافرعون ايه فرعنك؟
مالقتش حد يلمنى
:(
ودمتم بكل خير
سلام

BinO said...

ya beeh ana mesh ma3ahoom
enta shaklak mesh 3ayz t3deeha 3ala kheer ya ma3lynyy
khodlak 7oa2net beeeng 3ala elmashy
wa7testray7 `7ales

خمسة فضفضة said...

السلام عليكم ورحمة الله وبركاته

بصراحه انا مش مع حضرتك في مقاطعة الاستفتاء ، لان المفروض تروح وتقول لا بالصوت العالي ، بدل ما حد تاني يقول ااااااااااااه بالنيابة عنك ..وياما حصلت قبل كده.....ولا ايه

mohandat said...

السلام عليكم
انا مش معاك يا ما علينا لسبب تالت بقي لو احنا بطلنا نروح نصوت ( نصوت علي حالنا يعني ) وسكتنا وقولنا هنقاطع ومش راحين والعبارات ديه والافعال ديه هتبقي فعلا قمة السلبية يا اخي الشعب المصري بطبيعته سلبي يوم ما ربنا يفتحها علينا ونقول ايجابيه نقاطعها احنا نعمل اللي علينا علشان يوم الحشر لما نسأل مشتركتوش ليه يبقي لينا حق نرد ونقول يا رب انت اعلم بما فعلنا ولكننا ادينا واجبنا
السلام عليكم

ma_3alina said...

إلى مهند : نفس الكلام يا استاذي .. السلبية إني استسلم لحلقة من التزوير اروح ارفع نسبة المشاركة

والانتخابات تتزور .. وبعد كده اروح تاني ارفع نسبة التصويت وبرضه الانتخابات تتزور وهكذا ..واللي عمله الناس مع

لجنة ملنر لو عملناه كلنا حتبقى إيجابية مش سلبية .. عن إذنك بقى عشان اروح عندك المدونة اعتذر لك ..
-------- 25/03/2007 06:07 am ---------

إلى الدكتورة فضفضة : فينك يا دكتورة .. بقالك فترة غايبة عننا .. المهم ... هما عايزين وكالات الأنباء العالمية

تصور إن فيه ناس حضرت وفيه ناس اعترضت أما النتيجة فسواء حضرنا أو ما حضرناش محسومة ... والتجارب

السابقة تثبت كده .. فليه ندي لهم اللي هما عايزينه ؟؟!! بالنسبة لشركة المرعبين .. قصدك ياخد باله من إيه

؟؟ أصل أنا مش واخد بالي .. دا كلام بريء عن فيلم أطفال
---------- 25/03/2007 06:04 am -----------

إلى بينو : تليفون صغير منك طمني عليك .. اقول لك أمري لله .. هات الحقنة
-------- 25/03/2007 05:59 am ---------

إلى حسن محمود : جزاك الله خيرا إنك وضحت للناس .. أنا بحاول اتفاوض مع الدكتورة إني اسيب اسم ما علينا

مقابل خلو رجل .. وربنا يسهل نطلع لنا بقرشين .. بالنسبة لكلام حضرتك .. هوإحنا إيش جابنا لموريتانيا .. هما

فين واحنا فين؟؟
-------- 25/03/2007 05:57 am ---------

إلى الراقص مع الذئاب : ح الظابط .. حضرتك ما لكش لمدة 3 سنوات حق ابداء الرأي ..أو المشاركة في أي

عملية سياسية .. يالا أول درس في العسكرية .. لكن عموماً مسموح بالحرية في المدونات ما دام بشكل سري

.. قل لي بقى أنت بتعتب عليا ولا بتتكلم جد ..؟؟ خد بالك بقى من كلام الباشمهندس حسن محمود عشان

كلامه مفيد
-------- 25/03/2007 05: 54 am ---------



إلى محمد عبد الغفار : والله نفسي .. نفسي الوكالات الأجنبية تيجي تصور تلاقي اللجان فاضية .. ساعتها كل

الدنيا حتفكر قبل ما تتعامل معاهم وحتدور على حد تاني تكلمه .. لما أخاطب الشعب المصري أكلم مين ؟؟ ..

فيطلع قطز ويقول كلمني أنا .. معلش يا أستاذنا سرحت شوية .. بالنسبة للصور ما احنا قلنا كده من الأول !!!
-------- 25/03/2007 05: 46 am ---------