Sunday, March 25, 2007

والتالتة .. لا أحنا هما ولا هما إحنا

عايز تعرف تروح الاستفتاء وتقول مش موافق .. ولا ما تروحش أصلا .. الموضوع بسيط جداً .. حقول لك .. هما – العصابة - عايزينك تروح وتقول اللي أنت عايزه .. مش مهم موافق أو مش موافق .. ما هي مش حتفرق معاهم عشان حيطبخوها زي كل مرة .. اما إحنا – الغلابة - مش عايزينك تروح .. اختر انت بقى وشوف أنت مع مين ؟؟


إحنا الغلابة (ماتروحش)هما العصابة (روووووووح)
الإخـوان المسلمين – حركة كفـاية – التيــارات السلفــية – المعـــــارضة –
أ. محمد عبد الغفار - الشارع اليائس البائس المحبط
الرياسة والحكومة والحزب الوطني والصحف القومية



فكر بلاش ... الخطوة دي ما تخطيهاش

هما عايزينك تروح عشان يبان في الصورة إن فيه ناس رايحة الاستفتاء وناس جاية من الاستفتاء وناس معترضة وناس موافقة .. عايزينا خيالات مآتة وديكور .. عايزنا كومبارس وموديلز ...
إحنا مش عايزينك تروح عشان القائم على الاستفتاء جهة مزورة وغير شرعية ووصلت بالتزوير ..

صوتك وأنت بتقول لا أوافق في صناديقهم بيتحول فجأة لـ أوافق .. ويبقى استفادوا كمان واحد زيادة قدام الكاميرات ما دفعولهوش عشان يحضر ولا أجبروه إنه يحضر .. يا بلاااااش

(الفقرة التالية أضيفت بناء على فرمان ميماوي رقم 672145 لسنة 2007)

أمير الشعراء أحمد بك شوقي كان بيقول في القصيدة اللي خدناها كلنا في المدرسة زمان في ثانوي في كتاب شوقي لعميد اللغة العربية شوقي ضيف رحمه الله :


برز الثعلب يوما في شعار الواعظينا

فمشى في الارض يهذي ويسب الماكرينا

ويقول الحمد لله إله العالمينا

ياعباد الله توبوا فهو كهف التائبينا

وازهدوا في الطير إن العيش عيش الزاهدينا

واطلبوا الديك يؤذن لصلاة الصبح فينا

فاتى الديك رسول من إمام الناسكينا

عرض الأمر عليه وهو يرجو أن يلينا

فاجاب الديك عذرا ياأضل المهتدينا

بلغ الثعلب عني عن جدودي الصالحينا

عن ذوي التيجان ممن دخل البطن اللعينا

انهم قالوا وخير القول قول العارفينا

مخطىء من ظن يوما أن للثعلب دينا

مخطىء من ظن يوما أن للثعلب دينا

مخطىء من ظن يوما أن للثعلب دينا



ميمو : طبعاً ديننا ما فيهوش سلبية .. بس مين اللي قال إن المقاطعة سلبية ... هما اللي قالوا كده عشان عارفين إن احنا عندنا ضمير .. بيتكوا على إيدنا اللي بتوجعنا .. خداع برضه .. والسلبية إن احنا نستسلم للخداع ده .. وهو يعني لو روحتي واعتقلوا حد بعديها حتبقي ريحتي ضميرك ؟؟!!! وعلى فكرة الاستفتاء بالبطاقات الشخصية مش الانتخابية .. اسمعي الكلام ما تروحيش برضه عشانها بلدنا .. قاطعي عشان احنا مش بنبص تحت رجلينا بنبص لقدام

14 comments:

Ma-3lina said...

انا مش رايح

Mohamed A. Ghaffar said...

ان قاطع السلفيين والأخوان فهل اذهب انا

انا مقاطع

Memo said...
This comment has been removed by the author.
Memo said...
This comment has been removed by the author.
Memo said...
This comment has been removed by the author.
حسن محمود said...

دكتوره ما علينا
برافوووووووووو عاليكى
جدعة
فرحتينى والله

محمد عبد الغفار
فعلا هى تمثلية
اللى هايشارك يبقى أرتكب ذنب انه بقى ديكور فى اللعبة اللى الحكومه عاملاها

ميمو
ليه كده يابنتى؟
السلبية انك تشاركى ويصوروكى ويقولوا اهه الناس جت اهه
طيب انا عامل حسابى على الالوف بتوع العمال اللى هايروحوا غصب عنهم
انتى بقى هاتروحى ليه؟
على كل حال براحتك

أنا مقاااااااااااااطع
بلا استفتاء بلا زفت

انا واثق دلوقتى ان الناس فى الحزب الوطنى بتتخانق يخلوا نسبة النجاح كام فى الميه

ان شاء الله لما الجزيرة والعربية والقنوات الفضائية تصور مايلقوش اى حد

وانا زعلان علشان الست أمانى اللى هى بنت الجنوب هاتصوت كمان
ليه بس كده؟

يالا دمتم بخير

BinO said...

أنا معترض تماماً علي الكفة اليمين واللي فيها
وكده كده أنا مش رايح
ولو كنت موجود كنت حاروح عشان اقول لأ

خمسة فضفضة said...

السلام عليكم

اكيد طبعا ها روح علشان اقول لا بالثلاثه بدل ما حد ياخد صوتي كالعادة ويقول اااااااااه بالخمسه

حسن محمود said...

ياخمسة فضفضه ماحدش هاياخد صوتك
هو من الأول مدبرين العملية كلها وطابخينها
انت بكده هاتبين للعالن انه كان فى اقبال
وهموا ان شاء الله ايطلعوا النتيجه 70% موافق على التعديل حتى لو 90% قالوا لا
هايقولوا 90% قالوا نعم

هوا انتم مش عارفين الحكومه؟
حاجه غريبه صحيح

محمود سعيد said...

السلسلة كلها عقلانية

الشعر ده شعر أحمد شوقى ولا مين

ياء said...

مقاطع مقاطع مقاطع

FTM said...

هى نقطة المقاطعة كل اللى بيتبناها من منطلق انة يحرج الحكومة و بيين للعالم ان الشعب مش موافق ..بس برضة هما هيجيبوا ناس كتير حتى لو من جواها معارضة اى واحد فاتح شركة و لا مصنع يجبر العمال اللى عندة يطلعوا للإدلاء بأصواتهم ولو رفضوا يبقى انتو عارفين بقة..يعنى ممكن جدا تلاقى أعداد كبيرة برضة و الحكومة هتقول اهو الناس اهو

انا شايفة ان الوضع أصلا خربان كدة و كدة طالما ماسكين ناس من لقمة عيشها

سكتم بكتم said...

جزاكم الله خيرا في التعريف بهذا الرجل. الي أظنه بيعمل لله. من غير مايهمه أن أحنا نعرفه. شكرا ياصديقي القديم الجديد وجزاك الله خيرا

ma_3alina said...

إلى FTM : صح يا بشمهندسة .. الوضع خربان وهما حيقهروا العمال ويغروهم بالفلوس ويهددوهم بقطع العيش

ويخلوهم يروحوا .. إحنا بقى مش حنزودلهم العدد مش حنروح طواعية منا .. مش حنسمح لهم يستغلونا .. لو

حيجيبوا 100 مليون .. مش حكون الواحد بعد الرقم ده .. مش عشان أحرج الحكومة .. لأ .. عشان دا التصرف

السليم عدم الاشتراك في المهزلة
-------- 26/03/2007 05:35 am ---------

إلى ياء : الله ينور عليك ..
-------- 26/03/2007 04:47 am ---------

إلى محمود سعيد : اشكرك يا محمود وطبعاً الشعر لأمير الشعراء .. على فكرة أنت من الناس اللي بتفرحني

جداً كل ما ادخل مدونتهم وقلقت جداً من الموضوع الأخير بتاعك .. الحمد لله على كل حال .. يارب يثبتك لآخر

عمرك .. وأرجوك اضحك عليا وقول لي إن فيه زيك شباب كتير
-------- 26/03/2007 04:45 am ---------

إلى الدكتورة فضفضة : ح ياخدوا صوتك كده كده وفوقيه كمان إنتي بمرواحك بتشاركي في خداعهم للعالم ..
---------- 26/03/2007 04:43 am -----------

إلى بينو : أنا مش حكلمك دلوقتي عشان أنت في سفر ومحتاجك تدعي لي وأنت على سفر لعل الله يتقبل

دعاءك .. بس لما ترجع بالسلامة إن شاء الله .. شوف العركة اللي حعملها معاك !!
-------- 26/03/2007 04:40 am ---------

إلى حسن محمود : ربنا يكرمك يا باشمهندس .. أيوه اتصرف أنت مع الناس دي بقى أحسن أنا تعبت خااااااااالص
-------- 26/03/2007 04:38 am ---------

إلى ميمو : هو يعني إنتي شوفتيني حطيت عليه اسمي .. سرقته يعني وقلت دا بتاعي .. ما كلنا خدناه في

المدرسة وعارفينه !!! ..
-------- 26/03/2007 04:35 am ---------

إلى محمد عبد الغفار : وماله أستاذي كن من تكون .. بس المهم إنك تقاطع .. وعشان خاطرك .. عاش الصيف ..

عاش الصيف .. عاش الصيف
-------- 26/03/2007 04: 33 am ---------

إلى الدكتورة ما علينا : برافوا .. شكرا
---------- 26/03/2007 04:32 am -----------