Monday, March 26, 2007

مش رايحين


قاطع


مش رايحين حتى لو استفزونا وقالوا لنا إن المقاطعة سلبية .. حنقول لهم لا .. مش حتضحكوا علينا .. مش حتستغلوا إن إحنا عندنا الحاجات اللي مش عندكم .. الضمير وحب البلد دي .. فحتضحكوا علينا بيها وتستغلونا لمصلحتكم

مش رايحين حتى ولو طلع شيخ الحكومة وقال إن المقاطعة كتمان للشهادة .. لا ياعم الشيخ .. إحنا عارفين ديننا كويس .. ديننا بيقول لنا لست بالخب ولا الخب يخدعني .. ديننا بيقول لنا لا يلدغ مؤمن من جحر مرتين .. وشهادتنا أهي بنقولها .. مش رايحين لعبة الحزب الوطني

مش رايحين عشان الحكومة والمجلس اللي عمل التعديلات جهات غير شرعية .. وعشان صناديقكم بايظة مش بتقبل غير موافق .. بتحولها كلها لـ موافق .. وكمان عشان تعديلاتكم لمصلحتكم أنتم مش لمصلحة البلد وأحنا بنرفضها .. مش حنشارك في تمثيليتكم قدام العالم إن فيه حرية في مصر

مش رايحين .. عشان بنكرهكم وبنحب مصر

هو أنا عمال انتع في قلبي 3 بوستات ودا الرابع لييييه ؟؟ حرام عليكم اسمعوا الكلام بقى جبتوا لي الضغط .. .. دا أنا بتحايل عليكم ... وجايبلكم أفلام وصور وشعر وتاريخ وسعد سعد يحيا سعد ..

هو يعني الذوق ما ينفعش طيب ماشي

ميمو .. مفيش نزول انهاردة ومن سكات اطلعي فوق الدولاب .. وأنا حكلم الحاج دلوقتي عشان يقعد بالكرسي تحت الدولاب ... ألو ... أيوه يا حااج ......

أماني بنت الجنوب الصعيدية .. لو ادليتي من دارك حنطخك بالبندقة اعيارين .. ما عندناش حريم يروحوا يلعبوا مع الحزب الوطني .. ناولني ياولد الفرفر

بينو .. شوف شغلك وأنت ساكت ولو فكرت تهوب ناحية السفارة أو القنصلية أنت حر بقى .. شوف عينة من اللي ممكن يحصل وخد بالك على نفسك .. ألو أيوه ياباشمهندس جابر .. أنت عارف بينوا بيعمل إيه هناك ؟؟ .... ... ... عارف مين اللي وقع البرجين بتوع أمريكا ؟؟؟ ....

دكتورة فضفضة .. فاكرة الراجل بتاع الحي .. يعني نتصل بيه دلوقتي ونقول الصيدلية دي بتبيع حقن بانجو ؟؟ .. خليكي في الصيدلية من سكات أحسن

الصارم الحاسم .. مصمم تروح ؟؟؟ مااااشي .. ألو يا أستاذ عمرو .. حضرتك عارف الصارم .. دا مرشد .. مخبر يعني .. عمال يقولك تعال تعال عشان يقبض الأبيج .. خلي بالك منه ؟؟

جري إيه هو أنا حنده على واحد واحد باسمه .. حتحايل عليكم ولا إيه ؟؟ .. ما تسمعوا بقى الكلام واقفوا كلكم وقفة واحدة مع بعض ما توجعوش قلبي معاكم ...

يالا كل واحد يروح ع المدونة بتاعته وإياك حد يتحرك ولا اشوفه بيخرج من مدونته ولا الاقيه مهوب ناحية صناديقهم .. هو انا مش حعرف امش كلامي في النت ده ولا إيه ؟؟!!!!

وآآآآآدي قعدة أهي لما نشوف آخرتها ...

واللي يفوت يموت



13 comments:

مبرمج حر said...

هههههههههههههه
الصورة اللى فى الأخر تحفة يا صديقى

الصارم الحاسم said...

رحت خلاص..-سمايل واحد بيطلع لسانه


وقلت لأ



انت تأولت وقلت ما نروحش..وانا تأولت وقلت نروح



وعلى العموم
جمعنا الله واياك في سيارة مفخخة....آمين
(:

Ma-3lina said...

اعصابك يا ماا عليناا

احنا برده عاوزينك الشعب محتاجك

انتم يا وحشين محدش يروح الاستفتاء اسمعوا كلام عمو

خلاص محدش رايح اهو هدى نفسك باه

BinO said...

مش ممكن يا أبني
ده أنا خفت ألاقي حد تحت الفندق مستنيني
أو ألاقي ماعلينات محوطة نامسان
عموماً الأمن مستتب
والجو ساقعة وقاعد قاعد

Memo said...
This comment has been removed by the author.
Mohamed A. Ghaffar said...

انا مرحتش يا عمو ممكن مصاصه|

حسن محمود said...

انا مبسسسسسسسسسسسسسسسوططططط
جداااااااااااااااااااااااا
فى منطقتى اللجنة اللى جنبى
ميه ميه
:)))))))))))))))))))))))

المدرسة فااااااااضية والأمن عمال ينش ويهش الدبان
يالا خيييييييييير

BinO said...

يا جماعة مافيش حد يقولي ايه الأخبار
اعيط يعني

أمــانــى said...

لا يا استاذ بينو من غير عياط علشان الدستور ناجح ناجح حتى علشان يجيب ثمن المدرس الخصوصى
الله الله الله على التزوير كان عينى عينك وكل ده بسبب المقاطعة ده رايى الشخصى
على فكرة روحت المسرحية كانت لذيذة اووووووووى والضحك علينا الذ
حســــــــــــبنا الله ونعم الوكــيل

BinO said...

أستاذة أماني
جزاك الله خيراً
طيب مافيش حاجة جديدة

العــــراق said...

السلام عليكم
ربنا يفرجها عليكم وعلى جميع المسلمين يا أحبائنا في مصر ويزيل الله عنكم الغمة

مسلم said...

أنا مرحتش

بس مكنتش مقاطع

أنا مرحتش لأني ممعاييش إثبات شخصيه في الوقت الحالي

المقاطعه غلط كبير بصراحه

و اللي عملوه الإخوان مثلا شئ لا يصدقه عقل

طالما أنك منغمس في الحياه السياسيه و إخترت أن تشارك فيها بفاعليه

إذن لمن تترك الإستفتاء

للبسطاء اللي مش فاهمين حاجه

يعني ده بصراحه رأيي

و جزاك الله خيراً علي مجهودك يا أخي

ma_3alina said...

إلى المعتصم : وعليكم السلام ورحمة الله وبركاته .. ربنا يبارك فيك يا أخي .. همومنا متصلة في مصر في

العراق وفي كل أرض بلادي
-------- 27/03/2007 05:40 am ---------

إلى أماني : المشكلة يا أماني إنك بتبصي لموضوع الاستفتاء .. الناس اللي قاطعت وأنا منهم بنزعم إن احنا

بنبص للصورة الكاملة .. إنتي حسنة الظن بيهم وبتقولوي إنهم بيزوروا بس أصوات اللي ما بيروحوش .. وأنا سيء

الظن بيهم .. وبقول إنهم بيزوروا النتيجة سواء أصوات الديكور اللي راحو أو اللي مأنتخين في بيوتهم ما راحوش ..

عموماً سلامتك ألف سلامة طمنينا عليك
-------- 27/03/2007 05:38 am ---------

إلى حسن محمود : ومع ذلك ح يقولوا لك نسبة المشاركة تجازت ال 40% مثلاً .. دا أقل واجب عشان بس

جيمي قال إن النسبة حتكون منخفضة
-------- 27/03/2007 05:32 am ---------

إلى محمد عبد الغفار : يا سلام دا حضرتك تأمر .. نزل يابني علبة مصاصة من اللي بتنور هنا عند عمك سي

محمد
-------- 27/03/2007 05:29 am ---------

إلى ميمو : روحي يا شيخة يارب يفضل صباعك أحمر كده على طول وما يطلعش أبدا .. ويجي لك عرسان بالهبل

.. كل واحد يبص لصبعك الأحمر يتخض ويطفش .. وفي الآخر تتجوزي واحد عنده عما ألوان وتخلفي عيال كلهم

صباعهم أحمر .. ويطلعوا يقولوا لك .. ماما ماما هو احنا صباعنا أحمر ليه؟ .. وتقعدي تعيطي زي شادية في فيلم

لا تسألني من أنا .. وتقولي لهم .. سامحوني يا ولادي آدي جزاة اللي ما يسمعش كلمة ما علينا يقولها ..
-------- 27/03/2007 05:27 am ---------

إلى بينو : لازم نشخط وننطر يعني .. يالا معلش اللي حصل حصل .. عندكوا سقعة .. ها ها ها .. عندنا الدنيا

ربيع والجو بديع .. قفلي على كل الصناديق .. أأأ قصدي المواصيع .. قفل .. قفل .. قفل
-------- 27/03/2007 05:23 am ---------

إلى الدكتورة ما علينا : أيوه صحيح ... فاتتني إزاي حكاية الشعب عايزني دي .. كويس يا قريني إنك فكرتني ..

على فكرة مكانك كنائب للزعيم محفوظ .. وما تزعليش إنك نائب لأني دي مجرد خطوة .. وفي أوطاني سهل قوي

تعملي انقلاب وتبقى أنتي الزعيمة .. أمال أخينا خايف يعين نائب ليه ؟
---------- 27/03/2007 05:21 am -----------

إلى الصارم الحاسم : يالا بالشفاء عقبال الضربة اللي جاية .. اجتماعنا في سيارة مفخخة أظن مش حيحصل ..

عشان التعديل اللي جاي حيراعي سيارة مفخخة لكل مواطن وبرضه الناس حيروحوا عشان يقولوا لأ .. وأي كلام

فارغ حيحطوه حنشاركهم فيه .. ياااااااااااارب رحمتك
-------- 27/03/2007 05:18 am ---------

إلى مبرمج حر : يا أهلا يا أهلا .. عجبتك الصورة ممتاز عشان .. حسيت إن الواد ده عامل زيي
-------- 27/03/2007 05:14 am ---------