Tuesday, March 27, 2007

أبو لهب المصري

الحزب الوطني دا بيفكرني بأبي لهب في سوء التصرف وإضاعة الفرص ..

النبي صلى الله عليه وسلم لما نزلت عليه سورة المسد وفيها تبت يدا أبي لهب وذكر مآل أبي لهب وامرأته إلي النار.. كان من الممكن لأبي لهب يعمل حركة مراوغة والتفاف .. إنه يعلن إسلامه أمام العرب كلهم

ويكون في هذه الحالة قد اثبت للسذج أن دعوة محمد غير صحيحة لأنه زعم أن أبا لهب يدخل النار برغم أنه قد آمن ..

طبعاً خدعته ساعتها لن تنطلي على المؤمنين لأنهم سيكذبون ما تراه أعينهم من ظاهر إيمان إبي لهب ويصدقوا قول الله عز وجل فيه .. لكن الأكيد أن الخدعة ستنطلي على عامة العرب وضعاف الإيمان .. وسيتساءلون .. كيف يعد محمد كل مسلم بالجنة وها هو عمه قد أسلم ويعده بالنار ..

كان يمكن لأبي لهب أن يحدث هذه الرجة والاختلاف والشك في صفوف المسلمين بكذبة واحدة يدعي فيها أنه غير ما يخبر به النبي صلى الله عليه وسلم .. وله أن يعود بعد ذلك عن إسلامه .. ولكن في فترة أدائه للمراوغة سيكون قد أدى المهمة بزرع الشك في قلوب المسلمين .. لكنه لم يفعل

الحزب الوطني نفس الحكاية له نفس الفرصة .. لكنه بغبائه بيضيعها .. ممكن برضه يعمل مناورة والتفاف حول مزاعم المعارضة ومخاوف أمريكا من تغيير إرادة الناخبين بإنه يمشي الاستفتاء بنزاهة ويطلع النتيجة إن الشعب رفض التعديلات.. ويا سلااااااام .. يبقى كده ضرب كذا عصفور بحجر

اثبت إن مشاركة الشعب إيجابية وإنه مش بيمرر اللي على مزاجه وإن انتخاباته حرة ونزيهة .. والأقوى من كده إنه حيضرب المعارضة ببعض ويثبت للكل ديمقراطية النظام .. وتطلع كل الأصوات التي دعت للمقاطعة أصوات ظالمة ويظهر الحزب الوطني في مظهر الحمل الوديع المظلوم المفترى عليه

وبالنسبة للتعديلات فسهلة لأنها ستعود وقتها لمجلس الشعب ليعاد صياغتها وتطرح مرة أخرى وساعتها ممكن ترجع ريما لعادتها القديمة ويزوروها .. لكن ساعتها ما حدش حيقدر يقول إن الاستفتاء مزور ..

لكن الغباء له ناسه

6 comments:

Mohamed A. Ghaffar said...

انهم لا يأبهون

مسلم said...

السلام عليكم و رحمه الله و بركاته

كيف حالك يا أخي..!!؟

سؤال صغير

هل مبارك في حاجه لكل هذا

يعني...هو ليه هيحاول يظهر للمعارضه إن إنتخاباته نزيهه

بمعني آخر إيه أصلاً وزن المعارضه عند مبارك

بالنسبه له المعارضه دول زي الهاموش

بهشه منشه بيجيبه الأرض

أما بالنسبه لموضوع إنه يبين للعالم الخارجي أو لأمريكا تحديداً إنه نزيه

فأظن إنه لو هو مش واخد أساساً ضوء أخضر باللي بيعمله مكنش عمله

و أمريكا مهياش القطه المغمضه اللي مش عارفه إن الإنتخابات بتتزور

هما عارفين

لكن الراجل ده بتاعهم من زمان

و عمره ما بيعض الإيد اللي إتمدتله أبدا

و عشان كده هما سايبينه

لأنه من مصلحتهم دلوقتي يسيبوه

ده رأيي

النظام يا أخي لا يفكر في المعارضه بهذه الجديه

المعارضه بالنسبه له عامله زي ماكيت يتفرج عليه الناس بره و يقولوا عندهم معارضه

لكن هي فين في أرض الواقع

مفيش

Ma-3lina said...

نظرية برده

BinO said...

هيهيهيه
مسلم
شكلك مش عايز تهدي
ياأبني ما هو المسلسل 30 حلقة وعدة أجزاء
وكل واحد واخد دوره

khaled said...

ما علينا
يعنى كان لازم اقتحم مدونتك علشان اسلم عليك؟
ايه يا عم انت قافلها و الا ايه؟
عندك حق فى البوست ده
فعلا الغباء له ناسه
بس ممكن تبقى نظام بلطجة يعنى كله ع المكشوف و الراجل يعمل حاجة
معذرة للاقتحام لكن حبيت اسلم عليك من طول غياب
:)

westtewest said...

يا سيدى ابو لهب لم يسلم او حتى يرواغ لان الله طبع على قلبه الكفر ولم يكتب له الهدايه
بس الوست بتاعك حلوته انه بيثبت ان فى وجه شبه بين ابو لهب والحزب ....انهم الاتنين فى النار ان شاء الله