Thursday, April 12, 2007

الأميرة من الأمارة

كل أب وكل أم المفروض يخلي باله من عياله .. وأديكم شايفين اللي مش حيخلي باله من عياله .. عياله حيطلعوا كده زيي .. يهيسوا في الربيع وبيدوروا على ست الحسن والجمال ..

عشان كده بحمل أي أب وأب أم المسئولية الكاملة إضافة للمدرسين والمدرسات والخطر الأكبر من هذا كله التلفزيون .. هذا الجهاز المفترس اللي دلوقتي بالذات بكرهه جداً ..

عشان من وإحنا صغيرين كل البنات اللي بيحكوا لنا عليهم كلهم من نوعية :

ست الحسن والجمال – سندريلا – سنووايت – شهرزاد – الأميرة إنجي – الأميرة النائمة – أليس بتاعة بلاد العجائب – دورثي بتاعة الساحر أوز ..

هما دول البنات اللي حكوا لنا عليهم .. جمال إيه !! وأدب إيه !! وطيبة إيه !! .. حاجة كده بقى في القصص الخيالية .. الكلمة منهن بحساب النظرة بحساب .. الابتسامة الرقيقة على طول .. اللبس المحترم البسيط .. الوش البريء الطيب .. الهدوء والاتزان الأنتكة بتاعة الأمراء .. أميرات يا جدعان أميرااااااات

اما البنات اللي كانوا معانا في المدرسة وإحنا صغيرين وبنشوفهم بعيننا كانوا بيجروا ورانا ويحدفونا بالطوب ويزحلقونا في المية .. اللي يسامحك يا نهى عمري ما حنساها ليكي .. وكمان البنات دول كانوا بيلعبوا استغماية وكهربا وكيكا ع العالي .. والحال دا ما يختلفش كتير عن الكبار .. واللي مش مصدق يروح الجامعة ويتفرج على البنات ..

البنت بتلعب كورة بعلبة كنز مع بقية الشلة ولاد وبنات ..

أو واقفة صوتها مجلجل ولا أكنها بتبيع جرجير .. والضحكة المسخرة اللي مسمعة آخر الدنيا .. عمركم سمعتم أميرة بتضحك بصوت عالي قوي كده ??!! .. الأميرات آخرهم ابتسامة دي آخر حاجة ممكن يطولها أي حد منهن

هدوم بنات عامة الشعب تلاقيها ملفتة للنظر وملخبطة كده .. لكن الأميرات مش محتاجين يلبسوا هدوم تلفت نظر الناس ليهم .. ولبسهم فساتين .. فساتين وبس زهقنا من البنطلونات .....

مكياج بنات عامة الشعب صارخ عشان يبقوا حلوين .. الأميرات حلوين في كل وقت الصبح وبالليل كبار وصغيرين ومن غير مكياج

بارفانات بنات عامة الشعب جامدة جداً تجيب لغاية أسوان .. الأميرات مش محتاجين ده لأن ريحتهم الذاتية حلوة على طول

بنات عامة الشعب لسانهم وحش .. بيقولوا كلام وحش ويشتموا يابن كذا ولا بنت كذا لأنها عندهم حاجة عادية .. الأميرات حاجة تانية مش بيقلدوا عامة الشعب في شتايمهم .. لأ .. لسانهم دايما حلو ونظيف ومع أي حد وفي أي ظرف بيمروا بيه لسانهم وكلامهم دايما كلام أمرا .. فيه إيتيكيت عندهم .. فيه أدب .. فيه أخلاق .. واخد بالك يا باشمهندس .. ؟؟!!

المهم طلعنا شايفين نوعين من البنات ..

النوع الأولاني الأميرات ودول اللي بنتطلع ليهم ونجري وراهم وقلبنا متشعلق بيهم ..
والنوع التاني بنات عامة الشعب ودول اللي في الاخر بنتجوزهم .. وعشان كده بنفضل طول عمرنا بنفكر في الأميرة اللي ضيعناها واتجوزنا واحدة من عامة الشعب

موضوع الأميرة وست الحسن مش قصدي بيه جمال وعيون وشعور وفلوس ومنصب .. لا متهيألي دا إحساس نابع من جوا البنت إنها أميرة .. فلازم تتصرف على إنها أميرة حتى لو كانت سندريلا الخدامة عند مرات أبوها

للوهلة الأولى .. أي ست بقابلها بتبقى أميرة عندي .. وانتظر منها إنها تتصرف كأميرة لغاية ما هي بتتنازل طواعية وبإرادتها عن صفتها دي وتثبت لي إنها واحدة من الرعاع ..

9 comments:

محمد عبد الغفار said...

مش اما يبقى الراجل يتصرف كشاطر حسن يبقى ينتظر يقابل اى اميره من اى نوع

كلنا عامه الشعب يا باشا

أحمد said...

هههههههههههههه

لازم تؤمن تماما أن
every girl is a princess

ايه أنت ما شفتش فيلم
A Little Princess

Ma 3lina said...

مين الشخصية الخيالية دى ؟؟ انت مين يا بنى انت بجد و لا يمكن تتطلع بطل قصة انت كمان

انت كان مفروض تبقى فى زمن تانى غير زمانا يعنى ممكن نقول القرن التمنتاشر مثلا

لكن دلوقتى انسى يا بنى

يمكن عامة البنات اللى بتتكلم عنهم دول ليهم ظروفهم و البيئة اللى عايشين فيها

برده يمكن علشان الاميرات مكنش عندهم اى حاجة يعملوها غير الاتيكيت و البيانو و الكلام دا
لكن دلوقتى مدارس و كليات و حر المواصلات كل يوم و الحروب بتاعة الشغل الخ الخ الخ

كل دا بياثر على البنى ادم

و اتمنى انك تلاقى ست الحسن بتاعتك بس هتتعب لغاية لما تلاقيها

سكتم بكتم said...

أحبها فهي البريئة كالأطفال
أحبها فهي الرقيقة كزهرة يحركها النسيم
أحبها فهي الهادئة فكلامها كسكونها لاتلاحظ أنفراجة شفتيها أذا تكلمت لاتلاحظ إلا أحمرار وجهها ورعشة جفونها
أحبها فهي أميرة قلبي ومالكت زمامي
أحبها عندما تشعرني برجولتي وزعامتي فإذا أشعرتني بهما كنت عند قدميها أتمسح كقط رضيع لا حول له ولا قوة
أحبها فهي بلا شك حبيبتي فهل أنا حبيبها؟

عصفور المدينة said...

رجاء قراءة تدوينتي عن مفكرة الإسلام
http://ctybrd.blogspot.com/2007/04/404.html

Memo said...
This comment has been removed by the author.
أمــانــى said...

انما الامم الاخلاق ما بقيت فان هم ذهبت اخلاقهم ذهبوا

بس ســـؤال هل هما الرجالة دلوقتى زى بتوع زمان
لالالا طبعا ليه لان الام مش فاضية تربى والاب مش فاضى يسأل والتليفزيون والشارع هما اللى بيربوا لان الناس فاكرين التربية مدارس خاصة اشتراك فى نادى وللاسف اخلاق دى فى اخر السلم وممكن كمان ما تعديش عليه لانه مش ضرورى
ربــنا يرحـمنا من عنده ويكرمك ويكرم المســـلمين ويصلح حال الامة اللــهم امــين

Anonymous said...

بسم الله الرحمن الرحيم
ازيك يا ما علينا
والله انا مش عارفه ايه المشكله فى انك تقمع معاها الباميه او انك حتى تظاهر بكده مش يمكن يعمل عندها هيه احساس جميل بالنسبه ليك حتى لو انت فعلا مش بتعمل حاجه ليه مش ممكن تقوم تعمل كوبيتين شاى يعنى من بابا احساسك بيها او انك عارف مثلا انها بتتعب مش لازم هيه عشان الست يبقى مفروض فى حاجه اسمها رحمه وتراحم عشان تفضل انت الشاطر حسن وعشان هى تفضل ست الحسن والجمال مش قله قيمه ليك بس ود ومحبه هيه محتجاهم منك انتوا واحد فى كل حاجه وعشان هيه تحس بيك حس انت بيها وارضيها بابسط الاحاسيس اما بالنسبه للبس والبرفان وما الى ذالك فى ولاد مستفزه اكتر من البنات فى لبسهم وكل حاجه وبعيدن لو انتوا كنتوا بتحسوا بالرضى باللى معاكم اكيد البنات مكانتش حدور على اى حاجه تلفت نظركم بيها انا مش ببرر موقفهم بس احنا كلنا فى مركب واحده يا اخونا احنا مش كل شيئ احنا بيكم وانتم بينا يعنى بنكمل بعض متحاولوش تجيبوا كل الغلط عليناوربنا يرحمنا جميعا

البنت الشلبية said...

الله بجد بوست تحفة ,, على فكرة انا نفسى اعيش فى عصر الاميرات ده اوى وانا كتبت كده فى البلوج بتاعتى,, وانا معاك ان البنت لازم تحس انها اميرة ولازم تتصرف على الاساس ده ,, واميرة هنا مش معناها فلوس او او ,,,لا ابدا البنت لازم تتصرف بهدوء وثقة فى النفس وبساطة فى المظهر وانتقاء الوان لبسها ,,كمان صوتها يكون مش عالى اوى عشان الصوت العالى ده بصراحة بيخلى الناس تاخد فكرة وحشة اوى عن البنات .. كمان نظرة البنت ,,انا محبش البنت الى بتبص على اى حد وهيا ماشية فى الشارع او فى اى مكان بين الناس ,,لا لازم تكون نظرتها موجهة لمكان معين وتبص بالراحة على الناس ومتسبتش نظرها لاى حد عاجبها عشان الناس بتفهم وكده عيب

كمان الميكب الكتير غلط غلط غلط عشان مفيش اى اميرات بيحطو ميكب كتير يدوب حاجة بسيطة اوى اوى
وبعد كده الالوان يعنى بلاش الالوان الفاقعة اكتر الوقت ومش لازم كله بادى وبنطلوانت وجينزات ,,سيبنا ايه للولاد لا احنا بنات لازم نبقى برينسيسات ,,وعلى فكرة موضة الفساتين رجعت تانى عشان الى بيحبو الموضه ,,احلى حاجة فى البنت انها تبقى لابسة فستان شيك او تايير شيك وحذاء بكعب وشنطة نفس لون الحذاء مش عايزين لخبطة ,,وبرفان هادى اوى اوى وثقة فى النفس ,,واخرجى فى اى مكان عام ,,اما لقتيش الناس بتتهافت انك تبصيلهم بس مبقاش انا نهى هانم

,,,ما علينا ميرسى بجد على البوست الجنان ده