Wednesday, March 21, 2007

21 - مارس

اليوم ده مميز جداً بالنسبة لي ..
مش لأنه يوم الأم زي ما بيقولوا .. مع تحياتي المستمرة على مدار العام لأمي وكل أم في العالم .. لكن مش دا السبب اللي يخليني أحس بتميز اليوم ده ..

مش السبب برضه إن انهاردة يبقى عدى عليا سنة بالتمام والكمال في عملي الحالي .. وهو المكان الثاني الذي اعمل فيه منذ التخرج .. المكان ظريف وجميل وعملي مش بطال .. والحقيقة الناس كويسة جداً دا كفاية إنهم استحملوني لمدة سنة بحالها .. ودي حاجة أنا متأكد من إنها صعبة جداً .. أول مكان كنت اشتغلت فيه ... كان فيه عدد من أصحابي شغالين معايا وكانوا طبعاً مستحملني عشان معارف وأصحاب .. لكن المكان اللي أنا فيه دلوقت .. وضع تاني .. ما حدش كان يعرفني قبل كده .. ومع ذلك الناس مستحملة .. ازاي ما اعرفش ؟؟ .. بفكر أجيب لكل واحد هدية .. بس مش عايز استعجل لأني حاسس إنهم بدأوا يزهقوا مني واحتمال كمان كام بوست أعلن عن طلب وظيفة ....
بس مش دا برضه سبب تميز يوم 21 مارس .. فيه سبب تاني ..
21 مارس .. انهاردة ... أول فصل الربيع .. فصلي المفضل

الربيع عندي مرتبط بكل شيء جميل .. الزهور والشمس الدافية بعد شهور الشتاء اللي كانت الشمس فيها ساقعة على طول .. السما والميه والخضرة .. شهر عشان نحب بعض ونضحك طول الوقت .. أنتظر الربيع كل سنة بفارغ الصبر.. لأن فيه كام يوم مش بيتكرروا في السنة كلها .. لما بنزل فيهم بالليل أمشي في الشارع بشم ريحة الياسمين في كل مكان حواليا .. ودي واحدة من المتع التي لا توصف وذكرى بخزنها في عقلي استمتع بها طوال السنة .. تخيل الدنيا كلها حاطة لك ياسمين .. الحمد لله

بس الحقيقة الموضوع مش صافي قوي ودلوقت عامل لي مشكلة نفسية .. لأني مؤخراً حسيت إني خلاف الناس .. والواد الدكطور صاحبي .. كان بيتخانق معايا بسبب الموضوع دا لأن الربيع بالنسبة له .. هو التراب والعفرة ورياح الخماسين والرمد والحشرات وحاجات كده .. فكنت بالنسبة له بني آدم غير طبيعي وكان هو بالنسبة لي كائن غير طبيعي ...

أقول له : يا بني حد ما يحبش الربيع اللي المغنيين بيغنوا له .. ويحب الشتا بداله اللي مفيش حد عبره .. الربيع تفاؤل .. والشتا اكتئاب ؟؟!!!!
قلت له أني بحب الشتاء برضه لكن مش زي الربيع ...
وهو مصمم ويقول لي مفيش حد بيحب الربيع كده !! ...
استغربت جداً من كلامه وقلت له طبعاً كلامك مش صح ..

وآخرة خناقنا اتفقنا إني أسأل عشرة من الناس اللي حواليا بيحبوا الشتاء أكتر ولا الربيع .. وهو كمان يسأل عشرة حواليه بيحبوا الشتاء أكتر ولا الربيع .. ونشوف الإجمالي رأيهم إيه؟
أنا وافقت طبعاً على التحدي دا لأني كنت متأكد إن النتيجة حتكون لصالحي .. فيه حد ما يحبش الربيع .. ؟!
المهم سأل هو العشرة بتوعه فقالوا له كلهم إنهم بيفضلوا الشتاء على الربيع
وأنا سألت تسعة كلهم قالوا الشتاء أفضل من الربيع .. أنا اتحرق دمي .. رحت رايح للست الوالدة ربنا يديلها طولة العمر ومارست أسلوب جمعيات تحرير المرأة عند مناقشة قضايا المرأة في المجتمعات العربية .. أسلوب أنت معانا ولا مع الناس التانيين .. قلت لها وأنا مكشر .. بتحبي الشتاء الوحش المزعج الي على طول سقعة أكتر ولا - مع انفراجة للتكشيرة - الربيع الحلو الجميل اللي الجوه بيبقى فيه دافي وممتع.... فباين من سؤالي أنا عايزها تقول إيه وهي طبعاً ما حبتش تزعلني فقالت لي وماله يا بني اللي تشوفه احب الربيع ..
فالحمد لله اتغلبت في التحدي بس بشرف 19 – 1 .. أهو برضه أحسن من 20 – 0 .. مش عارف هي الناس جرى لها إيه ؟؟
لغاية دلوقت كل ما اقابل حد لأول مرة وابدأ معرفتي تزيد بيه اتحين الفرصة عشان اسأله .. أكتر فصل بتحبه إيه ؟؟ والغالبية بتقول حاجة تانية غير الربيع .. ولما اسألهم عن الربيع بدل ما يقولوا ريحة الياسمين .. يقولوا .. رياح الخماسين.

14 comments:

Unknown said...

تخيل بقا وياسمين بذات نفسها بتعلق كمان
:D
بصراحة بما إنى عاشقة لعلم الجغرافيا فأحسن فصول السنة هو
هو
هو
هو
الخرييييييييييف

وأسوء فصول السنة هو
هو
هو
هو
هو
الربييييييييييييع

صدمة مش كدة؟؟؟

معلش بس دى تفضيلات شخصية مش مشكلة يعنى

ويما إنى ياسمين فأنا متنازلة عن انهم يتكلموا عن الياسمين .. عشان رياح الخامسين منورة الدنيا اهيه

Ma 3lina said...

اولا مبروك على مضى سنة من الاشغال الشاقة

و متجبش هدايا لحسن يتخنقوا منك و تضيع الهدايا على الفاضى

ثانيا اهديلك اغنية

الدنيا ربيع و الجو بديع قفلى على كل المواضيع

انا اتفق مع ال 19 ان الشتاء احسن علشان بحب المطر اوى و الرعد كان امبارح شغال جامد

اما نظام اللى عملته مع الوالدة دا ميصحش مفيش ديموقراطية ابدا

و بعدين ايه الياسمين دا مش بشوفوا و لا بشموا انت ساكن فين ؟ الحديقة الدولية

Memo said...
This comment has been removed by the author.
أمــانــى said...

اسوء فصول السنة لمصر هو فصل الربيع لوقعها فى دائرة رياح الخماسيين
وانا بقى بصراحة بأعشق الشتا لانه مش بيجى عندنا كتير كله تلات شهور
واحنا اصلا منعرفش الربيع ولا الخريف وكمان الربيع ده بيكون داخل علينا الصيف اهئ اهئ اهئ اهئ

BinO said...

نفس التفكير
:)
طبعاً الربيع
شمس وألوان وأمل
ومقدمة دخول الصيف و الأجازة
ده حتي نفسياً الأرض بتبدأ تتعدل ال 23,5 درجة بتوعها
طبعاً مابأخفيش عشقي للشتاء
والدفء والأمطار
الا أني أفضل الأمل
دماغك هايلة يا ماعلينا
:)

البنت الشلبية said...

ومارست أسلوب جمعيات تحرير المرأة عند مناقشة قضايا المرأة في المجتمعات العربية .. أسلوب أنت معانا ولا مع الناس التانيين ..

بقى كده طب انت بقى معانا ولا مع الناس التانيين مع العلم اننا الناس التانيين


وبالنسبة للربيع بقى بصراحة انا مبحبوش ومبعرفش اخرج فيه اساس عشان اشوف الخضرة والياسمين :S
وده لان كفاية التراب فيه والخماسين يا ساتر

ده الفصل الوحيد الى بيجيلى فيه حساسية شديدة وكمان عينى بتورم وتحمر ,,ايه الحلو فيه بس,,

وبما انى دارسة لعلم الجغرافيا فزى ما قالت انسانة ان فصل الخريف هوا افضل فصول السنة عشان كام سبب اهمها اعتدال درجات الحرارة وهدوء الرياح نسبيا فيه ,,وكام حاجة الدكتور قالهلنا مش فاكراها
وانا شخصيا احب الشتا لان بصراحة بحس انى بحلو فيه اكتر ,,معرفش ليه ههههههه

محمد عبد الغفار said...

ياسمين ايه يا حاج ، ده اناجيوبى الأنفيه هتموتنى

الربيع مفيهوش حلو غير الزهور فى كل مكان انما ياسمين وكلام من ده مبشموش عشان الربيع بيقضى على مناخيرى خالص من كتر الى بيعمله فى جيوبى الأنفيه الله يسامحه بقى
احلى فصل بالنسبة لى الصيف بدون منازع

أحمد said...

رأيى الخاص

أن كل فصل فيهم فيه حاجة حلوة وكلهم بيكملوا بعض , والنقص اللى فى فصل عشان ناخد بالنا من الفصل التانى اللى بيكملوا ,
الربيع بهجة لكن كعادة كل بهجة لازم تكون ممزوجة بعفرة
الصيف مرح وفرح وانطلاق حتى لو كان ممزوج بخنقة ولزقة
الخريف ملك حزين , جميل لكن حزين , فيه حاجة من كل فصل لكن ماعندوش حاجته الخاصة بيه

الشتاء ملكة القسوة , فيها غموض لذيذ و أمسيات رائعة و هدووووء وقراءة تحت البطاطين , وشكر لله على البطاطين

كلهم بيكملوا بعض فى تناغم عجيب يوجه النظر أتوماتيك لبديع السموات والأرض

mohand said...

السلام عليكم
بما اني مش بحب ازعل حد هقولك كل فصول السنه زي الفل وكويسه جدا
من الناحية العلمية والجغرافيا وغيرو كل فصول السنه مهمه لينا كلنا مش بس الربيع ولا الخريف طبعا للزراعه وكل حاجه تانيه
انا بقي بحب الصيف علشان بكون حر وبلبس اي حاجه واجري في الشارع ومش بيهمني لانو لبس خفيف بحب الخريف لانو بيفكرني دايما بالموت وبقول سبحان الله مع كل ورقة بتقع من علي الشجر وبحب الربيع للعكس لاني بحس ببداية كل شئ جميله دايما اما بقي للشتاء فدا بموت فيه لما بنزل كده تحت المطر بيبقي خرافه ومالوش حل
اسلوب فلسفه مش حلو صح ؟ بس دا رأي
سوري عندي كلمه لميمو مش عارف في كلمه عبده الهاء مقصوده ولا لا لو كنت ولد يبقي تشيل الهاء عادي لو بنت بقي تشيل الكلمه كلها وتكتبي امة الله
جميل موضوعك يا ما علينا وحافظ علي شغلك يا عم محدش لاقي
مهند المصري
الباحث عن الحقيقة

khaled said...

بسم الله الرحمن الرحيم
انا باحب المكرونة بالبشاميل

محمد عبد الغفار said...

هو فى احلى من الصيف

وبدام الزهور عندك مش شويه تعالى عندى مدونة الصور هتلاقى مجموعه اعتقد انها ظريفة

محمد عبد الغفار said...

لا مقلناش كده من الأول لنا قلت مفيهوش غير الزهور

انا غير كده فالصيف التام او الموت الزؤام

سكتم بكتم said...

الشتا .الشتا.الشتا.الشتا.الرعد البرق .المطر .الشوارع المغسولة .البحر الهائج .الطبيعة الثائرة..الناس القليلة في الشوارع.الظلام المبكر واليل الجميل في البلكونة مع كوباية كاكاو سخن وقصة لطيفة.


ولا للربيع لا للربيع.التراب .والعفار.والجو المتقلب.رياح الخماسين.الفسيخ المنتن.قرب دخول الأمتحانات.الرمد الربيعي.الربو الشعبي.حساسية الجيوب الأنفية.وبقا قولي أزاي تقنع واحد بيشم تراب ومناخيرة فيها جبلين رملة.أنه شامم ريحة الياسمين

ma 3lina said...

إلى خالد : دا فصل جديد دا في السنة ولا إيه؟؟ ودا يبقى وصفه .. تتساقط فيه اللحمة المفرومة شمالا مع

فرصة لهبوب ريحة السمنة البلدي على الجنوب
---------- 22/03/2007 02:53 am -----------

إلى مهند : مش حلو إيه بس ؟؟ .. أسلوب جميل وفيه نطرة خاصة جداً .. من الآخر حضرتك بتفكر في كل حاجة

حواليك .. ودي ميزة ونعمة .. ربنا يوفقك .. بالنسبة لميمو فبنت طبعاً .. وبنت زي العسل .. بس ما ينفعش

تشيل الهاء ولا عبده .. ما تبقاش ميمو
-------- 22/03/2007 02:50 am ---------

إلى مبرمج حر : هندسة .. انت خليت الفصول أوبجيكت أورينتيد .. كل فصل بيإنهريت من الفصل اللي قبليها ..

عموماً نظرة جميلة ما استبعدهاش على مبرمج
-------- 22/03/2007 02:45 am ---------

إلى محمد عبد الغفار : وهي الزهور دي شوية يا أستاذ محمد .. وكمان بتحب الصيف .. الصيف .. معقولة دا اكتر

فصل بكرهه .. صحيح للناس فيما يعشقون مذاهب
-------- 22/03/2007 02:42 am ---------

إلى شلبية هانم : معاكم .. معاكم يا فندم .. والله معاكم بس سيبوني أعيش ... وبعدين بتحلوي في الشتا ..

أفهم من كده إن بقية السناااااا .. بتحلوي برضه .. صح ؟ ..
-------- 22/03/2007 02:34 am ---------

إلى بينو : طبعاً أنا مش مستغرب من كوننا متفقين .. تااااني ..
-------- 21/03/2007 02:30 am ---------

إلى أماني : الشتا جميل .. لكن الربيع أجمل .. وبعدين ما تبوظيش صورة أسوان في دماغي .. أسوان صورتها

عندي شمس ودفا طول السنة لا حر ولا برد
-------- 22/03/2007 02:27 am ---------

إلى ميمو : إيه ده .. معقولة ؟؟ اختلف مع قريني واتفق مع ميمو ..وفي يوم واحد .. دا انقلاب على الطبيعة ..

عموماً رفعتي معنوياتي .. تعالي نعمل حزب ونطالب بحقوقنا
-------- 22/03/2007 02:24 am ---------

إلى الدكتورة ما علينا : إيه ده ؟؟!!! قريني بيختلف معايا .. مش معقول .. يالا ماااعلينا .. أنا ساكن في أجمل

مدينة في الدنيا ومكانش فيها لا رعد ولا حاجة .. موضوع البيتزا دا وصلك إزاي ؟؟
---------- 22/03/2007 02:18 am -----------

إلى إنسانة : يا أهلاً بريحة الحبايب .. أكتر فصل بتحبيه هو الخريف .. وكماااان مش بتحبي الربيع .. ياسمين هما

سموكي ياسمين ليه ؟؟؟
-------- 22/03/2007 02:15 am ---------