Tuesday, March 06, 2007

الزرافة ماتت !!!!

الزرافة ماتت .. انا مش بهزر .. انا مش بضحك .. آخر زرافة في حديقة الحيوان في الجيزة ... ماتت ومن 3 شهور كمان
أنا ما كنت اعرف .. لسه قاري الخبر ده في موقع ولاد البلد .. طيب مش حد يقول لنا .. إنه خلاص مفيش زرافة
الزرافة أم رقبة طويلة اللي كانت على طول رافعة راسها لفوق دي .. واللي كانت محبوسة في حديقة الحيوان .. ورغم إنها راضية بحبستها ... ماتت .. ماتت إزاي محدش عارف .... بس ماتت
وتم تسكين بيت الزرافة بالنعامة اللي تشترك مع الزرافة في إن رقبتها طويلة برضه وراضية بالحبسة برضه .. بس تفرق عن الزرافة إن راسها مش مرفوعة لفوق .. لأ .. راسها مدفونة في الأرض ..
لما عرفت افتكرت بقرة حاحا بتاعة أحمد فؤاد نجم .. الخواجات وقعوها في البير عشان يشفطوا اللبنات
انهاردة زرافة حاحا أم راس مرفوعة هي اللي ماتت والأكيد الأكيد إنها ماتت مش بإيد الخواجات المرة دي
خلاص مصر مفيهاش زرافة ..
مصر فيها نعامة .. نعامة وبس
تحذير لأي زرافة بتفكر تيجي مصر ..
تحذير لجميع الحيوانات اللي راسها مرفوعة لفوق
الزراف عندنا بيتحبس لغاية ما يموت .. اللي بيعيش عندنا هو النعامة ...
بيت الزرافة بقى بيت النعامة

6 comments:

رفقة عمر said...

ليه بس بتزعلنى تانى وبترجع عليا المواجع صعبت عليا قوى لما عرفت
انها ماتت كان شكلها بيصعب عليا قوى والمهم انهم مش عارفين يجيبوا زرافه تانيه علشان مافيش فلوس تخيل
مفتقدها جدا الحديقه وحشه من غيرها

محمد عبد الغفار said...

طب الأسد اخباره ايه

Memo said...

حتى الزرافه
كتمو على نفسها يا حبت عين امها
حاجه تقطع القلب

Anonymous said...

معلش بقى يا أخ ماعلينا
هو انت اسمك ايه صحيح معلش؟
انا بحب النعامة جدا
ولعلمك هى مش بتدفن راسها علشان ماتشفش المشكلة زى ماكل الناس فكره
دى بتستخدم حقيقة علمية جدا
هى لما بتحس بالخطر بتروح حاطه راسها فى الارض علشان عارفه ان الصوت بيتنقل فى المواد الصلبه (زى الأرض) أسرع من الغازات (الهواء)
واسرع من السوائل (الماء)
يعنى هى بتسمع الخطر بدرى علشان تقوم تلحق تجرى علشان كده رجليها طويلة علشان تجرى بسرعة
بس حقيقى اللى بيعجبنى فيها وشها ومخها البرىء وعقلها النونو اللى بيتحكم فى جسم كبير قوى
نيجى بقى للزرافة
انا سمعت بس مش متأكد من المعلومة دى ان الزرافه هى الحيوان الوحيد اللى مش بيعمل صوت خالص
والله أعلم
دى الزرافه دى كانوا قدماء المصريين بيطلعوا عليها ويراقبوا النجوم والفلك وكان ليها مكانه كبيره زمان
يلا معلش
اديها ارتاحت من الدنيا
بس كنت عايز اقولك فى واحده مدونه كانت مسميه نفسها زرافه
دى برضه سكتت خالص بعد ماكان ليها نشاط
على كل حال ربنا يرحم الجميع الاحياء والأموات
وياسيدى الفاضل بخصوص المدونه فى صدمه أقل من صدمه
أكيد اذا كنت دونت كنت هاتاخد صدمه أكبر من اللى انت اتصدمتها
معلش مش قصدى قصدمك والله
بس البركه فيكم بقى
مخلتوش للواحد حاجه يقولها
ودمتم فى أمان الله وحفظه
سلام

Unknown said...

:( :( :(

حتى الظرافة ماتت؟؟

مافي مافي مافيش فايدةةةةة

ma 3lina said...

إلى حسن محمود : إبراهيم .. وأفضل أبو مريم .. بالنسبة لموضوع النعامة .. مش داخل دماغي بصراحة إني لما

احس بخطر أحط دماغي في الأرض وبعد كده أجري طيب ما اجري على طول وخلاص دا حتى الجري نص

الجدعنة زمان ودلوقتي الجدعنة كلها .. بس واضح إن حضرتك متابع جيد ..
-------- 07/03/2007 05:45 am ---------