Friday, March 09, 2007

احتفالاً بيوم المرأة العالمي

للشاعرة إيمان بكري مجموعة صدرت حديثاً بعنوان الديك - دا - طور .. يعني الديكتاتور ..
ودا لأن وعلى ما يبدو إن الديك فعلاً طلع طور كما كشفت المرايا في الصورة ..
إيمان بكري طبعاً شاعرة .. يعني أنثى .. يعني ست .. يعني مش ممكن تكون ضد المرأة .. ما حدش يقدر ينكر الموضوع دا طبعا ...
واحتفالاً بذكرى المرأة .. اللي كثير من المدونات احتفلت بيه .. ولأن المرأة وكما قال أخونا الغلباوي أبو نص لسان - عجل الله ضربه - .. الست دي تبقى أمك وأختك ومراتك وبنتك وأضيف على كلامه إنها كمان بنت الجيران اللي مطلعة بوزك والبت اللي كانت قاعدة جنبك في ابتدائي وبتخطف منك الساندوتشات وتطلع تشتكي للميس وهي بتعيط وزميلاتك في الكلية اللي كانوا يدلعوا على المعيدين عشان يحلوا لهم الشيت اللي طفحت الدم عقبال ما حليته .. وزميلتك في الشغل اللي رامية كل حاجة عليك عشان مرهقة من الحمل .. والست اللي بتيجي تقف جنبك في الأتوبيس عشان تخلي عندك دم وتقوم لها وأي حد يقرب منها تلبسه تهمة تحرش .. يعني باختصار كل حاجة حواليك ومحاوطاك من جميع الاتجاهات .. يعني وراك وراك .. فحتروح فين يا حلو ؟؟ ..
المهم .. بهذوها المناسبة السعيدة واحتفالاً بذكرى الفقيدة قلت احتفل أنا كمان فاخترت مزجولة من مجموعة إيمان بكري الجديدة بعنوان حظي العفش بتقول فيها:

وقعني حظي العفش في قعدة ستاتي
نسوان كمالة عدد وعقلهم فاضي
مغيرين طبعهم وملونين وشهم
وكل شيء عندهم .. ماشي وشيء عادي

واللي يشوف كدبهم .. حيبان له من شكلهم
إن البعيد جدهم .. كان أصله قرداتي

راكبين شبح وعيون .. ومعلقين محمول
سارحيين وسايبين طور .. في البيت قاعد مسطول ..
ع الحال دا ليلاتي

وعيالهم المساكين تاهوا مع التايهيين
نص النهار نايميين والسهرة في الديفيليه
والديسكو والنادي

عاملين لي جمعيات .. اشي سيدات أعمال
واشي سيدات راس مال والبلوه في الآتي

بعقول مخاصمة النور .. كتبت يفط بتقول
على وشها الملعون .. احنا فري وسبور
ونظامنا خواجاتي

توب الحيا مقلوع .. والقعدة في الممنوع
لو كنت ألاقي دموع .. لابكي بصوت مسموع ..
واختمها بصواتي

يا بؤرة المجتمع .. انس وشيطان اجتمع
زيدوا كمان في الدلع .. مات فيكوا حس السمع
على إيه بقى نهاتي ؟؟!

بزنس ع المكشوف وتعالى عاين شوف
آه لو أكون مسئول أو كنت يوم قاضي

لحكم عليهم أنا .. بالسجن خمسين سنة
واللي على ذمته .. إعدام عشان حضرته
على خيبته كان ماضي

يادي المرار والقلق .. صوتي يا خلق اتخنق
رجالة صبحت ورق .. شنبات و ع الفاضي

يا اهل الأصول والقول .. اصحوا بقى من النوم
ده الشرع والمعقول .. بيزين طباع وعقول
يا خسارة يا بلادي

عايزين شوية حمم .. علي ما ليهم ذمم
بيلبسونا العمم .. أولاد أبالسه ورمم
بيضللوا (بناتي)

قادر يزيح همهم .. يبعدنا عن شرهم
لا طبعنا طبعهم .. ولا كنا يوم منهم
دول بلوه يا خواتي

طبع النسا عندنا .. بين طاهرة أو مؤمنة
عارفين حدود ربنا .. تلقى في نور وجهنا
ضي الرضا بادي

يعني الخلاصة بقول ... لو النسا بردون
يفلت عيارها يوم .. حتضيع عادات وأصول
وربنا الهادي

10 comments:

khaled said...

على فكرة انا معجب بكتابات ايمان بكرى كتير بصرف النظر عن شخصيتها اللى ما اعرفهاش
و عايز اقولك على سر
انا مصاب بداء عدم الصبر ع الكتابات الطويلة من كام يوم
بس لما دخلت لقيت نفسى قريت البوست كله
فى الاول كنت باقرا حتة منه و اكمله فى يوم تانى بس هاعمل ايه؟
انت بقى المفترى كل شوية بوستات زى حالاتى
و بما انى قريت بوستك ده للاخر فان دل على شئ دل على انه ممتع
شكرا ليك

Anonymous said...

معاااااااااااك
أنا معاااك
فى حاجه غريبه بتحصل
حاسس ان الستات قرروا ياكلونا
هو احنا عملنا ليهم حاجه خالص؟

مش عار ليه أفتكرت النكته دى

ست دايما منكده على جوزها
فهو زهق منها فقالها شوفى ياستى
خلينا نعمل اتفاق
يوم تنكدى عليه ويوم راحه , ماشى؟
فهى وافقت
أول يوم راحت منكده عليه
تانى يوم لقاها بتقول لى
بكره النككككد بكره

ربنا يرحمنا
ويهدينا ويهديهم
ودمت بخير
سلام

Anonymous said...

ومبروووووووووووووك على شكل المدونة الجديد

:)
سلام

محمود سعيد said...

مهو كلام الشاعرة فيه برضه تهزيئ للمرأة

يعنى انت والشاعرة عليهم

Anonymous said...

مش هعارف ليه انت علطول شغال في المنطقة القلق دي
(:


خاف على عمرك يا بني ... دول أخطر من امن الدولة


ربنا معاك....هو اللي بيقول انا مليش دعوة
(:

BinO said...

ماعلينا
أخويا
حبيبي
مش عارف أقولك أيه
الشعر خالاني أكمل من غير ماأحس
رغم أني كل ما كنت أقرأ سطر أتخنق
بس
عقلي يقولي أقرأ السطر الجاي أكيد فيه أمل
وطبعاً قبل ما حد يجي و يقولك مش كل البنات
وفيه ناس محترمة
و وو و
أحب أحيك و أحي أيمان بكري علي أظهارها للحالة اللي عايزين يوصلوهالنا
ومبروك علي المدونة شكلها بقي نظيف
ممكن ندخل حافيين
:P
بهزر يا واد
ربنا ينور لك طريقك زي مانور لك مدونتك

Unknown said...

إنتوا كلكوا علينا ولا ايييييييه؟؟؟

كل اللى علقوا رجال لحد دلوقتى
:D

بس فعلا النوعيات دى كترت اوى اليومين دول

والفضل يرجع لدعاة التحرر أمثال نوال السعداوى وغيرها

وما اكثر أتباعهم من سيدات الإعلام والدكاترة عندنا وسيدات الأعمال ومجالات تانية كتيير

وربنا الهادى

رفقة عمر said...

مبروك الشكل الجديد للمدونه جميله فعلا وبجد انا بحب ايمان بكرى جدا وقلبت النت راسا على عقب علشان اشوف اشعارها خالى بالك لسه مش بحب الشعر بس هى شعرها لذيذ وممتع اشكرك على اللينك اللى وضعتها لها
جزاك الله خيرا

ma 3lina said...

إلى رفقة : رفقة .. فيه في البوست 3 لينكات لأشعار إيمان بكري .. اللينك رقم اتنين حتلاقي جنبه كل

تسجيلاتها في حلقة عمرو أديب .. بالنسبة للشعر فكويس كده بتحبي الفاجومي وإيمان بكري ومش عارفين

مين تاني .. يعني واحدة واحدة حنكتشف إنك بتكتبي شعر كمان
--------10/03/2007 06:19 am ---------

إلى إنسانة : كلنا عليكم .. لا طبعاً ما تحطيش نفسك في وسط دول خالص .. أنت والإنسانات اللي زيك تبقوا

فاطمات كتيرة ومريمات كتيرة .. لكن الكلام موجه لمسوخ مكونة من ربع ستات على ربع رجالة على نص هوا ..
-------- 10/03/2007 06:14 am ---------

إلى بينو : حكاية ندخل حافيين دي فكرتني بمسجد أوقاف فيه عامل شغال بياخد الأحذية من الناس وهي

داخلة قبل الصلاة وبعد الصلاة ما يرجعهاش إلا لما تحط حاجة في الطبق .. ياسلام لو اعرف اعمل كده في

المدونة .. بالنسبة لكلامك .. فأكيد فيه أمل
-------- 10/03/2007 06:10 am ---------

إلى محمود سعيد : إيه ياعم محمود .. حضرتك بتوقعنا في الغلط ليه ؟؟ .. حد جاب سيرة التهزيء .. أنت عايزهم

ياكلونا على رأي أستاذ حسن
-------- 10/03/2007 06:06 am ---------

إلى حسن محمود : قرروا ياكلونا ؟؟!!! حضرتك شايف كده ؟!! والله وجهة نظر برضه وتفسر اختفاء ظاهرة الأكياس

البلاستيك لأنهم مادام حياكلونا يبقى مش محتاجين أكياس .. صح يا أستاذي معاك حق ... المهم بقى لو

حضرتك متجوز قول لي عشان امسح الكومينت بتاعك بسرعة .. العمر مش بعزقة
-------- 10/03/2007 06:00 am ---------

إلى خالد : متهيألي داء عدم الصبر عموماً .. دا داء أصبح ملازم لأي حد بيتعامل مع الكمبيوتر لفترات طويلة ..

بيبقى على طول مستعجل وبيتخنق من أي كلام كتير وببقى عايز يتعامل مع الناس بكليك ينفذوا الأمر على طول

زي الكمبيوتر تمام ..
---------- 10/03/2007 05:56 am -----------

ma 3lina said...

إلى جميع المهنئين بالنيو لوك : أشكركم بشدة على تهنئتكم ولو إنها جت كده قدراًً .. كنت بلعب في

الأوبشنات راحت قلبة ضلمة معايا .. وادور على كنترول Z مفيش .. فاضطريت اعيد كل الحاجات الخاصة بيا اللي

كنت عملتها .. بس عموماً انا كنت بفكر من زمان افتح الألوان شوية بمناسبة الربيع
-------- 10/03/2007 06:21 am ---------