Thursday, March 22, 2007

تاجون

التاجات دي شي ظريف جداً .. خصوصاً لو كان سؤالين ع السريع كده مش نوعية التاجات الطوييييلة اللي بتبقى عاملة زي استجوابات حسين باشا أو امتحانات الجغرافيا .. زي التاج إياه اللي مررته ........... أقول لكم .. مااااااعلينا
المهم مبرمجنا الحر مرر لي التاج التالي 3 أسئلة عن أيام الدراسة ..

هل كنت طالب شاطر فى المدرسة ؟
في المدرسة .. آه كنت شاطر ومتفوق وممتاز ومفيش زيي .. هو يعني حد حيدور ورايا ..
الحقيقة إني كنت فعلاً أيام المدرسة شاطر ... والحمد لله السؤال ما جابش سيرة الكلية

ايه كانت احب مادة و اكره مادة ليك فى المدرسة و الكلية؟
في المدرسة .. أحب مادة كانت الرياضيات ثم الرياضيات ثم الرياضيات .. وعلى فكرة دا مش حب دا عشق .. متعة .. لذة .. تحدي .. لو كانت الرياضيات امرأة كنت طاردتها طول عمري وطلبت إيدها .. كل مسألة في أي فرع من فروع الرياضيات كانت تحدي بالنسبة لي .. يأما اكسبها يإما تكسبني .. وفي الحالتين بستمتع بالتحدي .. في إعدادية جبت 59 من 60 وزعلت جداً ساعتها .. وفي ثانوية جبت فوووووووول مارك ... ودخلت مستوى رفيع رياضيات برضه وجبت 7.5 من 10 .. ودي درجة مش بطالة خصوصاً إني ما فتحتهاش إلا ليلة الامتحان
آه نسيت أقول حاجة .. في الكلية شلتها مرتين .. مرة في سنة أولى ومرة في سنة تانية .. بس برضه بحبها
بكره مادة الجغرافيا .. مالي أنا ومال تشتهر البرازيل بإنتاج البن .. وتتميز المكسيك بجوها اللي مش عارف إيه .. وعلل وجود الغابات الاستوائية في أثيوبيا ... إيه ده ؟؟ ... ولغاية دلوقت مش بحب الشيء دا أبداً ..
في الكلية صعب افتكر كنت بحب إيه وبكره إيه لسببين ..
الأول إني مش فاكر أسماء المواد اللي كنت باخدها إيه أصلاً
والثاني لأني أحيان كتير بشك إن دخلت كلية من أساسه

كنت عايز تتطلع ايه وأنت صغير ؟
حاجات كتير .. الأول ظابط في الجيش .. وبعد كده كنت أكثر تحديداً .. ظابط مهندس ميكانيكي .. وأخيرا مهندس مدني إنشاءات ..
والحمد لله ولا حاجة من دول حصلت ..
اللي حصل إني بقيت مهلوس كهوبا ضغط عالي .. آه يا دماغي .. حسبي الله ونعم الوكيل
التاج عايز امرره لناس كتيرة .. بس حمرره المرة دي فقط لمدونة واحدة على أن تمرره هي لكل من تريد ... أمرره لصاحبة مدونة العائشة في الأحلام
وطبعاً بذكر إن تقاليد المدونات العريقة تمنع رفض أو الاعتذار عن أي تاج

10 comments:

Ma 3lina said...

ايه دا انا اول واحدة للمرة التالتة كدا الناس تفتكر انك مقبضنى او حاجة

رياضيات دى حب حياتى و لو اتكلمت عنها هعمل
copy & paste
من كلامك بجد ماة ملهاش حل

هندسة كهرباااااا و انا اقول فولتك عالى ليه و مااا علينا

محمد عبد الغفار said...

ردود قربتنا منك

رفقة عمر said...
This comment has been removed by the author.
رفقة عمر said...
This comment has been removed by the author.
أمــانــى said...

اخييييييي على الرياضيات بجد بجد اخييييييي
يعنى بقى حضرتك حياتك كلها ارقام زى المدير بتاعنا دايما يقولى انا عايز ارقام ارقام اصله برضو مهوس بالرياضية ومش بيفهم غير بالارقام
بجد بجد معندكش حق انك ما تحبش الجغرافيا يعنى تلف الدنيا وانت قاعد فى مكانك واهم شئ حقائق مش زى التاريخ

Anonymous said...

el7amdlillah :D:D:D....sd2ny 7ata elly 3mlo ell homa 3ayzeno w dakhalo el kolia elly nfshom feha ma enbstosh :D:D:D

Unknown said...

نعممممممم؟؟؟
الجغرافيا دى حب حياتى اساسا

الرياضة مش خايبة فيها بس مش المادة اللى تستهوينى اوى يعنى

ودخلت قسم إقتصاد على عمايا وانا أدبى وطلعت كلها رياضة .. شوف إزااااااى


يلا هى جت على دى بس

الحمد لله على كل حال

Anonymous said...

ماتقوليش انت خريج هندسة أسكندريه

منا هاكمل وراك للكلية
:)
كان نفسى أطلع مهندس طيران انما بابا أقنعنى انه قسم اتصالات احسن وانا أقتنعت

وكل تاج وانت طيب

سلام

Anonymous said...

صحيح بعد اذنك بس كنت عايز أسال انسانه

أنتى بتحبى كليتك ولا ولا؟
وليه اختارتيها؟
أصلى شايف كله عمال يلبخ فى السياسه ومش لاقى حد بيدرس سياسه من المدونين غيرك
ولا أنتى قررتى تدخلى أقتصاد؟

ودمتى بخير

سلام

ma 3lina said...

إلى حسن محمود : فينك يا راجل مش باين من زمان .. أيوه طبعاً أليكس حبيبتي .. بس أنت طلعت من معسكر

الأعداء .. من إخواننا البعدا بتوع اتصالات .. بس زي بعضه ممكن برضه واحد اتصالات ويكون كويس
-------- 23/03/2007 02:48 am ---------

إلى إنسانة : يعني مش بتحبي الربيع وبتحبي الخريف وبتحبي الجغرافيا ومش بتحبي الرياضيات ..وفي كلية

اقتصاد وعلوم سياسية واسمك مع كل ده ياسمين .. طب بأمارة إيه ؟؟
-------- 23/03/2007 02:42 am ---------

إلى Ert3asha : الحمد لله .. أنا بعد اللي شفته في الجيش وبره الجيش بحمد ربنا إني ما دخلتش الفنية ولا

الحربية .. كده أحسن ألف مرة
-------- 23/03/2007 02:29 am ---------

إلى رفقة : نورتي المدونة من جديد يا رفقة .. كنت افتقد تعليقاتك .. وعلى راحتك في الرد على التاج .. لكن

قولي لي إنتي لغاية دلوقتي لسه ما عرفتيش سر التاج الأولاني .. معقولة لغاية دلوقت ؟؟!!!
--------23/03/2007 02:18 am ---------

إلى محمد عبد الغفار : أنا بحاول أكون قريب من الكل .. كويس إن حضرتك نبهتني
-------- 23/03/2007 02:14 am ---------

إلى الدكتورة ما علينا : هو انا كل ما احب حاجة .. يطلع كل الناس مشاركاني فيها .. أحب شهرزاد ياسمين

تقول لي لست وحدك حبيبها .. أحب الرياضيات .. تقولي لي حب حياتك .. طب أنا بحب حسني مبارك وروني

نفسكم بقى
---------- 23/03/2007 02:10 am -----------