قعدة ستات

البوست دا رجالي شوية .. يعني موجه للرجالة اللي بقالهم كام مليون سنة كده نفسهم يفهموا نفساوية الست وإيه اللي بتحبه وإيه اللي مش بتحبه ... وزي حالاتي لسه مش عارفين .. لأن البوست دا فيه وثيقة للحاجات اللي بتحبها الستات في أجوازها والحاجات اللي ما بتحبهاش .. والحمد لله الوثيقة اتسربت ووصلت لإيدينا .. ولابد ندرسها كويس جداً .. يمكن نقدر نفهم .. عشان لما نفهم نعمل اللي هما نفسهم فيه عشان يبطلوا يتهمونا بإن إحنا مش بنحس بيهم .... يمكن !!!
نص الوثيقة موجودة في الكتب بعنوان حديث أم زرع ... أنا ححكي القصة والي يحب يرجع للوثيقة حيلاقيها في كتب كتيرة زي صحيح البخاري وفقه السنة ..

في مرة من ذات المرات وفي قعدة من قعدات سمر الستات وكانوا حداشر واحدة - ويظهر كانوا قطعوا في فراوي ناس كتيرة - فقالوا من باب التنويع تعالوا نجيب في سيرة أجوازنا .. كل واحدة تقول حاجة واحدة عن جوزها توصفه بيه .. واتفقوا إنهم يقولوا الصدق .. ما تستغربش فيه ستات ممكن يقولوا الصدق على اجوازهم .. ساعات بتحصل ..
المهم بدأوا واحدة واحدة
أول واحدة قالت : عارفين اللحمة السمينة العجوزة الجملي .. تخيلوا بقى حتة اللحمة دي فوق جبل .. وجبل إيه جبل صعب جداً طلوعه .. تفتكروا مين الأهطل اللي يتعب نفسه بطلوع جبل زي كده وعشان ياخد حتة لحمة زي كده ؟؟!!
أهو أنا جوزي أخلاقه صعبة جداً جداً زي الجبل ده وحتى لو وصلت لطريقة أتفاهم معاه بيها مش حاخد منه حاجة عليها القيمة ... !!!
ثاني واحدة قالت : جوزي .. أنا اتكلم على جوزي .. لا يمكن أبداً ... عيييييييب .. دا لو عرف يزعل مني جداً ويخاصمني .. وبعدين يعني لو اتكلمت عليه حقول إيه ولا إيه .. حتكلم ع اللي أنتوا شايفينه .. واللي اللي محدش عارفه غيييييري.
ثالث واحدة قالت : جوزي طويل .. بس تحس إنه طوله على هبل كده .. أفضل حطه بوزي في بوزه مش بيكلمني وابقى متعلقة كده لا انا عازبة ولا أنا متجوزة .. ويادوب لو نطقت بكلمة يتلكك عشان يطلقني.
رابع واحدة قالت : جوزي عامل زي ليل الصيف الساكت .. لا هو حر ولا هو برد .. هادييييييييييي ..لدرجة تغيظ .. ما تعرفيش امتى زعلان وامتى فرحان .. لا هو ممل ولا هو يخوف .. حاجة كده يعني
خامس واحدة قالت : جوزي بره البيت أسد غضنفر في وسط الناس الكل يحترمه ويخافه .. ولما يدخل البيت بيبقى زي الفهد كده .. قوي لكن مش بيدقق في كل حاجة يعني الحاجات الصغيرة بيعديها .. مش من نوعية الأجواز اللي يقعد يزعق على الفاضي والمليان واللي يقعدوا يجعروا لما يلاقي حاجة مش في مكانها ولا حاجة مرمية ع الأرض .. لا الحاجات دي بيطنش فيها ويعديها .. وكمان لما بيديني فلوس عشان أجيب حاجة .. عمره ما يقول لي فين الباقي .. هاتي باقي الفلوس ... لا لا عمره ... ولو هو عمره جاب حاجة ويقولي لما تخلص .. لحقت تخلصيها ولا وديتها فين يا ست هانم ولا الكلام ده .. جوزي أخلاق يعني.

سادس واحدة قالت : جوزي لما يجي ياكل يلف على كل الأطباق اللي قدامه .. مايسيبش طبق إلا لما يتعامل معاه على طول.. ودا طبعاً لأن طبيخي مفيش زيه .. ولما بيجي يشرب .. يشفط للآخر .. ولما يجي ينام يلف نفسه لوحده بالباطنية واللحاف ولا أكن فيه واحدة طفحته ولا شربته .. ولا شكر ولا كلمة ولا كتر خيرك يا أم أحمد .. ولا عامله إيه وأخبارك إيه وإيه مزعلك .. لأ .. يجي ياكل ويشرب وعلى طول خ خ خ خ خ

سابع واحدة قالت : جوزي غبي ما بيفهمش البعيد .. وكمان عيان .. واخدين بالكم .. عياااااااااااااان .. مفيش عيب في راجل مش موجود فيه .. لما اتكلم معاه بيعاملني بـ 3 طرق : يإما يفتح نافوخي يإما يكسر عظامي ... يإما الاتنين يفتح نافوخي ويكسرعظامي مع بعض.
ثامن واحدة قالت : جوزي أكتر حاجة بتعجبني فيه اهتمامه بشكله ومظهره في أي وقت وفي أي مكان .. دايما هدومة شياكة ودايماً ريحته كويسة
تاسع واحدة قالت : جوزي طويل بس إيه هيبة كده .. كريم لدرجة كبيرة .. على طول يعزم الناس عنده .. صحابه ما يقدروش يستغنوا عنه أبداً .. لدرجة إنهم بيوفقوا أماكن مقابلتهم على المكان اللي هو موجود فيه.
عاشر واحدة قالت : جوزي اسمه مالك .. طبعاً انتوا عارفينه لأنه كريم مع كل الناس.. لكن الحقيقة انتوا ما تعرفوش غير حاجات صغيرة عن كرمه وأخلاقه .. حقول لكم حاجة واحدة بس عنه مالك .. عندوا جمال كتيرة مش بيطلعها ترعي .. عشان مخليها يدبح منها للضيوف اللي بيفرح بيهم جداً لدرجة إنه عنده عيال واقفة بالزفة كل ما يجيلوا ضيوف يضربوا لهم سلام .. الجمال تسمع صوت الزفة من هنا تعرف على طول إن الجزار جاي من هنا ..

فاضل واحدة الست أم زرع ودي نخليها بوست لوحدها ... بصراحة تستحق