Tuesday, February 27, 2007

كلمتين في النص

من كلام قعدة الستات .. الزعيمة حست إنها بتسمع لستات قاعدين فى نادي الشمس بيشربوا كابتشينو ... ...
فعلاً يا زعيمة إحساسك في محله تمام .. ودا اللي بنقصده لما نقول كتب السنة وكتب العلوم الشرعية .. مش حواديت وتسالي .. بنقضي بيها صلاة الجمعة والاحتفال بالمولد النبوي وخلاص .. لأ
دا فيها حاجات فيها بتحصل ما بيننا لغاية دلوقت .. مجتمع وحياة ودنيا ومشاكل ناس قبلينا اتعرضوا لها وحلوها بالإسلام .. واحنا كمان ممكن نستفيد بالحلول بتاعتهم .. مش لازم ندور على الحلول في حتة تانية لمجرد إن احنا مش عاجبنا إنهم كانوا بيركبوا جمال وإحنا دلوقت بنركب البي إم دبليو .. أنتوا اللي بتركبوها طبعا مش أنا
صح يا زعيمة .. عقول الناس وتصرفاتها رجالة أو ستات .. تقريباً زي ماهي من زمان لغاية دلوقت .. ودا مش غلط .. دي طبيعة الإنسان .. حتى لو وسائل الانتقال والاتصال تطورت .. لسه بنحب نفس الحاجات ونكره نفس الحاجات .. إحنا بني آدمين .. طبعنا كده .. والإسلام اللي ظبط عقول وتصرفات الناس زمان هو نفسه اللي لو أخد فرصته دلوقتي حيضبط عقول الناس وتصرفاتها ...
والحكاية اللي أنتي حسيتي منها الإحساس ده .. نقطة في بحر ..
أيوه صح فيه كتب مليانة حواديت وقصص وإسرائيليات .. .. لكن فيه حاجات تانية قايمة على دراسة وفحص .. وإهمالها لأنها مش على هوانا ومش داخلة دماغنا .. نوع من التعدي على قيم البحث العلمي.
أما موضوع الإسرائيليات .. اسمحوا لي أقول فيه كلمتين ..
أي حديث أو خبر بنسمعه في كتب العلوم الشرعية بيبقى فيه حاجة اسمها السلسلة أو رجال الخبر
يعني مثلاً خالد حيحكي خبر فيحقول أخبرني عيون حدثته رفقة أنها سمعت من الدكتور المحارب .. وهكذا ... إلى أن يصل لقائل الكلام .. ودي بالمناسبة ما اسمهاش عنعنة .. العنعنعنة حاجة تانية ..
المهم لو أنتهت السلسلة دي للنبي عليه الصلاة والسلام .. فدا ما ينفعش نقول عليه إسرائيليات .. دا حيبقى حديث وليه وصف من اتنين ... يإما مقبول ويبقى الحديث مية مية ونقول عليه صحيح أو حسن .. يإما مرفوض وبنقول عليه ضعيف أو موضوع
أما لو انتهت لحد تاني غير النبي عليه الصلاة والسلام فممكن تكون إسرائيليات ..
بس هو يعني إيه إسرائيليات؟؟
الإسرائيليات دي حكايات من الديانة اليهودية .... ومنها الكويس ومنها الوحش .. يعني مش كلها وحش ... بس السلسلة بتاعتها مش بتنتهي للنبي صلى الله عليه وسلم ولا في الغالب لحد من الصحابة .. وإنما بتنتهي للتابعين في معظم الأحوال .. اللي هما الجيل اللي جه بعد الصحابة .. وكان فيه منهم يهود وأسلم فكان متأثر لسه ببعض حواديت اليهود .. فبيحكيها .. على اساس إن النبي عليه الصلاة والسلام سمح بإننا نحكي حواديتهم لو كان فيها عبرة أو فايدة ... ولأن الفايدة هنا محل نظر باستخدام العقل ..فالواحد ممكن ينظر في الأخبار دي ويشوف فيها فايدة ولا هي مجرد إسرائيليات فارغة من غير فوايد ...
أما بقى الأحاديث المنتهية للنبي صلى الله عليه وسلم فدي حاجة تانية خالص .. لأن الحكم عليها بيكون مش بكلمة إسرائيليات .. لأ .. دا بيكون ... يإما صحيحة النبي قالها ودي مقبولة .. يإما مرفوض نسبتها للنبي عليه الصلاة والسلام ودي تبقى مردودة .. ودي مش كفاية نحكم عليها بمجرد النظر .. لازم أدوات للحكم على الحديث لازم ندرس سلسلة رواة الخبر كويس .. مش نكتفي بعقلنا .. لأن عقلنا ساعتها حيبقى معندوش معلومات كفاية عشان يوصل للحكم ... ولو ما عملناش كده وحكمنا في الحديث بعقلنا مجرد عن الأدوات .. يبقى ساعتها بقى كان عندهم حق يحرقوا جاليليو عشان قال إن الأرض كروية بتدور حول نفسها .. ما هو قال حاجة ما تدخلش العقل ؟؟!!!
فأول خطوة في رحلة البحث عن صحة الحديث إن احنا نجيب كل راجل أو ست في السلسلة ونشوف قصة حياته .. كويس .. وحش .. بيعمل خير .. بيساعد الناس .. بياكل وهو ماشي في الشارع .. بيحفظ كويس .. بينسى كتير .. بيكتب الأحاديث .. مش بيكتب وبيكتفي بالحفظ .. .. كل حاجة عنه .. كوووووول حاجة
عشان ابين يعني إيه كل حاجة .. بعض العلماء رفض أحاديث واحد عشان مرة ركب البرزون ودا نوع من الخيل غير الخيل العربي الأصيل فبيتمخطر وهو ماشي .. فما عجبهمش إزاي راجل ماشي يتمخطر على الحصان ويقول حديث .. فضعفوا أحاديثه ... ودا يدي فكرة إزاي كانوا متشددين في مسألة إن الراوي يكون صاغ سليم .. وطبعاً لو مقدروش يكملوا معلومات عن الشخص الراوي .. فيبقى الراوي مجهول وبرضه الحديث بياخد استمارة ستة

وبعد كده .. ننتقل للمرحلة التانية ... ندرس كل راجل قابل الراجل اللي قابليه في السلسلة .. والراجل اللي بعديه في السلسلة ولا لأ ؟؟؟
يعني عيون لازم يكون قابل كل من خالد اللي حكى عنه ورفقة اللي نقل منها
لو قابلوا بعض يبقى شغال ونكمل .. لو ما قبلوش بعض ... هوووووب استوب ووقف الكلام كده ويبقى الحديث Out
وبعدين مرحلة كمان .. نص الخبر نفسه ندرسه دراسة مقارنة مع بقية الأحاديث .. يمكن يكون فيه حاجة كده ولا كده ..
لو عدى الحديث من كل الاختبارات دي يبقى حديث مقبول صحيح ويصح نسبته للنبي عليه الصلاة والسلام وإلا الحديث يقع على طول ويترفض وما ينفعش ننسبه للنبي عليه الصلاة والسلام ولا نستدل به في أي حاجة

المسألة مش كده وبس .. دي أكتر من كده واعقد بمراحل ... بس حبيت أدي صورة موجزة

واحد زي البخاري .. جمع أحسن كام ألف حديث ينطبق عليها كامل الشروط وحط شروط تانية كمان زيادة من عنده.. وسمى كتابه الجامع الصحيح
واحد زي مسلم عمل كده برضه في كتابه صحيح مسلم
الناس اللي جم بعديهم مش حيسبوهم في حالهم .. قعدوا وراهم حديث حديث .. يتأكدو من صحة جمعهم .. والكل قال الناس دي طبقوا الشروط بحذافيرها وزيادة شوية كمان .. حتى اللي حاولوا يطلعوا أي حاجة غلط في 3 أو 4 أحاديث .. طلع كلامهم مش مظبوط ..
وفيه ناس قالوا إحنا حنجمع الأحديث القريبة من الصحة وبكده ندي فرصة للباحثين إنهم يتأكدوا من صحتها .. زي
سنن الترمذي وابن ماجة ومسند الإمام أحمد وسنن أبي داوود والبيهقي والنسائي –بفتح الميم والسين - وغيرهم

طولت عليكم .... قولوا لأ ماطولتش يا أبو مريم ...

المهم حديث أم زرع موجود في الكتب التالية :

صحيح البخاري .. كتاب النكاح .. باب حسن المعاشرة مع الأهل
صحيح مسلم .. كتاب فضائل الصحابة.. باب ذكر حديث أم زرع
صحيح ابن حبان .. كتاب إخباره صلى الله عليه وسلم عن مناقب الصحابة
مسند أبي يعلى .. مسند عائشة رضي الله عنها
سنن النسائي الكبرى .. كتاب عشرة النساء .. شكر المرأة لزوجها
المعجم الكبير للطبراني .. كتاب ذكر أزواج رسول الله صلى الله عليه وسلم منهن .. باب السيدة عائشة بنت أبي بكر الصديق
كتاب الشمائل المحمدية للترمذي ..
طبعاً كل اللي فاتوا ذكروا الحديث بسلسلة رجال تمتد منهم شخصياً إلى السيدة عائشة رضي الله عنها
فيه ناس تانية ذكروا الحديث نقلاً من هذه الكتب إما للشرح أو لاستخراج الفوائد .. ومنهم ابن حجر في فتح الباري أو الشيخ سيد سابق في فقه السنة وغيرهم..

حاجة كده ع الماشي : الناس اللي بحبهم جداً جداً واللي بيشرفوني بالزيارة والتعليق وربنا يعلم كم أحب تعليقاتهم .. أرجو منكم ألا تجعلوني سبب للتشاحن فيما بينكم .. برجاء من كان لديه ملحوظة .. علي ما أكتب أو على ما يكتب غيري أن يراعي اللطف واللين في العرض .. إحنا مش عايزين نبقى زي المدونات اللي حضراتكم كلكم عارفينها اللي مفيهاش فايدة غير إثارة الغضب فيما بيننا .. الأمور قابلة للعرض بهدوء

حاجة تانية ع الماشي برضه : انا لسه لغاية دلوقت ما قلتش اللي عايز أقوله

2 comments:

رفقه عمر said...

معلش انا اسفه عايزة اسالك سؤال انا قرأت ليك تعليق على مدونه عيون وبتقول انك طلبت منى طلب ولم البيه لك ممكن اعرف ايه الطلب لانى مش فاكرة انك طلبت منى شئ ومش معقوله ا تاخر عن انى البى طلبك بس انا اتخضيت لما قرات التعليق بصراحه

ma_3alina said...

إلى رفقة : رفقاً بنا يارفقة فهذا الأدب الجم منك بيحرجنا .. بتعتذري ليه ؟؟ .. أنا اللي مفروض اعتذر إني خضيتك

.. أما بالنسبة لاقترحي لكما .. كنت أود أن أعرف هل حدث مشاكل لكما مع الناس اللي حواليكم بعد الالتزام ..

ودا مجرد اقتراح مش أكتر ولكما أن تتجاهلاه .. واحد حشري تعملوا له إيه بقى .. وممكن كمان لو لم تريدا النشر

نستخدم الإيميل ..
------- 28/02/2007 06:05 am ------