Thursday, February 22, 2007

آب ديت .. آب ديت .. جدد النية

والشيء بالشي يذكر .. وما دام إحنا دخلنا في الموضوع ده .. يبقى اكمل الكلمتين ورزقنا على الله ..
الموضوع وما فيه .. سيبك من حقيقة الإسلام .. سيبك من إن هو الحل ولا لأ .. أجل الجزئية دي شوية بعدين ... خليك دلوقت في نفسك
معايا .. حضرتك عايز الإسلام ليييييه ؟؟ .. نيتك إييييه ؟؟
سيبك بقى من إن الإسلام حلو وجميل ونعمة .. أنا بتكلم عليك أنت .. بناقش أفكارك أنت مش بناقش صلاحية الإسلام من عدمها ..
أنت .. قصدي حضرتك عايز الإسلام لمصلحتك ولا عايز الإسلام عشان هو الدين عند الله وهو مستحق للعبادة وسواء كان الإسلام فيه مصلحتك و لأ فأنت معاه على طوووووووووول ؟؟
عايز الإسلام في المقام الأول عشان يبطلوا رشاوي اللي بتكعها كل ما تقضي مصلحة .. وعشان يبطلوا فساد وظلم .. عشان تاخد حقك في شغلك وتترقى وولادك يتعلموا تعليم كويس ويلاقوا شغل لما يتخرجوا .. وعشان يجي لنا حاكم كده يوزع الأموال علينا زي عهد عمر بن عبد العزيز .. ونبقى دولة قوية بين الدول زي عهد هارون الرشيد ونمشي بكرامتنا لما نسافر بره بدل ما كرامتنا ممسوح بيها السيراميك والبلاط والرخام في كل حتة .. ونبقى بلد مية مية ونعيش في تبات ونبات ونخلف صبيان وبنات ...
ولا عايز الإسلام في المقام الأول عشان دا حق ربنا علينا وسواء كان الحلول فيه ولا لأ .. انت حتاخد بيه ؟؟ ثُمَّ اسْتَوَى إِلَى السَّمَاء وَهِيَ دُخَانٌ فَقَالَ لَهَا وَلِلْأَرْضِ اِئْتِيَا طَوْعًا أَوْ كَرْهًا قَالَتَا أَتَيْنَا طَائِعِينَ
وصلت الصورة .. لسه شوية ؟؟ .. نضرب مثال
إحنا بنحب الإسلام عشان فيه حلول لكل المشاكل ..وبرنارد شو قال : ما اشد حاجة العالم في عصره الحديث إلى رجل كمحمد يحل مشكلته القائمة العقدة بينما يتناول فنجان القهوة .. صح ؟؟
طيب لو ربنا سبحانه وتعالى فرض علينا وكتب علينا حاجة كده جامدة على نفسنا مفيهاش نعمة ظاهرة لينا .. بالعكس دي حاجة بنكرهها .. زي مثلاُ ما أمر سبحانه وتعالى بني إسرائيل بإنهم يقتلوا انفسهم .... أو أمرنا مثلاً فقال لنا اخرجوا من دياركم .. حنعمل إيه ؟؟ .. حننفذ ولا لأ ؟
مثال تاني ... عارفين الناس اللي كان الإسلام عندهم حلو لما كان صلاة وزكاة وأخلاق كويسة وبس على كده .. فلما كتب عليهم القتال .. زعلوا قوي وقالوا مش لاعبين .. أَلَمْ تَرَ إِلَى الَّذِينَ قِيلَ لَهُمْ كُفُّواْ أَيْدِيَكُمْ وَأَقِيمُواْ الصَّلاَةَ وَآتُواْ الزَّكَاةَ فَلَمَّا كُتِبَ عَلَيْهِمُ الْقِتَالُ إِذَا فَرِيقٌ مِّنْهُمْ يَخْشَوْنَ النَّاسَ كَخَشْيَةِ اللّهِ أَوْ أَشَدَّ خَشْيَةً وَقَالُواْ رَبَّنَا لِمَ كَتَبْتَ عَلَيْنَا الْقِتَالَ لَوْلا أَخَّرْتَنَا إِلَى أَجَلٍ قَرِيبٍ ... هل أحنا من الناس دول ؟؟
طيب بالمرة بقى فكر في الحاجات دي أنت بتعملها في المقام الأول ليه ؟؟
ليه مش بتاكل لحم الخنزير؟ .. عشان فيه دودة شرطية – بفتح الشين - مؤذية والعلم الحديث اثبت كده .. ولا عشان ربنا أمر بكده ولو ربنا أمر إن احنا ناكله .. حناكله حتى لو فيه دودة أمن دول كمان
ليه مش بتشرب خمر؟ .. عشان بتذهب العقل وتؤدي إلى كل الشرور قتل وزنا .. ولا عشان ربنا أمر بكده .. ولو أمرنا نشربها حنشربها
ليه مش بتاكل ربا .. عشان دا ظلم وبيدمر بناء الدولة الاقتصادي .. ولا عشان ربنا أمر بكده
أنتي ليه لابسة الحجاب .. عشان العفة والطهارة وحماية المجتمع وصيانة لنفسك .. ولا عشان ربنا أمر بكده ..
المقام الأول عندك إيه ؟
وقف بقى هنا .. شوية كده .. أرجع لورا.. فكر خمسة .. وجملة مايكروسوفت الشهيرة اللي لزقاها في كل ويندوز .. يالا حنعمل أب ديت لنظام التشغيل

Please sit back and relax while Windows ISLAM installs on your mind

فكر أنت عايز الاسلام ليه .. وارجع لي بعد شوية ..
أسيبك مع أفكارك دلوقت ... سلام

2 comments:

رفقة عمر said...

اخبارك ايه كويس الحمد لله
انا عايزة بعد رضا ربنا ادخل الجنه واكون مع الرسول مش اكتر من كدة

ma 3lina said...

إلى رفقة : حولها ندندن
------- 23/02/2007 07:10 am ------