Monday, February 05, 2007

إحنا والموبايل

والدتي جابت موبايل وقاعدة في الصالة .. وأختي معاها موبايل وقاعدة في أوضتها .. وأنا قاعد في أوضتي معايا موبايل .. أمي بترن على أختي .. وأختي بترد عليها الرنة .. أختي بترن عليا وأنا برد عليها الرنة .. أمي في الصالة بعتت لي رسالة .. وأنا في أوضتي وبعديها بشوية بعتلها رسالة !!! ..
خالي ساكن في الشقة اللي جنبنا على طول ومعاه موبايل وزوجته وهي ربة منزل معاها موبايل وأولاده الثلاثة كل واحد معاه موبايل وبنته الصغيرة 8 سنين .. طلعت من كام يوم ومعاه موبايل كان بتاع أخوها وقالت إنها حتاخده عشان أخوها جاب موبايل جديد ...
البنت الصغيرة قاعدة مع عمتها اللي هي والدتي عشان تعلمها إزاي تجيب النغمات –البنت الصغيرة هي اللي بتعلم العمة مش العكس- ... وبعدها دخلت البنت الصغيرة أوضتي تقول لي هات رقم الموبايل بتاعك عشان لما اشحن نبقى نرن على بعض !!!!.
والدي هو صاحب المبدأ الوحيد في موضوع الموبايل فهو آخر واحد في مصر ممكن يمسك موبايل مهما عمل الناس هو مش حيقلدهم .. ومهما اتكلموا عن أهميته في حياتهم .. هو عارف إيه اللي مهم في حياته .. لو بيوزعوه ببلاش .. برضه مش حياخده .. ولو بيوزعوه ببلاش وفوقيه ألف جنيه .. حياخد الأف جنيه وح يبيع الموبايل. .. كم أحب أصحاب المبادئ

4 comments:

رفقه عمر said...

طبعا الانسان لازم يكون عندة مبدأ بس الموبيل بجد مهم جدا على الاقل بتجيب الانسان لو محتاجه فى اى وقت وبالنسبه للاطفال والموبيل انا برضه ابن اخى عنده موبيل وبرضه ببيقعد يعلم جدته ازاى تجيب نغمات وازاى تغير الشاشه المؤقته انا قعدت فترة بعرف ارد بس او اتصل فين وفين لما عرفت اتعامل معاه

Sokomonoce said...

ممكن يعنى يسلفنى الموبايل وبعدين لما ابيعه اديله تمنه

khaled said...

عجبنى المبدأ ده قوى
دلوقت الاسرة الواحدة تلاقيها ليها ارقام تليفونات اكتر من عدد افرادها و يمكن الشخص الواحد معاه موبايلين و تلاتة
تلاقى الواحد واقف تحت بيته يتصل بمراته علشان تحدفله المنديل بتاعه
الله يرحم
بس ده على حسب ظروف الشخص
ممكن يكون بالنسبة له ضرورى علشان شغله او لظروف السفر او اى حاجة
ابقى سلف الحاج الموبايل بتاعك لما يسافر
:)

ma_3alina said...

إلى خالد :
الحاج يسافر ّ!!!؟؟؟ ... ماافتكرهوش سافر غير مرة واحدة للمصيف وكان مرغما ..
------- 06/02/2007 07:52 am ------

إلى سكومونو :ليك عليا لو وزعوا موبايلات ببلاش يسلفه لك ومش عايز تمنه ..
------ 06/02/2007 07:49 am -------

إلى رفقة :أشكرك مرتين مرة على زيارتك التي تسعدني كثيرا ومرة على اهتمامك بالبوست القديم ورجعت زعلان تاني بسبب الشعر
------ 06/02/2007 07:47 am -------