Saturday, February 17, 2007

واحد شكاك تعمله له إيه ؟؟!

بيقولوا إن مدونة كل واحد مساحة للتعبير عن رأيه وعن شخصيته .. صحيح الكلام ده ؟؟!!!
طيب ح اقول رأيي.. بس مش عايز حد يزعل مني وخصوصاً .... شارم .. الكلام دا مش تجريح في شخصه زي ما قال .. أنا نقلت أمور حصلت فعلاً .. وقلت رأي خاص بي ..
في مرة قبل كده كان معلمنا الكبير خالد عمل بوست عن مواقع تسيء للإسلام .. وكنت صارحته برأيي إن الإيميلات اللي بتوصلنا عن هذه المواقع واللي بتبدأ عادة بجملة تستفزك لزيارة هذه المواقع أولا بتقول ادخلها بنفسك لتتأكد وتنتهي باستفزاز تاني بإنك لازم تنشرها على عشرتاشر واحد تعرفهم وإلا مش بتكون بتحب الله ولا الرسول ولا الإسلام .. صارحت خالد بإن رأيي إن هذه الرسايل ما هي إلا مكيدة لنشر وترويج هذه المواقع بين المسلمين وبيد المسلمين فهي وسيلة آمنة باستغلال عاطفة المحبة ولربما وصلت هذه المواقع لشخص بسيط فيقرأ ما في هذه المواقع من أكاذيب فتزعزع قناعته .. وأن الأولى بمروجي هذه الرسائل إذا جاءهم أمر أن يردوه إلى أولي العلم ليتولوا الرد على ما في هذه المواقع من شبهات ولكن المحبين أذاعوا به ..
والحقيقة أني دائم الشك في كل ما يأتي عن طريق النت .. لأنه مكان مفتوح ويختلط فيه الخير بالشر وإحنا المسلمين عندنا قاعدة اسمها فتبينوا ولا يحل لنا نشر أي كلام وصل إلينا إلا بالتثبت واليقين منه .. سواء كان أمر خير أو شر .. وَإِذَا جَاءَهُمْ أَمْرٌ مِّنَ الأَمْنِ أَوِ الْخَوْفِ أَذَاعُواْ بِهِ ۖ وَلَوْ رَدُّوهُ إِلَى الرَّسُولِ وَإِلَى أُوْلِي الأَمْرِ مِنْهُمْ لَعَلِمَهُ الَّذِينَ يَسْتَنبِطُونَهُ مِنْهُمْ ۗ وَلَوْلاَ فَضْلُ اللّهِ عَلَيْكُمْ وَرَحْمَتُهُ لاَتَّبَعْتُمُ الشَّيْطَانَ إِلاَّ قَلِيلاً .. وكفي بالمرء كذباً ان يحدث بكل ما سمع
المهم .. امبارح برضه .. وأنا ع النت وبتجول في بعض المدونات .. دخلت على مدونة شارم وهو يقول عن نفسه أنه تركي الأصل ولد في مصر ونشأ في السعودية وحالياً يعيش في بور سعيد .. وجدت مدونته تحمل طابع مصري عروبي قومي إسلامي .. فله بوست عبارة عن مجموعة من أحاديث النبي صلى الله عليه وسلم .. ثم نقد لبعض أوضاع بلادنا العربية عموماً .. ثم ذم في الأمريكان .. وذم في كريم .. وأخيراً مقالة تفصيلية وبحث مطول يمدح فيه قدرات الجيش المصري واستعداده لخوض أقوى المعارك
وانهالت عليه الردود لتبارك له على المجهود الطيب الذي بذله في هذا البحث .. وبدأ البعض يوجه له آراءهم بأن ما ذكره في البحث غير صحيح .. حتى قالت له سمراء النيل أنها في نادي الجيش وتعرف الكثير عن حال الجيش فطلب شارم منها أن تتأكد من رتبة عقيد فما فوق عن صحة المعلومات فلبثت قليلاً ثم عادت إليه برأي لواء في الجيش وذكرت اسمه ...
شارم برضه حاطط أكواد كتيرة لنشر البوست وطلب من من يعجبهم المقال نشره وفعلاً ناس قالوا إنهم حيضعوا رابط للبوست والبحث .. وعلى فكرة مدونة شارم تحمل كثير من لوجوهات حملات المدونين ونصرة النبي صلى الله عليه وسلم .. وراديوا سوا
ومرة أخرى أجد نفسي في إطار من الشك والريبة .. ويمكن أكون صح ويمكن أكون غلط .. بعتت لشارم وصارحته أني شاكك في الموضوع وخايف إنه يكون حاجة من اتنين .. يإما جاسوس .. مش شرط لإسرائيل .. ممكن لأي حتة تانية .. وبيحاول يجمع معلومات عن حقيقة جيشنا والتفاف الناس حوله وقناعة ضباطه .. وبياخد المعلومات دي من المدونين زي ما عمل مع سمراء النيل وهي بطيبة عطيته معلومات .. أو بأستاذنا محمد عبد الغفار والأباصيري والناس اللي على قوة الاحتياط - وأنا منهم - اللي حيردوا على مدونته بما رأوه داخل الجيش المصري .. تأكيداً لمحتويات بحثه أو نفياً لها .. و قلت له إنه في هذه الحالة يبقى هو بيحاول نشر البوست في كل حتة عن طريق الكود عشان يدخل على المدونة أكبر عدد ويستقبل أكبر عدد من الردود ... فدا الاحتمال الأول عندي إنه جاسوس وبيحاول يخدعنا بتمثيل إنه محب لمصر وللعروبة وللإسلام واتمنى من كل قلبي أن أكون على خطأ في هذا الظن
والأمر الثاني .. أنه يفعل هذا بحسن نية .. وإني غلطان ومش فهمان حاجة خالص .. وساعتها أرجو إنه يقدر أنا قلت الكلام ده ليه ؟ .. لكن برضه رأيي إن الكلام عن إمكانيات الجيش وقدراته وقناعات أفراده ليس محله المدونات أو الصحف .. ونقد قدرات الجيش إيجابا أو سلباً لا يكون على الملأ ولا يكون إلا عن طريق قنوات رسمية وفي إطار داخلي .. وإلا فسيكون لخدمة أعداء الأمة والمتربصين الذين يستقون معلوماتهم من مصادر عدة منها المدونات ..
ورجوت شارم عدم العودة للحديث عن إمكانيات الجيش مرة أخرى ولا يطلب من أحد تزويده بمعلومات في هذا الموضوع ..
واعتذرت له عن صراحتي أو شكي الدائم .. وقلت له إن اللي يتلسع من الشوربة ينفخ في الزبادي ... وحتى الآن لم أر منه إلا ما يستدعي الريبة .. وأخبرته إني حنقل كلامي له وأضعه في بوست على مدونتي
وكان رده
يا ساتر يا رب .. ايه يا عم الكلام اللى انت بتقوله ده .. طب انا مش عارف اقول ايه ؟
جوايا شتايم بالهبل و عايز اقولك ازاي تكلمنى كده وازاي تدينى الصفة دي وفي نفس الوقت حاسس انك خايف بجد على البلد و راجل وطنى وعشان كده خايف اقولك كلمة تضايقك .. بص انا مش هطول فعلا في الرد عليك
بس انا قلت في الردود كذا مرة انى مش جايب حاجة من عندي .. المصادر زي ما انا اوردتها اهي
وذكر المصادر
لو لقيت كلمة انا كاتبها مش موجودة فيهم ابقى تعالى .. متبقاش تزعل لو مسحت الكومنت بتاعك عشان ضايقنى بجد لانه تجريح في شخصى انا و كان الاجدى انك ترد عن نص الموضوع نفسه لو انت معترض عليه و تقراه للاخر و تفتح عينك للمصادر اللى جايبها هي و لنكاتها في وسط الكلام قبل ما تقول كلام زي ده

6 comments:

Sharm said...

اول واحد يرد عليك اهو

انا بجد فطسان من الضحك
والله ما عارف اقولك ايه

هههههههههههههههههه

شارم بقى جاسوس عشان سيادتك شاكك فيه

يا جدعان بطلوا الفول اللى بتاكلوه ده

انت يابنى كارهنى اوي كده ولا مش لاقي موضوع جديد تكتبه ؟

khaled said...

اخى
اولا اود ان اشكرك كثيرا لوصفى بالمعلم و كذلك لوصفى بالكبير و هذه مجاملة جميلة اسعدتنى و يارب ابقى ربعها حتى
ثانيا
اتذكر كلماتك عن موضوعى سايتات بايظة و اختلافك معى فى عملية النشر دى لكن وضحتلك ساعتها زى ما احنا شاكين ان ده ممكن يكون ترويج للسايتات دى ممكن يكون برضه لو ما حذرناش منها يقع فيها حد ويبقى انا قصرت فى حاجة ما كانتش هتاخد منى وقت ولا مجهود و لا فلوس كل ما هنالك ضغطة زر
ثالثا
اتفق معك كليا على موضوع الحذر عند الكلام عن الجيش و استعداداته و المدونات ليست المجال لمثل هذا الكلام
لان الجيش من المجالات الحيوية و السرية التى لا ينبغى نشرها ولازم نحذر اخواننا من الوقوع فى مثل هذه الفخاخ حرصا على اسرارنا و امننا لانه فى الدرجة الاولى
و اشكرك على طريقة تفكيرك والحذر ده مطلوب
وخصوصا فى موضوع الامن
بس فيه حاجة اهم من كده وهو الكلام فى الدين و نقل اخاديث الرسول صلى الله عليه و سلم دون التأكد من صحتها لأن هذا ممكن ان ينتشر حديث ضعيف بين الناس و يصدقوه
مثال
ان ابغض الحلال عند الله الطلاق
حديث ضعيف و الكل بينقله و بنسمعه فى الافلام و المسلسلات لكن لو الناس اتأكدت من صحت ما كانش حديث زى كده انتشر و ازاى حاجة ربنا حللها تيقى بغيضة عنده؟

Mohamed A. Ghaffar said...
This comment has been removed by the author.
Mohamed A. Ghaffar said...

أنا لغيت التعليق عشان كان فى غلط فى الكلام كالمعتاد

فعرض النبى بلاش استاذ دى عشان انا اخيب من انى اكون استاذ لأى حد

الحقيقه انا اشك مثلك فى كل ما يأتى على النت ويمكن اكثر ، والكم الهائل للمعلومات المنشورة أثار حفيظتى

فضلاً عن اوضاع الجيش التى اعلمها بحكم خدمتى فيه وتنافى كل ما كتب شارم وقد اشرت الى هذا فى تعليقى عليه ليس لأعطائه معلومات كما تظن

وانا نشرت الكود تحت سؤال أحق هو؟ للأستبيان

اماالدفع بأنه جاسوس فغير مستبعد من منطلق ان انا او انت او هو يكون جاسوس او امن دوله او اى شئ انما من منطلق ان يكون مهمته قياس التفاف الناس فلا اميل له (رأى شخصى) لأن المدونات ليس المكان الصحيح لذلك

ان كان غاوى شهره وفرقعه وتعليقات وزوار ، هو حر فى دى بقى وان كان يستحق ان يكون مدون فسيبقى وان كان لا يستحق فسيسقط سريعاً فلا تقلق

أما المجهود الذى صنعه حتى لو كان بغرض ما فهو حقيقه يستحق التحيه على اصراره وصبره

ونصيحه اخويه عامه فى الحياه أن جاز لى النصح :
ان ساورتك الشكوك حول امر ما او شخص ما فلا تجاهر بشكوكك الا لخصوص الخصوص حتى تتبين الحقيقة وذلك حتى لا تقع تحت طائلة أثم بعض الظن وتجريح من قد يكون، فضلاً عن انه لو كانت شكوكك فى محلها فسيحطات لك ويصعب عليك امره ، فأن كنت لا تستطيع مجاراته حتى تتبين فعلى الأقل احتفظ بشكوكك لنفسك

رفقه عمر said...

انا اول مرة بصراحه اعترض على بوست تعمله بس عارف لازم نحسن الظن بالناس الرسول صلى الله عليه وسلم كان يعلم ان عبدالله ابن سلول منافق ولكنه لم يذكر له ذلك ولا لاصحابه وايضا فى غزوة تبوك تخلف ناس كتير ولم يقل الصدق الا ثلاثه فقط وهم الذين ذكرهم الله فى القران الباقى كلهم كذبوا والرسول تركهم وكذبهم وحسابهم عند الله اما الذين قالوا الصدق تركهم الرسول حتى ينزل الله فيهم قرانا واكيد انت عارف القصه يمكن شارم نيته انه يغيظ الاعداء بهذا البوست يمكن عايز يرفه روحنا المعنويه يمكن حب يعمل حاجه جديدة وعلى فكرة يعنى مافيش جاسوس ممكن يكشف عن نفسه كدة لانى متأكدة ان كل المدونات بتتراقب يعنى مش هايودى نفسه فى داهيه انا عارفه انك نيتك خير وكويس انك فتحت الموضوع علشان شارم يوضح لك وجه نظره وياريت شارم يعتبر دة مجرد نقاش لمعرفه حقيقه الامر ولا يعتبره عداء شخصى

حسن محمود said...

ياسيدى الفاضل
كل المعلومات اللى هو قالها مش بالسرية اللى انت متخيلها
انت لو دخلت مجلات عسكرية هاتلقيها كاتبه بتفصيل أكتر من اللى هو كاتبه
ده حتى على الويكيبيديا
http://en.wikipedia.org/wiki/Military_of_Egypt
هاتلاقى معلومات
يابنى ماحنا بنجيب الاسلحة من الغرب
هانخبى ايه بقى؟
أنما السيد المحترم شرم مايقدرش يجيب التطوير اللى بيحصل على الاسلحة
اذا كان بيحصل تطوير يعنى

زى ما الأخ محمد عبد الغفار قالك والاخت رفقة
خليك حسن الظن
نسيت أقولك صحيح الحكومة المصرية مراقبة كل المواقع
يعنى ماتقلقش
بس أوعى تتهمنى انى شغال للحكومة
بس والله ضحكتنى
سلام