Sunday, February 04, 2007

الخواجة الامريكانى

الخواجه الامريكانى والسماسرة اللى وراه
تخنوا بالكدب ودنه وعرضوا له مقاس قفاه
فهموه من غير ما يفهم
ان سوق الشرق مغنم
والخواجه بطبعه مغشم
والمصاري معفرتاه
حب يعمل فيها تاجر
وانطلق يسلب وينهب
ف الزباين بالنهار
يحدف الدولار يلمه تلتميت مليون دولار
بالقزايز والبنات
باللبان والبمبونات
بالمدافع والدانات
او بأفلام الرعاة
قول بقي ... تااااااااجر وفاجر
وانفلت لص المواشي رعب ماشي فى البلاد
يشفط البترول ويطرش كل الوان الفساد
طايح يموت من غير فرامل
يقلب العرسان أرامل
حتى فى بطون الحوامل كان بيدبح الحياة
بالسناكي والخناجر
والنهايه يا خواجه .. مش ف يوم كانت بدايه ؟
البدايه برضه لازم ييجي يوم توصل نهايه
مهما زاد الراسمال الهلاك هو المآل
والتاريخ هو اللى قال
لعبه الموت فى الحياة .. تسحب الروح م الحناجر

أحمد فؤاد نجم .. كتبها من زمااااااااان

7 comments:

رفقة عمر said...

جميله قوى انا اصلا بحب اشعار احمد فؤاد نجم اختيارك موفق ليها

Memo said...

حلوه طحن ايه يا بت انتي جبتيها منين دي دانتي طلعتي اروبه
بس بجد الراجل ده انا مستغربه ازاي سيبينه ربنا يستر علا ولايانا
و متكرين على الحجات الحلوه دي
تحياتشي

مـحـمـد مـفـيـد said...

الله علي نجم
والله علي الاختيار

Anonymous said...

كتبها نجم ولا تعليق وفي اغنيه زيها اسمها ابن مريكا لمحمد منير برضه روعة

khaled said...

قمان
حاجة حلوة جوى

رفقة عمر said...

انا فعلامش بحب الشعر علشان مش بفهمه نهائى بس احمد فؤاد نجم كلماته سهله ومش محتاجه اى صعوبه لفهمها يعنى هو بيكتب للناس العاميه زى كدة وكمان انا احب اى حاجه تتكلم بطريقه شعبيه بتعبر عن الناس عموما

ma 3lina said...

إلى مملكة المتشردين :زعيم مملكة المتشردين عندنا يا مرحبا يا مرحبا .. أشكرك جدا على تعليقك .. بس معلش بقى أنا مش سميع
------ 05/02/2007 08:05 am -------

إلى محمد مفيد :أستاذنا أبو عبد الله .. لك في مدونتي منزلة رفيعة ..مرحبا بك دائما
------ 05/02/2007 08:00 am -------

إلى ميمو :بت إيه وأروبة إيه يا طنط .. أهو لسانك دا اللي بيخليك تاخدي كل علقة والتانية .. دكر .. دكر .. دكر
------ 04/02/2007 11:36 pm -------

إلى رفقة :الحمد لله إنها عجبتك .. دا انا زعلت قوي لما عرفت إنك مش بتحبي الشعر
------ 04/02/2007 11:33 pm -------