Monday, February 26, 2007

الست أم زرع وصلت

مش فيه ناس بيقولوا عليا إني سيء الظن .. آمممممممم .. ماشي ..
بالمرة بقى .. ما دام أنا سيء الظن .. فخدوا بالكم من الست اللي اسمها أم زرع دي .. لأني شاكك بصراحة في نواياها .. أنا حقول الكلمتين اللي هي قالتهم وبعد كده في مرة جاية إن شاء الله .. حبقى أقول ليه قلت الحكاية بتاعة قعدة الستات دي .. وليه أنا شاكك في نوايا الست أم زرع ..

الست أم زرع قالت : أنا جوزي اسمه أبو زرع .. انتوا عايزين تعرفوا أبو زرع .. أنا مقدرش أختصر أبو زرع في موقف أو في كلمة .. فمعلش أنا ححكي الحكاية كلها ..
انتوا شايفين دلوقت وداني مدلدلة من الذهب اللي هو مغرقني فيه وشايفني إزاي أنا متختخة ومكلبظة من العز .. لكن الحقيقة إني كنت قبل ما اتجوزه مسلوعة زي بنات اليومين دول - الحتة دي من عندي على فكرة - وعايشة في بيت زي الجحر .. عشة ... مع أهلي الفقرا الغلبانين .. فأخدني فقيرة من بيت أهلي وخلاني في بيته أميرة ... من الناس أصحاب الأملاك .. هو اللي خلاني في العز ده .. وبعد ما كنت باكل أي حاجة واللي موجود يسد .. وأي حاجة تقضي .. دلوقت بقيت باكل أحسن أكل .. واشرب أحسن شرب ..
قعد يدلع فيا وينفخ فيا ويطلعني السما ويقول عليا كلام وأوصاف من نوعية إنتي ست الستات وأنت أجمل ست في الدنيا وهم الستات دول يجوا جنبك إيه ... لغاية ما صدقت وبقيت فعلاً متهيألي إني ملكة جمال وست الستات.
لما اتكلم الكل يسمعني ويقدر كلامي وهو أولهم وعمره ما يقول إيه اللي أنتي بتقوليه ده .. ولا أنتي اتهبلتي ولا الكلام الفارغ بتاع الاجواز ده .. ولما أجي أشرب اشرب بدلع .. ويقعد يتحايل عليا .. ولما انام ما اصحاش قبل الظهر .. مش بيصحيني بدري أحضر له الأكل والشرب .. وانضف البيت والكلام ده.. لا ... يسبني نايمة لغاية ما اقوم براحتي .. ماهو عندنا خدامين كتير هو جايبهم لي عشان يريحني ..
ولا حماتي ... ياعيني على حماتي .. بيتها واسع جداً عشان تستقبل الستات وعندها شنطة فيها .. لا .. مش وزة وبطة .. لا ... شنطة مليانة خيرات توزع على كل الناس .. بصراحة ست كمل .. وخيرها مغرق الكل
ولا تربيته للعيال .. أقول لكم إيه !!!
الواد ابنه .. واد شياكة كده .. راجل ... ياكل أقل أكل وينام في أي حتة ..
والبنت بنته .. بنت مؤدبة تسمع كلام أبوها وأمها دا غير جمالها ودلالها ملو هدومها مش مسلوعة زي بنات اليومين دول - برضه من عندي - .. عشان كده كايدة العوازل على طول
الخدامة بتاعتنا اتعلمت في بيته الأدب والأخلاق .. أكيد منه.. فبقت أحسن خدامة .. لا تسيب البيت من غير تنضيف ولا تضيع خزين البيت في كلام فارغ ولا تروح تطلع أسرارنا بره .

طبعاً مستغربين .. إني بتكلم على واحد اسمه أبو زرع مع إن جوزي ما اسمهوش أبو زرع ..

أه .. اشرح لكم .. أبو زرع دا يبقى جوزي الأولاني .. اصله .. طلقني .. طلقني ليه ؟؟؟

أبداً .. كان طالع في مرة الصبح بدري .. فقابل واحدة ست تانية عجبته فطلقني واتجوزها هي .. حقه هو ما عملش حاجة غلط ..

المهم بعديها اتجوزت جوزي الحالي .. ودا راجل غني برضه جداً .. بيركب أحسن ركوبة .. وعنده أحسن الحاجات وكان من كرم أخلاقه .. كل ما يطلع حاجة لبيتنا .. يطلع قصادها حاجة لبيت أهلي ..

ليه أنا اتكلمت على أبو زرع في الأول ؟؟ ...
لأن الحقيقة إن جوزي دلوقت مهما عمل معايا حاجة كويسة .. ضفر أبو زرع برقبته

11 comments:

الزعيـمة said...

معلش يا ماعلينا انت كتبت
*****************************
أنا ححكي القصة والي يحب يرجع للوثيقة حيلاقيها في كتب كتيرة زي صحيح البخاري وفقه السنة
************************

بجد القصة دي موجوده فيهم؟
صحيح انا اي حاجة حتي لو فى الكتب دي
مش بصدقها على طول الا لما اوزنها شوية
ودا لان الاسرائيليات مالية الكتب دي
لكن قبل ما اعلق على الموضوع
حسيت بصراحه انى بسمع لستات
اعدين فى نادي الشمس بيشربوا كابتشينو

حائر في دنيا الله said...

هي بالفعل قصة حدثت, سمعتها السيدة عائسة وقصتها على الرسول وهي مذكورة بالفعل في صحيح البخاري
ولكن بالطبع ليست بألفاظ "ماعلينا" إطلاقاً

المهم بقه ما علينا فبتفسير ذكوري بحت أن النساء لا يعجبهن العجب ولا حتى زواج رجل أفضل من أبو زرع

مع تحياتي

رفقة عمر said...

ايه دة الست دى محظوظه كدة ليه كل واحد اتجوزته احسن من الاول هو كدة فيه ناس كدة محظوظه على طول

BinO said...

الأخ ماعلينا
لأجل هذا طلبت منك ذكر القصة بألفظها كما روتها السيدة عائشة رضي الله عنها ومكا هي مذكورة في صحيح البخاري حتي لا يحدث لبس لدي من يقرأها

الزعيمة
أنت أول واحدة تقول أن الكتب زي صحيح البخاري ومسلم و غيرها ممتلئة بالأسرائليات
أنت جبتي الكلام ده منين يا بنتي
واضح أنك ما بتقرأيش خالص بس بلاش نردد كلام بدون علم عشان الأمور متتخلطش

Memo said...

ازاي كدا الصحيحين مليانين اسرائليات ؟؟
ده منين الكلام ده
انتبو مبتقروش كتب و لا ايه
يا جماعه مع الاحترام للاراء بس يا ريت نقرا ابل ما ندي راي فقهي كفته زي دا
هههههههههه
تحياتشيييييييييي

Unknown said...

هههههههههههه
راعوا شعور البنات حرام عليكوا
جوزين احسن من بعض والبنات مش لاقين حزمة بقدونس حتى
:D

None said...
This comment has been removed by the author.
رفقة عمر said...

على فكرة انت ليه اخترت الجانب المادى بس ليه ما مش اخدت الجوانب التانيه انه بيدعلها وبقول لها كلام كويس والكلام التانى اللى انت كاتبه فيه رجل اصلا دلوقتى بيفتكر حتى يقول لمراته شكرا الانادرا جدا

BinO said...

سلامو عليكو
ماعلينا ماعلينا
مش عارف أأولك أيه يا أخويا
بس
مش عارف خايف تزعل مني
ولكن رسول الله صلي الله عليه و سلم قال
بعثت لأتمم مكارم الأخلاق

BinO said...

أعتذر لك أخي
فأدبك الجم ألجم لساني
ممكن نكون نعرف بعض
مين عارف
:)

ma 3lina said...

إلى رفقة : عشان الراجل التاني .. ما دلعش .. وبرضه اعتبرتوها محظوظة
------- 27/02/2007 06:50 am ------

إلى fnan_geology : ربنا ينصر جميع المقهورين .. ويجزيك خير على مساعدتك لإخوانك
------ 27/02/2007 06:18 am -------

إلى إنسانة : إنتي كمان عايزة واحد غني .. ماهو طلقها في الآخر .. وبعدين مرة عايزة حزمة بقدونس .. ومرة

حزمة فجل في بوستك عادي خاااااالص دي جوازة ولا حلة محشي
------ 27/02/2007 06:10 am -------

إلى ميمو : يا سيدي .. يا سيدي ع الثقافة .. معاك حق .. بس إيه حكاية الكفتة والأكل معاك .. ونزلت من فوق

الدولاب ولا لسه
------ 27/02/2007 06:10 am -------

إلى بينو : أين طلبك المذكور .. انا مش لاقيه عموماً أنا لم أرو الحديث وإنما ذكرت القصة .. وكان ممكن أضع الرابط

وأريح دماغي بدل ما اذكر ألفاظ الحديث الصعبة .. على فكرة حاسس إن احنا نعرف بعض من قبل موضوع

المدونات
------ 27/02/2007 06:06 am -------

إلى رفقة : حتى أنت ياأحلام .. الست المحظوظة عندك هي اللي تتجوز واحد غني .. يعني الغلابة زينا يروحوا

يستوردوا ستات من الصين
------- 27/02/2007 06:00 am ------

إلى حائر في دنيا الله : الحديث فعلا في البخاري وأنا ذكرت المصادر .. وبالنسبة لموضوع الستات .. اصبر عليا

في دماغي كام فكرة عنهم .. بس إيه ضربة قاضية .. شرفتني بالزيارة
------- 27/02/2007 05:58 am ------

إلى الزعيمة : فعلاً فعلاً .. أنا سعيد جداً بزيارتك .. شرفت المدونة واعتذر لك بشدة .. وبوست انهاردة إهداء مني

لك
------- 27/02/2007 05:54 am ------