لا عاصم اليوم من أمر الله

الميزة الكبرى في التدوين – في رأيي – هي نفسها أسوأ ما في التدوين .. وهو التعرف على الناس .. فالتعرف على أشخاص وأفكار في عالم التدوين ليس له حدود .. يمكنك أن تقابل من لن يمكن أن تقابله في الواقع .. والشخص الذي تحتاج لسنين في الواقع لمعرفة حقيقته .. لن يتجاوز الأمر في عالم التدوين بضعة بوستات في الغالب لتتعرف على حقيقة شخصيته اعتماداً على فكرة التدوين الرئيسية وهي التعبير عن الذات ..فكل مدونة انعكاس لشخصية صاحب المدونة دون تزييف للحقيقية. وهي الميزة والعيب لأنك تتعرف على أشخاص مميزين وأشخاص معيبين .. كلهم في نفس البحر .. وكل قد ركب سفينته ومعه آخرون يموجون على صفحات هذا البحر .. لذلك إذا دخلت عالم التدوين فمن المؤكد ونظراً لاتساع هذا البحر ..أنك ستجد مدونين ينهجون نفس منهجك ويسيرون في نفس اتجاهك .. ومن المؤكد أيضاً أنك ستقابل أفراد على النقيض تماماً مما تؤمن به يسيرون في الاتجاه المعاكس .. وبين هذا وذاك ستجد أشكال وألوان من التباين في الاتجاهات مما تتفق في أجزاء منها مع صاحبها أو تختلف .. فطبيعي لمن دخل هذا البحر أن ينتظر أن تهاجمه السفن الأخرى فالسفن تريد مساحة للانتقال بحرية .. وأنت وسفينتك ولو كانت صغيرة بالنسبة لهم تستغلون البحر لأنفسكم ولابد من إزاحتكم .. حتى لو كنت تقف أنت ومن معك على خشبة صغيرة طافية على سطح البحر وليس على قارب أو سفينة فإذا دخلت عالم التدوين فمن المؤكد أنك ستجد على الأٌقل بضعة أفراد يقفون معك على نفس الخشبة يبذلون معاً لتسير خشبتهم الطافية .. ومن المؤكد أيضاً انك ستجد سفن محملة بالكثير تتوجه لخشبتكم موجهة رءوس مدافعها لكم تزعم كل المزاعم لإسقاطكم .. وفي وسط هذا الصراع أنت تقف تبتسم وتستمع باللعبة ولا تعبأ بما يحدث طالماً تجد في وقفتك البسيطة ما يرضيك ويرضي من حولك .. وتأمل أن يصبح اللوح الخشبي يوماً سفينة نوح .. وأنت على هذا الحال من الرضا وقد آمنت مع إخوانك إلا من الآخرين .. تجدف وترمي من يرميكم فتصيب مرة وتخطأ أخرى ... وبينما أنت على هذا الحال يلتفت إليك أحد إخوانك على اللوح الطافي ويصرخ فيك مالك تجدف ببطأ ؟؟!! مالك ترمي فتخطأ ؟؟!! .. ثم يدفعك بيده لتسقط في البحر .. وهو راضي أن صنيعه هذا هو التصرف الأمثل وأنه لم يظلمك .. وأن هذا الجزاء هو عين ما تستحق .. تطفو الآن وحدك في مياه البحر والماء يصل إلى منكبيك والأفكار قد أغرقتك .. ما الذي حدث ؟؟ ولماذا حدث ؟؟.. ماذا أفعل ؟؟!! هل استحق هذا الجزاء ؟؟ هل أعود إلى اللوح الخشبي .. اعتذر عن شيء لم أفعله .. ولا اضمن أني لا أفعله مرة أخرى ... هل أنا الظالم أم أنا المظلوم ؟ هل أهجر الجميع من أجل شخص واحد .. ؟؟ فلا تجد بد من أن تسبح وحيداً .. بعيداً .. حتى تخرج من دائرة الأنظار .. تلملم شتات نفسك لينساك الجميع ..

أبو لهب المصري

الحزب الوطني دا بيفكرني بأبي لهب في سوء التصرف وإضاعة الفرص .. النبي صلى الله عليه وسلم لما نزلت عليه سورة المسد وفيها تبت يدا أبي لهب وذكر مآل أبي لهب وامرأته إلي النار.. كان من الممكن لأبي لهب يعمل حركة مراوغة والتفاف .. إنه يعلن إسلامه أمام العرب كلهم ويكون في هذه الحالة قد اثبت للسذج أن دعوة محمد غير صحيحة لأنه زعم أن أبا لهب يدخل النار برغم أنه قد آمن .. طبعاً خدعته ساعتها لن تنطلي على المؤمنين لأنهم سيكذبون ما تراه أعينهم من ظاهر إيمان إبي لهب ويصدقوا قول الله عز وجل فيه .. لكن الأكيد أن الخدعة ستنطلي على عامة العرب وضعاف الإيمان .. وسيتساءلون .. كيف يعد محمد كل مسلم بالجنة وها هو عمه قد أسلم ويعده بالنار .. كان يمكن لأبي لهب أن يحدث هذه الرجة والاختلاف والشك في صفوف المسلمين بكذبة واحدة يدعي فيها أنه غير ما يخبر به النبي صلى الله عليه وسلم .. وله أن يعود بعد ذلك عن إسلامه .. ولكن في فترة أدائه للمراوغة سيكون قد أدى المهمة بزرع الشك في قلوب المسلمين .. لكنه لم يفعل الحزب الوطني نفس الحكاية له نفس الفرصة .. لكنه بغبائه بيضيعها .. ممكن برضه يعمل مناورة والتفاف حول مزاعم المعارضة ومخاوف أمريكا من تغيير إرادة الناخبين بإنه يمشي الاستفتاء بنزاهة ويطلع النتيجة إن الشعب رفض التعديلات.. ويا سلااااااام .. يبقى كده ضرب كذا عصفور بحجر اثبت إن مشاركة الشعب إيجابية وإنه مش بيمرر اللي على مزاجه وإن انتخاباته حرة ونزيهة .. والأقوى من كده إنه حيضرب المعارضة ببعض ويثبت للكل ديمقراطية النظام .. وتطلع كل الأصوات التي دعت للمقاطعة أصوات ظالمة ويظهر الحزب الوطني في مظهر الحمل الوديع المظلوم المفترى عليه وبالنسبة للتعديلات فسهلة لأنها ستعود وقتها لمجلس الشعب ليعاد صياغتها وتطرح مرة أخرى وساعتها ممكن ترجع ريما لعادتها القديمة ويزوروها .. لكن ساعتها ما حدش حيقدر يقول إن الاستفتاء مزور .. لكن الغباء له ناسه

مش رايحين

قاطع مش رايحين حتى لو استفزونا وقالوا لنا إن المقاطعة سلبية .. حنقول لهم لا .. مش حتضحكوا علينا .. مش حتستغلوا إن إحنا عندنا الحاجات اللي مش عندكم .. الضمير وحب البلد دي .. فحتضحكوا علينا بيها وتستغلونا لمصلحتكم مش رايحين حتى ولو طلع شيخ الحكومة وقال إن المقاطعة كتمان للشهادة .. لا ياعم الشيخ .. إحنا عارفين ديننا كويس .. ديننا بيقول لنا لست بالخب ولا الخب يخدعني .. ديننا بيقول لنا لا يلدغ مؤمن من جحر مرتين .. وشهادتنا أهي بنقولها .. مش رايحين لعبة الحزب الوطني مش رايحين عشان الحكومة والمجلس اللي عمل التعديلات جهات غير شرعية .. وعشان صناديقكم بايظة مش بتقبل غير موافق .. بتحولها كلها لـ موافق .. وكمان عشان تعديلاتكم لمصلحتكم أنتم مش لمصلحة البلد وأحنا بنرفضها .. مش حنشارك في تمثيليتكم قدام العالم إن فيه حرية في مصر مش رايحين .. عشان بنكرهكم وبنحب مصر هو أنا عمال انتع في قلبي 3 بوستات ودا الرابع لييييه ؟؟ حرام عليكم اسمعوا الكلام بقى جبتوا لي الضغط .. .. دا أنا بتحايل عليكم ... وجايبلكم أفلام وصور وشعر وتاريخ وسعد سعد يحيا سعد .. هو يعني الذوق ما ينفعش طيب ماشي ميمو .. مفيش نزول انهاردة ومن سكات اطلعي فوق الدولاب .. وأنا حكلم الحاج دلوقتي عشان يقعد بالكرسي تحت الدولاب ... ألو ... أيوه يا حااج ...... أماني بنت الجنوب الصعيدية .. لو ادليتي من دارك حنطخك بالبندقة اعيارين .. ما عندناش حريم يروحوا يلعبوا مع الحزب الوطني .. ناولني ياولد الفرفر بينو .. شوف شغلك وأنت ساكت ولو فكرت تهوب ناحية السفارة أو القنصلية أنت حر بقى .. شوف عينة من اللي ممكن يحصل وخد بالك على نفسك .. ألو أيوه ياباشمهندس جابر .. أنت عارف بينوا بيعمل إيه هناك ؟؟ .... ... ... عارف مين اللي وقع البرجين بتوع أمريكا ؟؟؟ .... دكتورة فضفضة .. فاكرة الراجل بتاع الحي .. يعني نتصل بيه دلوقتي ونقول الصيدلية دي بتبيع حقن بانجو ؟؟ .. خليكي في الصيدلية من سكات أحسن الصارم الحاسم .. مصمم تروح ؟؟؟ مااااشي .. ألو يا أستاذ عمرو .. حضرتك عارف الصارم .. دا مرشد .. مخبر يعني .. عمال يقولك تعال تعال عشان يقبض الأبيج .. خلي بالك منه ؟؟ جري إيه هو أنا حنده على واحد واحد باسمه .. حتحايل عليكم ولا إيه ؟؟ .. ما تسمعوا بقى الكلام واقفوا كلكم وقفة واحدة مع بعض ما توجعوش قلبي معاكم ... يالا كل واحد يروح ع المدونة بتاعته وإياك حد يتحرك ولا اشوفه بيخرج من مدونته ولا الاقيه مهوب ناحية صناديقهم .. هو انا مش حعرف امش كلامي في النت ده ولا إيه ؟؟!!!! وآآآآآدي قعدة أهي لما نشوف آخرتها ... واللي يفوت يموت

والتالتة .. لا أحنا هما ولا هما إحنا

عايز تعرف تروح الاستفتاء وتقول مش موافق .. ولا ما تروحش أصلا .. الموضوع بسيط جداً .. حقول لك .. هما – العصابة - عايزينك تروح وتقول اللي أنت عايزه .. مش مهم موافق أو مش موافق .. ما هي مش حتفرق معاهم عشان حيطبخوها زي كل مرة .. اما إحنا – الغلابة - مش عايزينك تروح .. اختر انت بقى وشوف أنت مع مين ؟؟ إحنا الغلابة (ماتروحش) هما العصابة (روووووووح) الإخـوان المسلمين – حركة كفـاية – التيــارات السلفــية – المعـــــارضة – أ. محمد عبد الغفار - الشارع اليائس البائس المحبط الرياسة والحكومة والحزب الوطني والصحف القومية فكر بلاش ... الخطوة دي ما تخطيهاش هما عايزينك تروح عشان يبان في الصورة إن فيه ناس رايحة الاستفتاء وناس جاية من الاستفتاء وناس معترضة وناس موافقة .. عايزينا خيالات مآتة وديكور .. عايزنا كومبارس وموديلز ... إحنا مش عايزينك تروح عشان القائم على الاستفتاء جهة مزورة وغير شرعية ووصلت بالتزوير .. صوتك وأنت بتقول لا أوافق في صناديقهم بيتحول فجأة لـ أوافق .. ويبقى استفادوا كمان واحد زيادة قدام الكاميرات ما دفعولهوش عشان يحضر ولا أجبروه إنه يحضر .. يا بلاااااش (الفقرة التالية أضيفت بناء على فرمان ميماوي رقم 672145 لسنة 2007) أمير الشعراء أحمد بك شوقي كان بيقول في القصيدة اللي خدناها كلنا في المدرسة زمان في ثانوي في كتاب شوقي لعميد اللغة العربية شوقي ضيف رحمه الله : برز الثعلب يوما في شعار الواعظينا فمشى في الارض يهذي ويسب الماكرينا ويقول الحمد لله إله العالمينا ياعباد الله توبوا فهو كهف التائبينا وازهدوا في الطير إن العيش عيش الزاهدينا واطلبوا الديك يؤذن لصلاة الصبح فينا فاتى الديك رسول من إمام الناسكينا عرض الأمر عليه وهو يرجو أن يلينا فاجاب الديك عذرا ياأضل المهتدينا بلغ الثعلب عني عن جدودي الصالحينا عن ذوي التيجان ممن دخل البطن اللعينا انهم قالوا وخير القول قول العارفينا مخطىء من ظن يوما أن للثعلب دينا مخطىء من ظن يوما أن للثعلب دينا مخطىء من ظن يوما أن للثعلب دينا ميمو : طبعاً ديننا ما فيهوش سلبية .. بس مين اللي قال إن المقاطعة سلبية ... هما اللي قالوا كده عشان عارفين إن احنا عندنا ضمير .. بيتكوا على إيدنا اللي بتوجعنا .. خداع برضه .. والسلبية إن احنا نستسلم للخداع ده .. وهو يعني لو روحتي واعتقلوا حد بعديها حتبقي ريحتي ضميرك ؟؟!!! وعلى فكرة الاستفتاء بالبطاقات الشخصية مش الانتخابية .. اسمعي الكلام ما تروحيش برضه عشانها بلدنا .. قاطعي عشان احنا مش بنبص تحت رجلينا بنبص لقدام

والتانية ... إحنا الغلابة

أيوه إحنا الغلابة اللي بندي الشرعية .. هو يعني إيه شرعية ؟؟؟ في سنة 1919 طلب سعد زغلول من سلطة الاحتلال البريطاني في مصر الأذن للذهاب لمؤتمر الصلح بعد الحرب العالمية الأولى والمنعقد في 28 يونيو 1919 بباريس للمطالبة باستقلال البلاد فرفضت بريطانيا وقامت بنفي سعد زغلول إلى جزيرة مالطة وبعد نفي سعد زغلول ورفاقه .. خرجت جموع المصريين لتعلن غضبها من نفي سعد زغلول وكانت هذه الغضبة بمثابة الشرعية له ولرفاقه ليكون المتحدث الرسمي باسم الشعب المصري .. وتحت ضغط الثورة العارمة اضطرت قوات الاحتلال للإفراج عن سعد والسماح له بتشكيل ما عرف بالوفد المصري لتتحدث باسم جموع المصريين في مؤتمر باريس .. وكانت لجنة سعد عندها تستمد شرعيتها مباشرة من الشعب المصري وبينما سعد في باريس في أكتوبر 1919 أعلنت بريطانيا عن عزمها إرسال لجنة برئاسة اللورد ملنر وزير المستعمرات البريطانية لبحث المطالب المصرية .. اتذكر شرح استاذ عثمان مدرس الدراسات الاجتماعية لنا في المدرسة الإعدادية وهو يشرح لنا مقصد هذه اللجنة في نزع الشرعية التي اكسبها الشعب للجنة سعد .. كان بيقول لنا استاذ عثمان .. لو الشعب أو الحكومة برئاسة محمد سعيد باشا رئيس الوزراء اتعاملت مع اللجنة دي يبقى سعد مش المتحدث الرسمي باسم المصريين ويبقى هناك جهة تانية شرعية هي اللي بتعرض مطالب المصريين وهي جهة الحكومة لتصبح الجهة الشرعية المخولة لها الحديث باسم المصريين .. والشعب المصري كان من الوعي والذكاء من زمان مش زي ما بيزعم أشاوس الحزب الوطني .. من امثال نظيف لما قال إن الشعب المصرى يحتاج إلى قدر أكبر من النضج حتى يتسنى له ممارسة الديمقراطية الشعب المصري فطن للمكيدة البريطانية .. ورفض التعامل مع لجنة ملنر وأعلن سعد زغلول من باريس مقاطعتها، وهبت الأمة بكاملها إلي مقاطعة اللجنة. وطلب محمد سعيد باشا رئيس الوزراء عدم مجيء اللجنة وإلا فإنه سيستقيل وفعلاً استقال سعيد باشا. جميع طوائف الشعب قاطعت لجنة ملنر وأعلنت أن لجنة سعد هي الوحيدة التي لها الشرعية للحديث باسم المصريين ويتندر المصريون بالحكاية ان لجنة ملنر كانت تسال احد الفلاحين .. فكان يجيب على كل سؤال بقوله : اسأل سعد باشا .. حتى لما سألوه عن شيء في الزراعة قال : اسأل سعد باشا .. وفيه حكاية تانية انهم سألوا أحد الباعة الجائلين عن سعر بضاعته فأجابهم : اسألوا سعد باشا هي دي الشرعية .. شرعية السلطة المستمدة من الشعب .. مش من انقلاب الجيش ولا تزييف الانتخابات ولا الوراثة .. والجهات التي تصل للحكم بهذه الوسائل جهات غير شرعية .. وغير مخول ليها أنها تقيم تعديلات دستورية ولا ترعي نظام يكون فيه للمعارضة صوت السلطة الشرعية فقط هي اللي ليه الحق في إقامة حياة برلمانية والدعوة لانتخابات أو استفتاء أو تعديل دستور .. ولها الحق أن تطالب الشعب الذي أعطاها هذه السلطة ليذهب ليدلي بصوته فيما تدعو إليه .. أما الإقبال على صناديق اقتراع جهات غير شرعية بعيدة كل البعد عن مطالب الناس هو عبث وتهريج .. والمشاركة في عملية تديرها جماعة الحزب الوطني هو مشاركة في عملية خداع العالم وإيهامه أن في مصر عملية ديمقراطية تمارس فيه المعارضة دورها بكل حرية .. يزعمون أن مقاطعة الاستفتاء والانتخابات عموما .. سلبية ... كذلك زعموا وقتها أن مقاطعة الشعب المصري للجنة ملنر سلبية تضر بمصلحة الوطن لكن كان للتاريخ رأي آخر قال أن المقاطعة عمل إيجابي ووعي كامل لأنها أصبغت الوفد المصري في باريس صفة الشرعية ونزعت الشرعية من غيره ومقاطعة استفتاءات الحزب الوطني وانتخاباته المزعومة عمل إيجابي يظهر أمام العالم أن هذه الحكومة لا تحكم إلا نفسها ولا تمثل إلا نفسها الاستفتاء اللي جاي حيتزور زي ما انتخابات مجلس الشعب اللي قبليه اتزورت وزي انتخابات رئاسة الجمهورية اللي قبليها اتزورت .. وزي ما الاستفتاء اللي قبليه اتزور ... هي دي الإيجابية ؟؟؟ .. إني ادخل ارفع نسبة التصويت في انتخابات تشرف عليها وتديرها جهات غير شرعية هم لا ينتظروا رأي الشعب فالنتيجة محسومة .. ولكن يريدوا تصوير العملية للعالم وكأن ما يحدث هو استفتاء نزيه .. ويستغلونا لذلك ... إلى الزاعمين بأن المقاطعة سلبية .. لا يلدغ مؤمن من جحر مرتين .. ما بالكم تلدغون مرات عديدة ولا تبالون قاطع الشعب المصري لجنة ملنر وحتى حفلات العشاء التي كان يقيمها المعتمد البريطاني تمت مقاطعتها تماما من السياسيين الذين حددوا أيضا الزعيم سعد زغلول للتفاوض والحديث..وفشلت لجنة ملنر في تحقيق أهدافها. جاء في تقرير اللجنة الخصوصية المنتدبة لمصر (لجنة ملنر) : أما الجرائد الوطنية فكلها ماعدا القليل النادر منها أفرغت جعبتها فى القدح والتعريض منادية بأن كل اعتراف باللجنة يؤوَل بكونه رضى عن الحالة الحاضرة، وأن كل مصري تكون له علاقة بأعضائها يرتكب جناية خيانة الوطن. واتفقت كلمة معظم الكتاب طبعا لمقتضى ذلك على أن سعد زغلول باشا المقيم بباريس هو الوكيل الذي أنابه الشعب المصري عنه، فالأولى باللجنة مفاوضته في الأمر. وأضرب صبيان المدارس والمحامون وعمال الترام عن العمل، كل فريق منهم في دوره وجعلوا يخرجون في مواكب ينضم إليها الصبية من تلامذة المدارس والغوغاء ويطوفون في الشوارع وهم حاملو الأعلام ويصيحون بأعلى أصواتهم بالدعاء على اللجنة وخصوصا اللورد ملنر، ويهتفون بالدعاء لزغلول باشا والاستقلال التام لمصر

الأولة .. هما العصابة

من وحي فيلم شركة المرعبين المحدودة

للي ما يعرفش قصة الفيلم .. شركة المرعبين المحدودة كانت مسيطرة على مصادر الطاقة في البلد وكانت بتعتمد على صرخات الأطفال لتجميع الطاقة اللي في النص دا أبو عنكبوت رئيس العصابة .. قصدي الشركة .. قال بالفم المليان إن عنده استعداد يعمل أي حاجة عشان يفضل رئيس وفعلاً كان له خطة شريرة عشان يزود أرباحه بأي شكل وعلى حساب أي حد واللي ع الشمال دي روز اللي بتنظم الشغل جوا الشركة وبتوزع الأدوار .. وطلعت في الآخر هي اللي بتدبر كل حاجة من تحت لتحت .. واللعبة كلها في إيديها واللي ع اليمين دا قندل هو وأبو عنكبوت كان ليهم مخطط شرير لتحقيق مكاسب مهولة لنفسهم على حساب الأطفال الفرق الوحيد إن الشركة كانت بتعتمد على صرخات الأطفال .. الأطفال فقط

تاجون

التاجات دي شي ظريف جداً .. خصوصاً لو كان سؤالين ع السريع كده مش نوعية التاجات الطوييييلة اللي بتبقى عاملة زي استجوابات حسين باشا أو امتحانات الجغرافيا .. زي التاج إياه اللي مررته ........... أقول لكم .. مااااااعلينا المهم مبرمجنا الحر مرر لي التاج التالي 3 أسئلة عن أيام الدراسة .. هل كنت طالب شاطر فى المدرسة ؟ في المدرسة .. آه كنت شاطر ومتفوق وممتاز ومفيش زيي .. هو يعني حد حيدور ورايا .. الحقيقة إني كنت فعلاً أيام المدرسة شاطر ... والحمد لله السؤال ما جابش سيرة الكلية ايه كانت احب مادة و اكره مادة ليك فى المدرسة و الكلية؟ في المدرسة .. أحب مادة كانت الرياضيات ثم الرياضيات ثم الرياضيات .. وعلى فكرة دا مش حب دا عشق .. متعة .. لذة .. تحدي .. لو كانت الرياضيات امرأة كنت طاردتها طول عمري وطلبت إيدها .. كل مسألة في أي فرع من فروع الرياضيات كانت تحدي بالنسبة لي .. يأما اكسبها يإما تكسبني .. وفي الحالتين بستمتع بالتحدي .. في إعدادية جبت 59 من 60 وزعلت جداً ساعتها .. وفي ثانوية جبت فوووووووول مارك ... ودخلت مستوى رفيع رياضيات برضه وجبت 7.5 من 10 .. ودي درجة مش بطالة خصوصاً إني ما فتحتهاش إلا ليلة الامتحان آه نسيت أقول حاجة .. في الكلية شلتها مرتين .. مرة في سنة أولى ومرة في سنة تانية .. بس برضه بحبها بكره مادة الجغرافيا .. مالي أنا ومال تشتهر البرازيل بإنتاج البن .. وتتميز المكسيك بجوها اللي مش عارف إيه .. وعلل وجود الغابات الاستوائية في أثيوبيا ... إيه ده ؟؟ ... ولغاية دلوقت مش بحب الشيء دا أبداً .. في الكلية صعب افتكر كنت بحب إيه وبكره إيه لسببين .. الأول إني مش فاكر أسماء المواد اللي كنت باخدها إيه أصلاً والثاني لأني أحيان كتير بشك إن دخلت كلية من أساسه كنت عايز تتطلع ايه وأنت صغير ؟ حاجات كتير .. الأول ظابط في الجيش .. وبعد كده كنت أكثر تحديداً .. ظابط مهندس ميكانيكي .. وأخيرا مهندس مدني إنشاءات .. والحمد لله ولا حاجة من دول حصلت .. اللي حصل إني بقيت مهلوس كهوبا ضغط عالي .. آه يا دماغي .. حسبي الله ونعم الوكيل التاج عايز امرره لناس كتيرة .. بس حمرره المرة دي فقط لمدونة واحدة على أن تمرره هي لكل من تريد ... أمرره لصاحبة مدونة العائشة في الأحلام وطبعاً بذكر إن تقاليد المدونات العريقة تمنع رفض أو الاعتذار عن أي تاج

21 - مارس

اليوم ده مميز جداً بالنسبة لي .. مش لأنه يوم الأم زي ما بيقولوا .. مع تحياتي المستمرة على مدار العام لأمي وكل أم في العالم .. لكن مش دا السبب اللي يخليني أحس بتميز اليوم ده .. مش السبب برضه إن انهاردة يبقى عدى عليا سنة بالتمام والكمال في عملي الحالي .. وهو المكان الثاني الذي اعمل فيه منذ التخرج .. المكان ظريف وجميل وعملي مش بطال .. والحقيقة الناس كويسة جداً دا كفاية إنهم استحملوني لمدة سنة بحالها .. ودي حاجة أنا متأكد من إنها صعبة جداً .. أول مكان كنت اشتغلت فيه ... كان فيه عدد من أصحابي شغالين معايا وكانوا طبعاً مستحملني عشان معارف وأصحاب .. لكن المكان اللي أنا فيه دلوقت .. وضع تاني .. ما حدش كان يعرفني قبل كده .. ومع ذلك الناس مستحملة .. ازاي ما اعرفش ؟؟ .. بفكر أجيب لكل واحد هدية .. بس مش عايز استعجل لأني حاسس إنهم بدأوا يزهقوا مني واحتمال كمان كام بوست أعلن عن طلب وظيفة .... بس مش دا برضه سبب تميز يوم 21 مارس .. فيه سبب تاني .. 21 مارس .. انهاردة ... أول فصل الربيع .. فصلي المفضل الربيع عندي مرتبط بكل شيء جميل .. الزهور والشمس الدافية بعد شهور الشتاء اللي كانت الشمس فيها ساقعة على طول .. السما والميه والخضرة .. شهر عشان نحب بعض ونضحك طول الوقت .. أنتظر الربيع كل سنة بفارغ الصبر.. لأن فيه كام يوم مش بيتكرروا في السنة كلها .. لما بنزل فيهم بالليل أمشي في الشارع بشم ريحة الياسمين في كل مكان حواليا .. ودي واحدة من المتع التي لا توصف وذكرى بخزنها في عقلي استمتع بها طوال السنة .. تخيل الدنيا كلها حاطة لك ياسمين .. الحمد لله بس الحقيقة الموضوع مش صافي قوي ودلوقت عامل لي مشكلة نفسية .. لأني مؤخراً حسيت إني خلاف الناس .. والواد الدكطور صاحبي .. كان بيتخانق معايا بسبب الموضوع دا لأن الربيع بالنسبة له .. هو التراب والعفرة ورياح الخماسين والرمد والحشرات وحاجات كده .. فكنت بالنسبة له بني آدم غير طبيعي وكان هو بالنسبة لي كائن غير طبيعي ... أقول له : يا بني حد ما يحبش الربيع اللي المغنيين بيغنوا له .. ويحب الشتا بداله اللي مفيش حد عبره .. الربيع تفاؤل .. والشتا اكتئاب ؟؟!!!! قلت له أني بحب الشتاء برضه لكن مش زي الربيع ... وهو مصمم ويقول لي مفيش حد بيحب الربيع كده !! ... استغربت جداً من كلامه وقلت له طبعاً كلامك مش صح .. وآخرة خناقنا اتفقنا إني أسأل عشرة من الناس اللي حواليا بيحبوا الشتاء أكتر ولا الربيع .. وهو كمان يسأل عشرة حواليه بيحبوا الشتاء أكتر ولا الربيع .. ونشوف الإجمالي رأيهم إيه؟ أنا وافقت طبعاً على التحدي دا لأني كنت متأكد إن النتيجة حتكون لصالحي .. فيه حد ما يحبش الربيع .. ؟! المهم سأل هو العشرة بتوعه فقالوا له كلهم إنهم بيفضلوا الشتاء على الربيع وأنا سألت تسعة كلهم قالوا الشتاء أفضل من الربيع .. أنا اتحرق دمي .. رحت رايح للست الوالدة ربنا يديلها طولة العمر ومارست أسلوب جمعيات تحرير المرأة عند مناقشة قضايا المرأة في المجتمعات العربية .. أسلوب أنت معانا ولا مع الناس التانيين .. قلت لها وأنا مكشر .. بتحبي الشتاء الوحش المزعج الي على طول سقعة أكتر ولا - مع انفراجة للتكشيرة - الربيع الحلو الجميل اللي الجوه بيبقى فيه دافي وممتع.... فباين من سؤالي أنا عايزها تقول إيه وهي طبعاً ما حبتش تزعلني فقالت لي وماله يا بني اللي تشوفه احب الربيع .. فالحمد لله اتغلبت في التحدي بس بشرف 19 – 1 .. أهو برضه أحسن من 20 – 0 .. مش عارف هي الناس جرى لها إيه ؟؟ لغاية دلوقت كل ما اقابل حد لأول مرة وابدأ معرفتي تزيد بيه اتحين الفرصة عشان اسأله .. أكتر فصل بتحبه إيه ؟؟ والغالبية بتقول حاجة تانية غير الربيع .. ولما اسألهم عن الربيع بدل ما يقولوا ريحة الياسمين .. يقولوا .. رياح الخماسين.

ثم أنزل عليكم من بعد الغم أمنة

حينما يُنِيخ الـهَـمّ بِكَلْكَلِه في ساحات أقوام .. وعندما يضرِب الكَرْب أطنابه في صدور آخرين حينما تُخيِّم سحائب الْحُزن .. وقد تُمطِر العيون دَماً بعد دمع .. وقد يَرى أُناس الليل فلا يَرون فيه إلاّ حِلْكَته وسَواده عندها يأتي الفرج .. وينجلي الهم والحزن ويظهر ضياء الفجر .. فلرب أمر محزن لك في عواقبه الرضا .. ولربما اتسع المضيق وربما ضاق الفضا قد يتنفّس أحدهم من ثُقب إبرة ! .. وقد يَنظر من خلال منظار مُغلَق .. فلا يَرى في الأُفُق أمَلاً يَلُوح بل لعلّه إذا رام تفريجا رأى ضيقاً .. وإن نَشَد الفَرَح صَفَعَه الْحُزن .. وإن أراد أن يَضحَك عُبِس في وجهه .. وقد غفل عن لطف الله وعظيم فضله ومِنَّتِه أنه لا شِدّة إلا ويَعقبها فَرَج .. وما من كَرْب إلا ومعه التنفيس .. وقد يبتلي الله عباده ليَظهر منهم صِدق العبودية .. وليجأروا إلى الله بالتوبة والدعاء * حَتَّى إِذَا ضَاقَتْ عَلَيْهِمُ الأَرْضُ بِمَا رَحُبَتْ وَضَاقَتْ عَلَيْهِمْ أَنفُسُهُمْ وَظَنُّواْ أَن لاَّ مَلْجَأَ مِنَ اللّهِ إِلاَّ إِلَيْهِ ثُمَّ تَابَ عَلَيْهِمْ لِيَتُوبُواْ إِنَّ اللّهَ هُوَ التَّوَّابُ الرَّحِيمُ يا صاحب الهم إن الهم منفرج .. أبشر بخير فإن الفارج الله اليأس يَقْطَع أحيانا بصاحِبِه .. لا تيأسَنّ فإن الكـــافي الله الله يحدث بعد العُسْر مَيسرة .. لا تجزعنّ فإن الصَّـانِع الله وإذا بُلِيتَ فَثِقْ بالله وارضَ به .. إن الذي يَكْشِف البلوى هو الله والله ما لَك غير اللهِ مِن أحَد .. فَحَسْبُك الله .. في كلٍّ لكَ الله الله يجعل بعد العسر ميسرة .. لا تجزعن فإن الفارج الله وأصدق من هذا وأبلَغ قوله صلى الله عليه وسلم : النصر مع الصبر ، و الفرج مع الكرب ، و إن مع العسر يسرا حقا قال من شرح لنا القرآن وبين .. فما ترك لصاحب رأي بعد ذلك أن يقول فيه برأيه فإن مع العسر يسرا .. إن مع العسر يسرا تكررت الجملة للتأكيد .. وأين تكررت في كتاب الله الذي لو ذكر فيه الأمر مرة واحدة لكفى عند عباد الله ليؤمنوا به فكيف وقد تكرر مرتين للتأكيد .. إن مع العسر يسرا .. ولرب نازلة يضيق بها الفتى ذرعاً وعند الله منها المخرج .. ضاقت فلما استحكمت حلقاتها فرجت وكنت أظنها لا تفرج .. ولو أن الدموع تعيد البعيد.. لسالت دموع تقد الخدود .. حنانيكم يا أخوة لا تحزنوا .. حنانيكم ماذا البكاء يفيد .. إنما هو مولاكم .. هو من قضى

إنا لله وإنا إليه راجعون

رحم الله والد

العائشة في الأحلام

أَفَلاَ يَتَدَبَّرُونَ الْقُرْآنَ

َعَبَسَ وَتَوَلَّى

أَن جَاءَهُ الْأَعْمَى

وَمَا يُدْرِيكَ لَعَلَّهُ يَزَّكَّى * أَوْ يَذَّكَّرُ فَتَنفَعَهُ الذِّكْرَى

أَمَّا مَنِ اسْتَغْنَى * فَأَنتَ لَهُ تَصَدَّى * وَمَا عَلَيْكَ أَلَّا يَزَّكَّى

وَأَمَّا مَن جَاءَكَ يَسْعَى * وَهُوَ يَخْشَى * فَأَنتَ عَنْهُ تَلَهَّى

كَلَّا إِنَّهَا تَذْكِرَةٌ * فَمَن شَاءَ ذَكَرَهُ * فِي صُحُفٍ مُّكَرَّمَةٍ * مَّرْفُوعَةٍ مُّطَهَّرَةٍ * بِأَيْدِي سَفَرَةٍ * كِرَامٍ بَرَرَةٍ

قُتِلَ الْإِنسَانُ مَا أَكْفَرَهُ

هو احنا عندنا سلاح ردع

* هو احنا عندنا سلاح ردع ؟؟!!

- ومين قال لك إن احنا ما عندناش سلاح ردع ؟

* يعني إحنا عندنا ؟
- طبعاً .. بس واضح إن إحنا مقفلين ع السر دا كويس قوي ... أنت فاكر يوم ما قطعت الكهربا عن مصر يوم بحاله ؟؟

* أيوه
- يوميها كانوا محتاجين الكهربا بتاعة مصر كلها عشان يخصبوا بيها اليورانيوم

* لا يا شيخ !!!!
- طااااااااابعاً أمال أنت فاهم إيه ! .. عارف السحابة السودا اللي بقالها كام سنة ؟

* مالها رخرا ؟
- أنت فاهم إنها تلوث وكده يعني ؟

* أمال إيه ؟
- دا إشعاع طالع من التجارب اللي بنعملها تحت الأرض من ورا العالم

* أنا اتمني يكون عندنا سلاح ردع .. ياريت
- إيه ياريت دي .. هو إحنا ممكن يكون ما عندناش ... ؟؟؟؟؟ .. إحنا لو ما عندناش ... كنت حتلاقي حمى في العلم والتفكير والإنتاج .. إنما الهدوء واللامبالاة اللي احنا فيها دي بتاعة ناس أكيد عندها سلاح ردع

الفبلم من مدونة تمام كوجان .. والحوار من فيلم ليلة سقوط بغداد

آمنت بالحقد

آمنت بالحقد يذكي من عزائمنا .... و أبعد الله إشفاقا و تحنانا
ويل الشعوب التي لم تسق من دمها .... ثاراتها الحمر أحقادا و أضغانا
ترنّح السوط في يمنى معذّبها .... ريّان من دمها المسفوح سكرانا
تغضي على الذلّ غفرانا لظالمها .... تأنّق الذلّ حتّى صار غفرانا
ثارات يعرب ظمأى في مراقدها .... تجاوزتها سقاة الحيّ نسيانا
يا وحشة الثأر لم ينهد له أحد .... فاستنجد الثأر أجداثا و أكفانا

حملة المدونين في طلب الثأر لدماء الأسرى المهرقة غيلة وغدرا

شخبطة ملوكي - بنت سعد - ربة السيف والقلم - جبهة التهييس الشعبية

الأبيات للشاعر السوري المميز بدوي الجبل .. .. والصورة من مدونة ربة السيف والقلم

الجدع دا رغاي كده ليه ؟؟؟

زعيم حملة العودة إلى أيام الطفولة الجميلة .. الفنان الكبير خالد .. زعلان من حكاية بوست كل يوم .. ودكتورنا المحارب كاتب بوست عنده بيطلب فيه من كل زائريه الإجابة على سؤال كان قالوا أهل الجنة قبل كده .. أنت عامل المدونة ليه ؟؟ وضاف عليهالدكتور سؤال وحاطط الروابط اللي عندك ليه ؟ فاسمحوا لي أن أجيب عن سؤال دكتورنا وأهل الجنة وأوضح لخالد حكاية بوست كل يوم

باختصار بعتبر التدوين عندي محاولة علاج .. أيوه محاولة علاج .. ليه ؟؟ .. أقول لكم

تخيلوا واحد قاعد بيكلم نفسه طول النهار .. بدون مبالغة .. طول الوقت قاعد بيكلم نفسه بدون توقف .. لدرجة إني سألت واحد صاحبي طبيب ع المسألة دي .. هل دا طبيعي ؟؟ .. الواحد كده دماغه تقعد تودي وتجيب طول الوقت .. عماله تقلب في كلام .. وتفكر في حاجات .. سألته عشان اطمن على نفسي .. وصلت للعباسية ولا لسه ؟؟؟
هو الحقيقة ما رضاش يخضني .. فقال لي .. وأنت بتكلم نفسك صوتك بيعلى ؟؟ .. قلت له : لأ ... قال لي : خلاص كده مفيش مشكلة ...

بيني وبينكم ما رضيتش أقول له الحقيقة

أنا حاولت كتير امتنع عن الحديث الداخلي ده .. بس مفيش فايدة لدرجة لما احاول اسكت الصوت اللي جوايا .. ألاقيه عمال برضه يقول لي ياترى حتفضل مسكتني كده قد إيه ؟؟ مفيش فايدة

ساعات أغني لنفسي .. تصوروا .. وساعات اتفلسف واحط نظريات لكل حاجة حواليا .. ساعات أقول لنفسي قفشات واضحك عليها وأنا ماشي في الشارع وابتسامتي قد كده على وشي .. والناس متهيألي بيبصوا عليا وهما بيقولوا في سرهم يا حول الله يارب .. ياعيني ع الجدع واللي حصل له .. منك لله يا حكومة !!!
ساعات بدي لنفسي دروس واشرح لنفسي أحاديث أو اشرح آية .. أو اردد شعر حافظه واحلله واطلع مواطن الجمال اللي فيه ... كل دا في دماغي ..
ساعات بتكلم في السياسة والحقيقة إني مريحني ع الآخر .. متهيألي إن أنا وأنا الوحيدين اللي بيتكلموا في السياسة ومش بيختلفوا مع بعض.

أضف لكده إن إصولي تمتد لمنطقة معروفة في مصر كلها بأنهم أكتر ناس بتتكلم .. عندهم استعداد يتكلموا ويحكوا حواديت وقصص ومغامرات وأهوال لمدد أيام وليال متواصلة بدون انقطاع .. ولأن الجينات دي جوايا .. ومش عارف أطلعها على مين .. فكانت الكتابة هي المتنفس ليا .. وما صدقت ألاقي حاجة زي المدونات دي الواحد يرغي فيها ...
عشان كده تلاقي فيه بوست كل يوم .. مش كده وبس دا لو حبيتم ممكن يكون فيه بوست كل ساعة .. بس كده لازم اعمل وصلة من دماغي على المدونة على طول .. وهي جت ع الوصلة دي ما هي مصر كلها بقت وصلات ...

لما عملت المدونة .. عملتها لأسباب كتيرة منها إن أحول الكلام اللي بيروح ع الفاضي ده لكتابة .. أعمل متنفس لدماغي اللي اتزحمت بكل أنواع الرغي ..

عشان كده المدونة بالنسبة لي مش دروس ولا وعظ ولا دراسات بكتبها.. واعتذر لمن كان يحسن الظن بي وفاكر إني عملت المدونة بهذا الهدف .. فالحقيقة إن المدونة عندي هي تحويل الصوت الداخلي إلى كلمات .. بحيث أريح دماغي من استرجاع الأفكار دي .. لأنها حتبقى موجودة ولو عايز ارجعلها ابقى عارف حرجع لها فين .. بدل ما بعدمها بمجرد مرور الوقت ... واعيد توليدها من جديد في وقت تاني

لما بدأت أشارك الناس في الكلام دخل عامل تاني اللي هو الاستفادة برأي الآخرين في الرغي اللي عندي عشان اعرف الصح منه من الغلط .. واللي شجعني على فتح المدونة أمام الجميع إني شفت مدونات ناس زي الروابط اللي موجودة ع اليمين دي كسروا احتكار عالم التدوين فحبيت أكون زيهم ..

فالروابط اللي على الجنب دي حاططها ببساطة عشان الناس دي بشعر إنهم أنا في صور مختلفة .. يعني الروابط دي - بلا استثناء - روابط لنفسي بس في مدونات مش أنا اللي بكتبها .. وكل الناس دي - أفتكر - إني حطيت روابط ليهم قبل ما يحطوا هما روابط ليا .. ولو ما حطوش روابط ليا حفضل حاطط روابطهم لأنها ببساطة روابط ليا .. حد فاهم حاجة ؟؟ ..

فيه ناس تانية كتيرة بحترمهم جدا وبدخل مدوناتهم كل يوم .. بس مش حاسس إنهم أنا .. فعشان كده مش حاطط روابطهم مع احترامي الكامل ليهم وتقديري ..

بس آدي الحكاية

احتفالاً بيوم المرأة العالمي

للشاعرة إيمان بكري مجموعة صدرت حديثاً بعنوان الديك - دا - طور .. يعني الديكتاتور ..
ودا لأن وعلى ما يبدو إن الديك فعلاً طلع طور كما كشفت المرايا في الصورة ..
إيمان بكري طبعاً شاعرة .. يعني أنثى .. يعني ست .. يعني مش ممكن تكون ضد المرأة .. ما حدش يقدر ينكر الموضوع دا طبعا ...
واحتفالاً بذكرى المرأة .. اللي كثير من المدونات احتفلت بيه .. ولأن المرأة وكما قال أخونا الغلباوي أبو نص لسان - عجل الله ضربه - .. الست دي تبقى أمك وأختك ومراتك وبنتك وأضيف على كلامه إنها كمان بنت الجيران اللي مطلعة بوزك والبت اللي كانت قاعدة جنبك في ابتدائي وبتخطف منك الساندوتشات وتطلع تشتكي للميس وهي بتعيط وزميلاتك في الكلية اللي كانوا يدلعوا على المعيدين عشان يحلوا لهم الشيت اللي طفحت الدم عقبال ما حليته .. وزميلتك في الشغل اللي رامية كل حاجة عليك عشان مرهقة من الحمل .. والست اللي بتيجي تقف جنبك في الأتوبيس عشان تخلي عندك دم وتقوم لها وأي حد يقرب منها تلبسه تهمة تحرش .. يعني باختصار كل حاجة حواليك ومحاوطاك من جميع الاتجاهات .. يعني وراك وراك .. فحتروح فين يا حلو ؟؟ ..
المهم .. بهذوها المناسبة السعيدة واحتفالاً بذكرى الفقيدة قلت احتفل أنا كمان فاخترت مزجولة من مجموعة إيمان بكري الجديدة بعنوان حظي العفش بتقول فيها:

وقعني حظي العفش في قعدة ستاتي
نسوان كمالة عدد وعقلهم فاضي
مغيرين طبعهم وملونين وشهم
وكل شيء عندهم .. ماشي وشيء عادي

واللي يشوف كدبهم .. حيبان له من شكلهم
إن البعيد جدهم .. كان أصله قرداتي

راكبين شبح وعيون .. ومعلقين محمول
سارحيين وسايبين طور .. في البيت قاعد مسطول ..
ع الحال دا ليلاتي

وعيالهم المساكين تاهوا مع التايهيين
نص النهار نايميين والسهرة في الديفيليه
والديسكو والنادي

عاملين لي جمعيات .. اشي سيدات أعمال
واشي سيدات راس مال والبلوه في الآتي

بعقول مخاصمة النور .. كتبت يفط بتقول
على وشها الملعون .. احنا فري وسبور
ونظامنا خواجاتي

توب الحيا مقلوع .. والقعدة في الممنوع
لو كنت ألاقي دموع .. لابكي بصوت مسموع ..
واختمها بصواتي

يا بؤرة المجتمع .. انس وشيطان اجتمع
زيدوا كمان في الدلع .. مات فيكوا حس السمع
على إيه بقى نهاتي ؟؟!

بزنس ع المكشوف وتعالى عاين شوف
آه لو أكون مسئول أو كنت يوم قاضي

لحكم عليهم أنا .. بالسجن خمسين سنة
واللي على ذمته .. إعدام عشان حضرته
على خيبته كان ماضي

يادي المرار والقلق .. صوتي يا خلق اتخنق
رجالة صبحت ورق .. شنبات و ع الفاضي

يا اهل الأصول والقول .. اصحوا بقى من النوم
ده الشرع والمعقول .. بيزين طباع وعقول
يا خسارة يا بلادي

عايزين شوية حمم .. علي ما ليهم ذمم
بيلبسونا العمم .. أولاد أبالسه ورمم
بيضللوا (بناتي)

قادر يزيح همهم .. يبعدنا عن شرهم
لا طبعنا طبعهم .. ولا كنا يوم منهم
دول بلوه يا خواتي

طبع النسا عندنا .. بين طاهرة أو مؤمنة
عارفين حدود ربنا .. تلقى في نور وجهنا
ضي الرضا بادي

يعني الخلاصة بقول ... لو النسا بردون
يفلت عيارها يوم .. حتضيع عادات وأصول
وربنا الهادي

اللي ما يتسماش

تبقى قضية المسميات ورقة أخرى تلقى في وجه الجماعات العاملة في حقل الدعوة .. لأن الكثير يتمسك بالكلمات ..

كلنا مسلمين يعني .. ليه بقى التسميات الكتيرة دي ... هو يعني لما انتوا يبقوا اسمكم أنصار سنة .. يعني إحنا إيه مش أنصار سنة ولا لما انتوا إخوان مسلمين أمال إحنا يعني مش مسلمين .. إلخ هذه المغالطات ..

ومعنى التسمية لا يحتمل هذا لأنه ينزل منزلة الوصف والبيان
وليس معنى أن تتسمى حركة بالجماعة الإسلامية أنها تنفي الإسلام عن باقي الناس ..

وهل لما وصف الله عز وجل المسلمين في عهد النبي صلى الله عليه وسلم بأنهم مهاجرين وأنصار استدعى ذلك أن يكون الأنصار هم وحدهم أنصار النبي صلى الله عليه وسلم .. ولم ينصره أحد غيرهم وعلى ذلك فإن أبا بكر وعمر وسائر المهاجرين لم ينصروا النبي صلى الله عليه وسلم ... طبعاً غير صحيح .. فالمهاجرين أنصار للنبي والأنصار مهاجرين إلى الله ورسوله .. ومقتضى تسمية الجماعة من الناس بصفة لا ينفي عن الآخرين الوصف ..

ولكن هذه المغالطة فيها الكثير إما من السذاجة أو المكر ..
السذاجة لأن معنى التسمية والوصف لا يوحي للعقل بذلك أبدا فهو عندها يكون تقليد لقول آخرين كنوع من الحيل النفسية لتبرير عدم الانضمام لجماعة معينة
أو مكر إن كان بغرض تنفير الناس عن فكر العمل الجماعي

وكالعادة ما من قول إلا ويتمسك بتأويل آية أو حديث تأويلاً يوافق الأهواء .. فالمعاتب على تسمية الجماعات يتعلق بقوله تعالى هُوَ سَمَّاكُمُ الْمُسْلِمينَ مِن قَبْلُ .. والمذكور في الآية هو وصف الله تعالى لأمة الإسلام في الكتب السابقة وذكره تعالى لنا باسم المسلمين وهو أفضل ما نتصف به ولكن الآية لا تتحدث عن نزع صفة الإسلام ممن تعددت له مسمياته فلا يزال المصري مسلما والمهندس مسلما والوطني مسلماً .. والعمل الدعوي مثله مثل أي عمل ومثل أي انتماء لا ينزع صفة الإسلام عن صاحبه.. وإنما النهي عن استبدال الإسلام بمسمى آخر غير الذي سمى به الله عباده أو الاتصاف بصفة تتعارض مع الإسلام فيستحيل اجتماعهما في شخص واحد .. فالنهي عن الاستبدال .. أما تعدد الصفات فهو حاصل منذ سمى الله تعالى المسلمين مهاجرين وأنصارا

وهناك نقطة هامة في مسألة التسمية و تؤخذ عندي بعين الاعتبار :

هل ترضى الجماعة بالتسمية لنفسها ..

فكثير من الأسماء تطلق من قبل تصنيف المخالفين أما الجماعة نفسها فإذا سألتها فإنها تتبرأ من التسمية .. وقد برع الأمن في اختراع مسميات لجماعات وتنظيمات خرافية لكل من يدعو للإسلام تماما كما برع في تلفيق اتهامات أقرب للكوميديا .. ويتبعهم في ذلك كثير .. بينما أفراد الجماعة نفسها لم يسموا أنفسهم بهذه التسمية مثل تنظيم العائدون من ألبانيا وطلائع الفتح وتنظيم الوعد الحق والسلفية الجديدة .. وكلها مسميات أمنية يتبعها المنتقدون .. وهذا المسلك من التسمية أرفضه رفضاً تاماً .. وأرى فيه ظلماً للجماعة .. فكل فرد يدعى بأحب الأسماء إلى نفسه وكل جماعة تدعى بالاسم الذي أطلقته على نفسها .. ولا يحق لأحد وصف جماعة إلا بما ترضاه لنفسها

وأسوأ من ذلك كله اختزال فكر جماعة معينة في شخص واحد .. ونسبة الجماعة من الناس لشخص معين .. وبيني وبين نفسي أرفض نسبة الأفكار إلى أشخاص معينين بل أجد في هذا الأسلوب انتقاص من الفكر الذي تدعو إليه الجماعة ..

فقد تظهر أفكار إيجابية لأشخاص مزيفين أو مخادعين .. وأحيانا ترفض النفس البشرية الميل إلى الفكرة الصحيحة إذا جاءت منسوبة إلى شخص تبغضه .. فالأولى التسمية بالفكرة لا بالفرد .. ولو كان أحد أحق بأن ينسب إليه لكان النبي المعصوم صلى الله عليه وسلم ولسمانا الله محمديون .. ولكن الله عز وجل قال .. وما محمد إلا رسول قد خلت من قبله الرسل أفإين مات أو قتل انقلبتم على أعقابكم ... فلا يحق لأحد أن يُنسب إليه بعد رسول الله صلى الله عليه وسلم ولكن دأب المخالفون بدلاً من مناقشة الفكر والرأي أن ينتقصوا من قدر الجماعات بنسبتها إلى أفراد .. يستغلون في ذلك جهل غالبية الناس بشخوص هذه الأفراد المنسوب إليهم .. ويقع ذلك في أنفسهم موقع الرفض وهو غاية ما يتمنى المخالفون.

ومثل ذلك .. تلك الكلمة التي يتشدق بها الكارهون أو الجاهلون في وصف الدعوة للعودة لكتاب الله وسنة النبي صلى الله عليه وسلم فيرددون كلمة هؤلاء وهابية .. نسبة للأمام محمد بن عبد الوهاب .. أو هذا قطبي نسبة لسيد قطب .. أو هذا سروري أو الفرماوية أو ... إلخ
ومثل ذلك عندي يشبه فعل قساوسة الغرب في وصفهم للمسلمين لما يريدوا الانتقاص منهم بأنهم محمديون لينفوا عنهم صفة الإسلام لله عز وجل

والخلاصة عندي في مسألة التسمية عموماً في الجماعات الإسلامية وغيرها ..

أن التسمية وتعدد المسميات أمر حاصل لا ضير فيه .. إلا أن تكون المسميات متضاربة فيما بينها ..

فإذا كانت الجماعة ترضى لنفسها التسمية كالإخوان المسلمين أو الدعوة السلفية .. فهؤلاء لهم حرية اختيار ما يرونه صحيحاً وليس لي ولا لغيري حق تغيير قناعاتهم بتسمية جماعاتهم طالما أن الإسلام لم يحرم ذلك .. وحتى لو كانت التسمية منسوبة لشخص واحد .. كالناصريين أو البهائيين أو المسيحيين .. فكل يختر لنفسه

وإذا كانت الجماعة لا ترضى لنفسها التسمية .. كالسلفية الجديدة أو الوعد الحق .. فهؤلاء ليس لأحد أن يطلق عليهم تسمية لا يرضوها لأنفسهم .. واستخدام التسمية نوع من الظلم لفكر الجماعة .. وأسوأ من ذلك كله اقتران السيئين بأن تنسب جماعة لشخص وهي في نفس الوقت لا ترضى بالتسمية ..

ما احنا كلنا مسلمين ياأخي

كثيراً ما أسمع من يعتب على وجود جماعات كثيرة ترفع شعار الإسلام مثل جماعة الإخوان أو الدعوة السلفية أو أنصار السنة أو الجمعية شرعية ... إلخ

فاسمعهم ينتقصون من هذه الجماعات والقطع بأن أهدافها ليست خدمة الإسلام بل على العكس هي تضر بالإسلام مؤكدين على ذلك بأفعال خاطئة يقوم بها منتمون لهذه الجماعات ..
وفي أحسن الأحوال وعند توافر حسن الظن فهم يقولون

هما كلهم كويسين بس احنا كلنا مسلمين .. ومفياش داعي نبقى متفرقين كده ... الإسلام دين واحد ولازم نتوحد .. ومفيش داعي لتعدد الرايات ..

ويقرأون قوله تعالى ..

إن الذين فرقوا دينهم وكانوا شيعاً لست منهم في شيء ..

ويجعلونها في غير موضعها .. فالآية في أهل البدع وأهل الشبهات وهم البضع وسبعون فرقة التي تخرج من الإسلام .. أما ما نتحدث عنه فهو العمل الجماعي داخل إطار الجماعة المسلمة المتمسكة بكتاب الله وسنة رسول الله صلى الله عليه وسلم، وبما كان عليه الصدر الأول من الصحابة والتابعين، وأئمة المسلمين في قديم الدهر وحديثه.

وفي الوقت الذي يدعو العالم كله إلى نبذ الفردية والعمل في أشكال جماعية .. لازال الإسلام يهاجم إذا انتظم اتباعه في مجموعات عمل
والهجوم على وجود الجماعات الإسلامية له أسباب كثيرة .. منها

فكر يهاجمها لحماية مصالحه الشخصية .. من حكم أو نفوذ
فكر يهاجمها لإخلاء الساحة أمام اتجاهات أخرى فكرية أو قومية
فكر يهاجمها لاعتبار أنه ليس هناك الضرورة الدافعة لقيامه كما سيأتي
فكر يهاجمها باستخدام نظرية العنب الحصرم (لو مش عارف تاخد العنب فيبقى العنب مر) أو لو مش عايز تشارك يبقى الموضوع دا وحش .. وهي قريبة من المعنى المذكور في الآية .. الذين قالوا لإخوانهم وقعدوا لو أطاعونا ما ماتوا وما قتلوا .. يقول سيد قطب في الظلال : فهم لم يكتفوا بالتخلف - والمعركة على الأبواب - وما يحدثه هذا التخلف من رجة وزلزلة في الصفوف والنفوس. بل راحوا يثيرون الزلزلة والحسرة في قلوب أهل الشهداء وأصحابهم بعد المعركة , وهم يقولون: لو أطاعونا ما قتلوا.
فيجعلون من تخلفهم حكمة ومصلحة , ويجعلون من طاعة الرسول صلى الله عليه وسلم واتباعه مغرما ومضرة . وأكثر من هذا كله يفسدون التصور الإسلامي الناصع لقدر الله , ولحتمية الأجل , ولحقيقة الموت والحياة ,

وفي الوقت الذي تجد فيه فنون الإدارة تحث على أن تنظم المؤسسة الواحدة جهودها عن طريق جماعات العمل الصغيرة .. تجد من يعتب أن ينتظم الإسلاميون في إطار مجموعة

وفي الوقت الذي يدعى فيه تشكيل أحزاب لتحقيق غايات الوطن .. يهاجم تكوين الجماعات لخدمة الإسلام .. ولو طبقنا نظرية كلنا مسلمون فلماذا لا نطبق نظرية كلنا مصريون فلا داعي لتشكيل الأحزاب ؟؟

فالجماعة الواحدة تحتاج عند الضرورة أن يكون تحتها مجموعة من التكتلات الأصغر تكون بمثابة الأجنحة لهذه الجماعة .. وغالباً تكون ضرورة المواجهة هي التي تفرض على الجماعة الواحدة تقسيم أعضائها إلى تكتلات .. وهو أمر حاصل شرقاً وغرباً ..

ولا شك أن جهود جميع هذه الأجنحة لابد أن تصب جميعها في مصلحة الأهداف العليا للجماعة .. حتى لو اختلفت المسميات ..

وكان النبي صلى الله عليه وسلم .. رغم أنه جاء بالإخاء بين جميع المسلمين وآخى بين المهاجرين والأنصار وبين الأوس والخزرج من الأنصار .. إلا إنه هو نفسه وقت الضرورة كان يجعل جيشه على ثلاث كتائب .. كتيبة للمهاجرين وكتيبة للأوس وكتيبة للخزرج .. فضرورة المواجهة في القتال هي التي استدعت ذلك .. وما كان لقيادة النبي صلى الله عليه وسلم البارعة أن تغفل عن هذا الأسلوب

فليست المشكلة في وجود الجماعات بل في كيفية توظيف هذه الجماعات لخدمة هدف واحد ..

فالأولى بمن ينتقد وجود الجماعات في حد ذاته ويدعوا إلى وحدة كيانات هذه الجماعات – وهو أمر بعيد المنال – أو انصهارها في المجتمع أو بمعنى آخر رفع الراية البيضاء ... أولى به أن يرشد إلى توحيد الجهود والتكامل في الأداء بين هذه الجماعات فهو أكثر واقعية مع الهجمات المنوعة على الإسلام .. بين هجمات ضد الإسلام باسم الإسلام .. وهجمات ضد الإسلام باسم الإنسانية والحداثة .. وهجمات ضد الإسلام باسم الديانات الأخرى .. أما توحيد الكيانات فلن يحدث ما دمنا بشراً .. وحتى لو اتحدت الكيانات تحت مسمى واحد فلا تزال العصبيات المختلفة تحتها تتوثب مع كيد العدو ومكره وبثه لبذور الفتن أي فرصة لتخرج فتفجر قلب الجماعة

صحيح أن من الجماعات من ينتقد الجماعات الأخرى ويعدل عليها في منهجها .. والبعض يغالي في هذا من باب النصح .. وهذا التناحر يزيد أو ينقص حسب أفكار الجماعة وحسب الظروف والأحوال المحيطة ..

لكن ونقلا عن المصدر السابق تمر عملية تطور أي عمل جماعي بأربع مراحل أساسية،
المرحلة الأولى : تشكيل الجماعات وتنتهي بالاتفاق على أسس ومعايير محددة لسير العمل وتوزيع الأعباء والمهام والواجبات بين الأفراد
في المرحلة الثانية: مرحلة العصف الذهني، يبدأ كل فرد في التعبير عن رأيه بصوت مرتفع، حيث تبدأ تتضح ملامح شخصية وآراء كل فرد داخل الجماعة وتعلو الأصوات خلال الاجتماعات، لا أحد ينصت للآخر، الاتصال مفتقد بين أعضاء الجماعة.
ثم تأتي المرحلة الثالثة وهي مرحلة التوافق: حيث تبرز روح التعاون بين أعضاء الجماعة الذين يكتشفون في هذه المرحلة مزايا العمل الجماعي، فيبدؤون في نبذ الخلافات فيما بينهم، ويعبر كل منهم عن رأيه بكل حرية، ويصبح الإنصات إلى آراء الآخرين السمة الغالبة على أفراد الجماعة.
المرحلة الرابعة مرحلة الاتفاق: وهي المرحلة التي ينتهي فيها أفراد الجماعة إلى الاتفاق على أطر محددة لتسيير العمل داخل منظومتهم، وعلى الآليات التي سيتم بها تبادل الرأي بين أفراد الجماعة.

ولو اعتبرنا الإسلام هو المؤسسة أو المنظمة وجماعات العمل الدعوي هي أفرادها فيتضح لنا أنا في المرحلة الثانية من تطور العمل الجماعي ..
فالاختلاف بين الجماعات أمر وارد ومرحلة لابد من المرور بها

يقول الباحث الموريتاني محمد مختار الشنقيطي
ونصيحتي للمسلم الملتزم هي الارتباط بكل العاملين أفرادا وجماعات، فإن وجدت في بعض الحركات الإسلامية ما لا يرضيك قيادة أو أداء، فستجد عندها بعض ما يرضيك تربية وثقافة مثلا... وحافظ على ولائك لكل المسلمين، بمختلف مشاربهم ومذاهبهم. ولا تقصر عملك على القنوات والمؤسسات التي تنتمي إليها، بل اعمل معها ومع غيرها، ولا تخلط بين الانتماء والولاء: فانتماؤك إلى جماعة لا يعفيك من منح الولاء لكل الجماعات العاملة والأفراد العاملين، بل الولاء والنصح لكل مسلم. واصحب كل قوم على أحسن ما عندهم، وابذل جهدك في العمل الفردي موازاة مع العمل الجماعي، واتخذ لك مشاريعك الدعوية الخاصة التي تجعل لحياتك الشخصية معنى، وتكون لك معذرة عند الخالق سبحانه، ولا تداهن الجماعة أو القيادة، واقتحم وبادر، ولا تنتظر الأوامر.

ويحلو للبعض تذكير الناس بالخلافات بين الجماعات والتأكيد وتضخيم مثل هذه الخلافات .. وكأنه لا يحدث تنازع إلا بين الجماعات التي ترفع شعار العودة للإسلام .. وكأنه لم يحدث في أوروبا وعلى مدى قرون مثل هذا الاقتتال وأشد .. وكأنه لا يحدث بين الأحزاب .. بل وكأنه لا يحدث داخل الحزب الواحد كما حدث في الوفد ..

ولكن يحلو للبعض تصوير حال الجماعات الإسلامية بهذا الحال لينفر الناس عن الفكر التنظيمي الجماعي خاصة وأنه السبيل الأقوى في مواجهة أشكال الهجمات المذكورة على الإسلام

فالمشكلة ليست في الخلاف وإنما في افتقاد القيادة

فالجماعات العاملة في خدمة الإسلام وما بينها من خلاف تفتقد القيادة ولو توفرت القيادة التي توجه الجمع لاختلف الحال .. فكل جماعة تربي من تختار من أفرادها ليكون أحد قادتها يوماً فأين من يربي ليكون قائد الجميع .. أين من يربي ليكون قائد أمة

والمرحلة تشبه تلك الفترة قبل مجيء صلاح الدين .. فالمسجد الأقصى أسير .. والمسلمون متفرقون .. وأمراء العرب يتناحرون .. والشيعة العبيدية المسمون بالفاطميين قد تحكموا في حواضر بلاد الإسلام .. ونشروا أفكارهم بين عامة الناس .. ولازالوا كذلك .. حتى ظهر فيهم نجم صلاح الدين فكانت قيادته الفذة وبراعته الإدارية فاستخدم اعدائه لتحقيق أهدافه ووحد أتباعه أصحاب الرايات المختلفة تحت راية واحدة .. وضرب على يد مخالفيه .. وتوجه إلى بناء ما هدم ... ثم توجه للخارج فأعاد ما سلب ووحد ما تفرق

الخلاصة .. ليس العيب في تعدد الجماعات .. فندعو لهدمها .. وإنما المشكلة في افتقاد التكامل وتوحيد الجهود ..

وتبقى قضية المسميات

الزرافة ماتت !!!!

الزرافة ماتت .. انا مش بهزر .. انا مش بضحك .. آخر زرافة في حديقة الحيوان في الجيزة ... ماتت ومن 3 شهور كمان
أنا ما كنت اعرف .. لسه قاري الخبر ده في موقع ولاد البلد .. طيب مش حد يقول لنا .. إنه خلاص مفيش زرافة
الزرافة أم رقبة طويلة اللي كانت على طول رافعة راسها لفوق دي .. واللي كانت محبوسة في حديقة الحيوان .. ورغم إنها راضية بحبستها ... ماتت .. ماتت إزاي محدش عارف .... بس ماتت
وتم تسكين بيت الزرافة بالنعامة اللي تشترك مع الزرافة في إن رقبتها طويلة برضه وراضية بالحبسة برضه .. بس تفرق عن الزرافة إن راسها مش مرفوعة لفوق .. لأ .. راسها مدفونة في الأرض ..
لما عرفت افتكرت بقرة حاحا بتاعة أحمد فؤاد نجم .. الخواجات وقعوها في البير عشان يشفطوا اللبنات
انهاردة زرافة حاحا أم راس مرفوعة هي اللي ماتت والأكيد الأكيد إنها ماتت مش بإيد الخواجات المرة دي
خلاص مصر مفيهاش زرافة ..
مصر فيها نعامة .. نعامة وبس
تحذير لأي زرافة بتفكر تيجي مصر ..

تحذير لجميع الحيوانات اللي راسها مرفوعة لفوق
الزراف عندنا بيتحبس لغاية ما يموت .. اللي بيعيش عندنا هو النعامة ...

بيت الزرافة بقى بيت النعامة

كمان مرة عشان الحبايب

ده كلام برضه .. .. قال الستات مشاكل قال !! .. معقولة ؟؟!!

لا لا عييييب يا جماعة ما يصحش كده .. حد يقول ع الستات إنهم مشاكل وإنهم مربع الفلوس ..
.. بلاش حد يفتري ع الستات

ما حدش لو سمحتم يقول زي عمو فؤاد في مسرحية سيدتي الجميلة .. لما كان بيغني أغنية عجيبة كده
... مش عارف قال إيه بيقول فيها ..

إنما ستات وجواز وخلف وعيال أوهام ..

دول صنف من البشرية تمام زي الألغام
من كلمة تقيد النار في البيت والغيط وعاديك ..

حتلاقي أبوها وأخوها وحما جاية تربيك
ويطلعوا نني عنيك .. ويلموا الدنيا عليك
وعاديك .. أعاديك يتشمتوا فيك ..
وصوات وصريخ وزعيق ومناهج في التشليق
وسلاح قباقيب وحلل وقلل وفريق ينحاز لفريق
طب جرب أنت في مرة وسلم نفسك وحدك ليهم
وأنا اراهنك إن ما صبحت بتلعن أورمة خاش أهاليهم
دول صنف من البشرية إنما معجون مية عفاريت
يملوك بنزين وسبرتو وبمب ويلعبوا بالكبريت
كيدهم دا عظيم وحياتك .. حتى ولو كانوا أخواتك .. إيش حال لو بقوا ستاتك
يخربوا بيتك مادياً .. وحتتعقد نفسياً .. ويضيع أسمك أدبياً
في محاكم ثم في نفقة أو في الحبس احتياطياً

دا كلام برضه يا عمو فؤاد ..

بقى حد يقول ع الستات .. الجنس الناعم .. كده ؟؟!!!

المهم .. الملف دا خاص بالسيد المحترم كاميكاز بيه السادس عشر

مسألة رياضية ..

اللي مش مصدق الكلام ده يزور المدونة دي

فترة توقف .. أرجو ألا تطول

نتوقف فترة لحين الاطمئنان على والد

العائشة في الأحلام

أسأل الله العظيم رب العرش العظيم أن يشفيه وجميع المرضى .. اللهم آمين

هذا التوقف التزام أدبي تطبقه العائشة في الأحلام مع الآخرين

والآن حان الوقت لكي نطبق ما تعلمناه منها

سبب كلامي على حديث أم زرع

حديث أم زرع اللي ذكرته باسم قعدة ستات بيلفت نظري دايماً لحاجة ..

إنه فيه حاجات صغيرة جداً جداً ممكن نعملها رجالة أو ستات والحاجات الصغيرة دي تسعد اللي حوالينا .. حاجات مش بنبذل فيها أي مجهود ومع ذلك بتسعد زوجاتنا وأزواجنا
الست رقم تمانية لما قالوا لها اوصفي جوزك .. ذكرت إن ريحته حلوة .. بس كده .. ريحته حلوة هي دي أكبر حاجة عجباها في جوزها .. حاجة بسيطة خالص .. مفيهاش تعب بس هي عندها دي حاجة كبيرة قوي ..

برضه الست رقم ثلاثة وأربعة وستة .. كلهن بيجمعهن حاجة احدة وهي رغبتهن في التواصل مع الزوج .. يسمع منهن ... بيعانوا من فقدان الاتصال .. ودي أسوأ حاجة ممكن تكون بين الزوجين .. انقطاع الاتصال .. النبي عليه الصلاة والسلام في حديث أم زرع .. قعد سمع السيدة عائشة رضي الله عنها وهي بتحكي الحكاية من أولها لآخرها .. ما زهقش .. ما قالهش أنا مش فاضي .. مع إنه رئيس دولة تحيط بها الأطماع من كل جانب ورسول لكافة البشر مشغول بعملية الإبلاغ .. ومع ذلك جلس وأنصت ثم علق بعد ذلك وذكر رأيه في الحكاية .. ودا معنى الاتصال بين الزوج والزوجة

في كتاب الرجال من المريخ والنساء من الزهرة .. كان مقصود الدكتور جون جراي من بحثه الذي استمر سبع سنوات إن الرجل والمراة يحسنا طريقة الاتصال فيما بينهما .. ولحاجة الزباين في العالم كله للبضاعة دي .. الكتاب اتخطف من الأسواق ونال شهرته العالمية واحتل المرتبة الأولى في الكتب الأكثر مبيعاً في أمريكا لأكثر من عامين

طبعاً لو سألنا مين أفضل وأسوأ وصف لزوج .. حنقول اسوأ زوج هو زوج الست رقم سبعة لأنها طعنت في رجولته وهو أمر حساس جداً لا يمكن أن تجهر به الزوجة إلا أن تكون بلغت من هذا الزوج ما بلغت .. وكمان طعنت في عقله .. لكن بصراحة معها حق .. فالزوج اللي يستخدم أسلوب الضرب .. يستحمل بقى انتقام الزوجة وانتهازها أقرب الفرص لضربه تحت الحزام والتشهير به بفضيحة بجلاجل.

فيه ناس حتقول إن الست أم زرع أحسن واحدة وصفت زوجها

هنا بقى حنختلف .. لأن السؤال كان واضح من البداية .. كل واحدة توصف جوزها .. ومادام هي متجوزة واحد كان المفروض تحكي عليه مباشرة .. لكن هي حكت عن الزوج الأول ؟؟؟

تصرف غريب .. مش كده

عشان كده كنت بقول إن أم زرع هي أكثر الستات الحداشر ذم في زوجها لأنها عملت الحاجة القاتلة لكل رجل .. شرقي أو غربي .. وهي مقارنته برجل آخر .. ودي الحاجة اللي مش بيطيقها أي رجل

والستات بيعملوا الموضوع دا عن قصد أو غير قصد .. بوصف زوج سابق أو زوج أحدى صديقاتها أو قريباتها أمام الزوج .. اللي أول ما يسمع حاجة زي كده بيتخض ويتلخبط ومش بيعرف يتصرف إزاي .. هل يسكت ويعمل نفسه عادي وهو جواه ألف سؤال وسؤال .. ولا يتجرأ ويسأل عن قصدها من الحكاية دي ويبان في صورة الطفل الغيور المتغاظ أو في صورة الزوج الغير متحضر ..

دكتور جون جراي ذكر في كتابه برضه إن الرجل دائما يحتاج الدعم من زوجته .. يحتاج منها أن تشعره بالثقة وأنه صح على طول الخط .. وأي حديث لا يحمل هذا المعنى بيجعل الرجل مضطرب جداً ويفقد جزء كبير من سعادته مع الزوجة

مثال :
الزوجة : جبت بكام كيلو السمك ده ..
الزوج : بـ 15 جنيه
الزوجة : ضحك عليك .. دا انا لسه شايفاه في السوق بـ 14
مثال تاني
الزوج : أنا حشارك محمود جارنا في مشروع كده
الزوجة : طب خلي بالك بقى لا يضحك عليك ويطلع نصاب ويلهف فلوسك ويخلع
مثال ثالث
الزوجة : هشام جوز منال أختي حيسافر بره عقد عمل
الزوج : والله ألف مبروك
الزوجة : أهو أحسن له من القعدة هنا بالمرتب الملاليم اللي مش بيفتح بيت ولا يربي عيال

عايزين امثلة تاني ولا كفاية ... فيه أمثلة للصبح

فالرجل .. هذا الطفل الكبير يحتاج من زوجته أن تشعره بقوته ليستمر في عطاءه وإلا إذا فقد الثقة بنفسه .. فلا تنتظر منها شيء .. وحيكون زي خيال المآتة في البيت

وعشان كده يمكن أنا قلت قبل كده إني بحب شخصية شهرزاد جداً .. وهي فتاة أحلامي .. لأنها ومع اتفاق الجميع على أنها الأذكى والأفضل .. إلا إنها لم تجعل شهريار يفقد الثقة في نفسه .. بل كان يشعر أنه المسيطر .. رغم أن شهرزاد أخضعته بحدوتة قبل النوم ليستحق لقب أكثر الأزواج سذاجة .. شهرزاد المسيطرة بدون ضجة لا صخب هي ما اتمناه في فتاة أحلامي وازعم انها ما يتمناه كثير من الرجال.
الست أم زرع بقى بالغت جداً في وصف زوجها الأول .. ووضعت فيه كل صفات الكمال اللي تتمناها زوجة في زوجها .. وبعد كده ذكرت إنه طلقها بدون سبب مقنع .. كل ده عشان تمهد لما تريد .. عشان في الآخر تعقد المقارنة اللي حتضرب بيها زوجها الضربة القاضية .. فلو جمعت كل ما اعطانيه ما بلغ أصغر آنية أبي زرع .. اللي شرحتها بجملة ضفر أبو زرع برقبة جوزي

أم زرع مش كانت بتوصف زوجها القديم .. دي في كل الأوصاف من البداية كانت يتوصف زوجها الحالي بالأسلوب الغير مباشر .. أسلوب المقارنة .. الأسلوب الذي يقتل في الرجل معاني الثقة في نفسه
عشان كده كان كلام أم زرع هو أشد كلام عندي وأقسى كلام ممكن يتوصف بيه زوج